Gore o nne tsala ya Modimo, o tshwanetse go ithuta ka ene. A ditsala tsa gago di itse leina la gago e bile di a le dirisa? Ee, go ntse jalo. Modimo le ene o batla gore o itse leina la gagwe o bo o le dirise. Leina la Modimo ke Jehofa. (Pesalema 83:18; Mathaio 6:9) Gape o tshwanetse go ithuta gore o rata eng e bile ga a rate eng. O tshwanetse go itse gore ditsala tsa gagwe ke bomang le gore baba ba gagwe ke bomang. Go tsaya nako gore o kgone go itse motho. Baebele ya re go botlhale go beela nako kwa thoko gore o ithute ka Jehofa.—Baefeso 5:15, 16.

Ditsala tsa Modimo di dira se se mo itumedisang. Akanya ka ditsala tsa gago. Fa o sa di tshware sentle e bile o dira dilo tse di di tlhoileng, a di tla tswelela e nna ditsala tsa gago? Le e seng! Ka tsela e e tshwanang, fa o batla go nna tsala ya Modimo, o tshwanetse go dira se se mo itumedisang.—Johane 4:24.

Ga se ditumelo tsotlhe tse di isang kwa goreng o nne tsala le Modimo. Jesu, yo e leng tsala ya Modimo e kgolo thata, o ne a bua ka ditsela tse pedi. Tsela e nngwe e atlhame e bile e tletse ka batho. Tsela eo e isa tshenyegong. Tsela e nngwe e tshesane mme batho ba ba tsamayang mo go yone ba mmalwa. Tsela eo e isa kwa botshelong jo bo sa khutleng. Seno se raya gore fa e le gore o batla go nna tsala ya Modimo, o tshwanetse go ithuta tsela e e tshwanetseng ya go mo obamela.—Mathaio 7:13, 14.