Loso ke fa motho a sa tshele. Loso lo tshwana le boroko jo bogolo. (Johane 11:11-14) Baswi ga ba kgone go utlwa, go bona, go bua kgotsa go akanya sepe. (Moreri 9:5, 10) Bodumedi jwa maaka bo ruta gore baswi ba ya kwa lefelong la moya ba ya go tshela le bagologolwane ba bone. Baebele ga e rute seo.

Batho ba ba tlhokafetseng ga ba ka ke ba re thusa, e bile ga ba ka ke ba re gobatsa. Go tlwaelegile gore batho ba dire meetlo le ditlhabelo tse ba akanyang gore di tla itumedisa batho ba ba tlhokafetseng. Seno ga se itumedise Modimo ka gonne se theilwe mo maakeng a ga Satane. Ga se itumedise le fa e le bone baswi, ka gore ga ba tshele. Ga re a tshwanela go boifa kgotsa go obamela baswi. Re tshwanetse go obamela Modimo fela.—Mathaio 4:10.

Baswi ba tla tshela gape. Jehofa o tla tsosetsa baswi mo botshelong gape mo lefatsheng la paradaise. Nako eo e sa ntse e tla. (Johane 5:28, 29; Ditiro 24:15) Modimo o ka tsosa ba ba tlhokafetseng fela jaaka wena o ka tsosa motho mo borokong.—Mareko 5:22, 23, 41, 42.

Mogopolo wa gore ga re swe ke maaka a a anamisiwang ke Satane Diabolo. Satane le madimona a gagwe ba dira gore batho ba akanye gore meya ya baswi e a tshela mme e baka bolwetse le mathata a mangwe. Satane o tsietsa batho, ka dinako tse dingwe o dirisa ditoro le dipono. Jehofa o kgala batho ba ba lekang go bua le baswi.—Duteronome 18:10-12.