A mongwe o kile a go bolelela sephiri?— * Baebele e bua ka sephiri se se botlhokwa se se bidiwang “sephiri se se boitshepo.” Se boitshepo ka gonne se tswa kwa Modimong. E bile se bidiwa sephiri ka gonne batho ba ne ba sa itse ka sone. Tota le baengele ba ne ba batla go itse ka sone. A o ka rata go itse gore sephiri seo ke eng?—

Bogologolo tala, Modimo o ne a bopa monna le mosadi wa ntlha. Maina a bone e ne e le Adame le Efa. Modimo o ne a ba naya legae le lentle le le neng le bidiwa tshimo ya Edene. Fa Adame le Efa ba ka bo ba ile ba reetsa Modimo, bone le bana ba bone ba ka bo ba ile ba dira gore lefatshe lotlhe le nne paradaise jaaka tshimo eo. Mme ba ka bo ba ile ba tshelela ruri mo Paradaiseng. Mme a o gakologelwa gore Adame le Efa ba ile ba dira eng?—

Adame le Efa ga ba a ka ba utlwa Modimo, mme ke ka lebaka leo re sa tsheleng mo paradaiseng gompieno. Modimo o ne a re o tla dira gore lefatshe lotlhe le nne lentle mme mongwe le mongwe o tla tshelela ruri le go itumela. O ne a tla dira seno jang? Ka nako e telele, batho ba ne ba sa itse. E ne e le sephiri.

Fa Jesu a tla mo lefatsheng, o ne a ruta batho ka sephiri seno. O ne a re sephiri seo se ka ga Bogosi jwa Modimo. Jesu o ne a bolelela batho gore ba rapelele gore Bogosi jono bo tle. Bo tla dira gore lefatshe le nne paradaise e ntle.

A o itumeletse go itse sephiri seno?— Gakologelwa gore ke fela batho ba ba leng kutlo mo go Jehofa ba ba tla tshelang mo Paradaiseng. Baebele e re bolelela go le gontsi ka banna le basadi ba ba neng ba le kutlo mo go Jehofa. A o ka rata go ithuta ka bone?— A re bone gore bangwe ba bone e ne e le bomang le gore re ka dira jang gore re tshwane le bone.