Quetzal—Nonyane e Ntlentle

KA MMEGADIKGANG WA TSOGANG! KWA COSTA RICA

COSTA RICA e tsere fela diperesente tse di kwa tlase ga di le 0,03 tsa boalo jwa lefatshe, le fa go ntse jalo gone koo go nna mefuta e le 875 ya dinonyane tse di itseweng. Motswedi mongwe wa dikgang o bolela gore ke palo e e fetang ya tse di fitlhelwang kwa Canada le United States di kopantswe mmogo. Ga go gakgamatse he, go bo Costa Rica e le lefelo la konokono le batho ba ba ratang go lebelela dinonyane ba fitlhang ba ema mo go lone. Tsamaya le rona jaaka fa re ya go leba nngwe ya dinonyane tseno, quetzal e ntlentle.

Mo masimologong a bo1500, mogale mongwe wa Mo-Spain e bong Hernán Cortés o ne a goroga kwa Mexico. Koo, o ne a fiwa serwalo sa mo tlhogong se se dirilweng ka mafofa a quetzal, e le mpho e a neng a e fiwa ke Ba-Aztec. E ne e le dikgosi tsa Ba-Aztec fela tse di neng di na le tshiamelo ya go rwala mokgabo ono o o neng o tseelwa kwa godimo. Mafofa a a mmala o botala jo bo tsabakelang a quetzal a ka tswa a ne a tsewa a le botlhokwa go feta gauta.

Gompieno nonyane eno e ntlentle e fitlhelwa mo kgaolong e kgolo thata go tloga kwa Mexico go fitlha kwa Panama. Nonyane eno ya quetzal o ka e fitlhela mo gare ga maru a dikgwa a a bogodimo jwa dimetara tse di gare ga 1 200 le 3 000. Maru a a mo dikgweng tseno a bakwa ke gore moya o o mogote o o tlhatlogang o tsidifala ka bonako. Seno se dira gore dimela di nnele ditala ruri go bo go nne le ditlhare tse dikgolo thata tse di fitlhang go dimetara di le 30 kgotsa go feta kwa mouwaneng.

Mo e ka nnang dikilometara di le 200 kwa bokone jwa San José go na le Santa Elena Forest Reserve—lefelo le o ka bonang quetzal sentle mo go lone e le mo tikologong ya yone ya tlholego. Re thusiwa ke mosupatsela wa rona, re simolola letsholo la rona la go batla go bona quetzal eno e ntlentle. Ka ntlha ya mmala wa nonyane eno o o botala jo bo phatsimang, go thata go e bona, ka gonne e tshwana fela le matlhare a mo sekgweng. Mosupatsela wa rona o simolola go etsa pina ya yone e e monate, e e iketlileng. Modumo wa yone o tshwana le wa go lela ga ntšanyana. Tota e bile, fa mosadi mongwe mo setlhopheng sa rona a utlwa quetzal e lela le yone, o akanya gore go na le ntša e e timetseng mo sekgweng!

Ka bonako fela, mo e ka nnang dimetara di ka nna 15 kwa godimonyana ga rona, e tonanyana, ka go tshaba, e tlhaga mo kaleng go tlhotlhomisa. Fa o dirisa dibonelakgakala, mebala ya yone e e phatsimang e bonala e kgatlha go feta kafa re neng re akantse ka teng. Sehuba sa yone se bohibidu jo bo mokgona, se sa tshwane le mafofa a yone a a botala jo bo phatsimang. Selo se sengwe se se e dirang ntle le go feta ke diphuka tsa yone tse ditshweu mo mogatleng, tse di sa tshwaneng le diphuka tse pedi tse dingwe tse di mmala o motala. Megatla ya tsone e meleele, e ka nna boleele jwa disentimetara di le 60. Go bona quetzal e ntse mo godimo ga kala, mogatla wa yone o moleele o ntse o akgelwa kwa le kwa ke pheswana ke selo se sentle ka tsela e e jesang kgakge tota.

Go itumedisa tota go bona quetzal. Tota e bile, mosupatsela wa rona o ne a re bolelela gore fa o batla go e bona, gantsi o tlhoka go etela sekgwa seno makgetlo a le mmalwa . Nako e e siameng ya go bona dinonyane tseno tsa quetzal ke fa di aga dintlhaga, go tloga ka March go ya go June. Mo lobakeng loo di ka elama gabedi, mae a mabedi ka lekgetlo.

Fa re boela kwa ofising ya phaka, re utlwa quetzal e nngwe. E kokoroga e bile e lepeleditse mogatla wa yone o moleele o motala, e fitlha e tsurama mo kaleng ya setlhare se se ka nnang bokgakala jwa dimetara di le tlhano go tswa mo re dutseng teng! Mosupatsela wa rona o re bolelela gore tsuenyane ya yone e nyeletse mo sentlhageng sa yone. Rre wa yone o fofela mo setlhareng sengwe le sengwe go senka ngwana wa yone. Re bolelelwa gore ke diperesente di le 25 fela tsa mae a tsone a a thuthugang go fitlha di gola. A mangwe a jewa ke dibatana tse di tshwanang le sepepe, di-emerald toucanet, di-brown jay, dikgano le di-tayra. Selo se sengwe gape se se bayang botshelo jwa di-quetzal mo kotsing ke lefelo le di agang dintlhaga tsa tsone mo go lone, e leng dikhuti tse di gabilweng mo logonnyeng tse di-quetzal di di gabang mo dikutung tsa ditlhare tse di tsofetseng tse di onetseng, bogodimo jwa dimetara di le 3 go ya go 20 go tswa kwa tlase. Fa dipula di na thata, dikhuti tseno di tlala metsi kana dikutu di a wa.

Gape re utlwa gore dijo tse quetzal e di ratang thata ke avocado ya naga. E tla nna mo kaleng e lebile avocado e e lepeletseng mo kaleng ya setlhare se se gaufi. Go tswa foo, ka bonako fela, e fofela kwa go yone, e e phamola ka molomo, e bo e boela kwa sentlhageng sa yone. E metsa  avocado eno e feletse mme morago ga metsotso e ka nna 20 go ya go 30 e bo e kgwa thapo ya yone e kgolo.

Fa di-quetzal di ntse di senka di-avocado tsa naga, di tla nna di fudugela kwa mekgatšheng e e farologaneng ya Continental Divide. Ka sekai, go tloga ka July go fitlha ka September, di nna kwa mokgatšheng wa Pacific. Mme ka October di fudugela kwa Caribbean go ya go ja di-avocado tse disha.

Jaaka fa re kgabaganya borogo jo bo lepeletseng mo e ka nnang dimetara di le 30 fa godimo ga boalo jwa sekgwa, quetzal nngwe e batla e fofela mo go rona! Go bonala nonyane eno e ne e ya e lebile dijo tsa yone fa re kgabaganya mo tseleng ya yone. E e namagadi e tsurame fa godimonyana fela ga rona, e re lebile ka tsela e e bontshang gore ga e rate gore re bo re le mo tseleng ya yone.

Re bolelelwa gape gore leungo le lengwe le di le ratang ke blackberry, e e golang mo ditlhareng tsa mebitlwa. Fa di-quetzal di fofela kwa tlase go phamola leungo leno, ka dinako dingwe megatla ya tsone e meleele e tshwarwa ke mebitlwa eno e bo e kgomoga. Le fa go ntse jalo, moragonyana mafofa a mogatla a gola gape.

Ka tsela eno nonyane eno e nna seo leina la yone le se bolelang. “Quetzal” e tserwe mo lefokong la Se-Aztec e bong “quetzalli,” le le rayang “se se rategang thata” kana “se sentle.” Ka maswabi, bontle jwa yone bo dirile gore quetzal e nne mo kotsing. Tota e bile, quetzal e tsentswe mo lenaaneng la mofuta wa ditshedi tse di mo kotsing ya go nyelediwa. Di ntse di tsomelwa matlalo a tsone, a a neng a rekisiwa e le segopotso. Dingwe tsa tsone di ne tsa tshwarwa di tshela mme tsa rekisetswa batho gore ba di rue. Le fa go ntse jalo, mosupatsela wa rona o ne a re bolelela gore jaanong puso e sireletsa quetzal gore e se ka ya thopiwa ka tsela e e ntseng jalo.

Le fa go ntse jalo, selo se sengwe se se tsenyang botshelo jwa yone mo kotsing ke go rengwa ga dikgwa, mo go felelang ka gore di tlhoke mo di nnang teng. Go sireletsa nonyane e ntlentle eno le diphologolo tse dingwe tsa naga, diperesente di ka nna 27 tsa Costa Rica di beetswe kwa thoko gore e nne kgaolo e e sireleditsweng.

Loeto lwa rona lwa go bona quetzal e nnile lo lo itumedisang tota. Ke boammaaruri gore o ka kgona go bona serwalo se se dirilweng ka mafofa a quetzal se se neng sa newa Hernán Cortés kwa Musiamong wa Boritane kwa Lontone. Mme diphuka tsa quetzal di dintle thata fa o di bona mo nonyaneng e e tshelang e e kwa nageng! Bobotlana gone jaanong, di-quetzal tsa naga di sa ntse di na le kgololesego le polokesego e e rileng mo dikgweng tse di ratiwang ke pula tsa kwa Amerika Bogare.