“Ke Tlhoka go Ikanya Modimo”

Mongwe o ne a tlogela lekwalo le le latelang kwa Holong nngwe ya Bogosi ya Basupi ba ga Jehofa kwa Edmonton, Alberta, Canada.

“Morongwa yo o rategang:

“Ke kwala jaana go leboga motho yo o neng a dira kgakgamatso mo botshelong jwa me mme gongwe a sa itse.

“Dibeke di le mmalwa tse di fetileng, nna le monna wa me re ne re omana botlhoko. Ke ne ke sa tswa go bua mafoko ano, ‘Kgang eno e kgolo thata jaana mo e leng gore ruri ga ke bone gore a ke tla kgona go e rarabolola.’ Gone fela foo mongwe o ne a kokota mo lebating. Jaanong go ne go eme mongwe wa Basupi ba ga Jehofa mo lebating la ntlo ya me, mme go setse go le thari thata gore nka iphitlha.

“Fa ke ne ke mmulela lebati, tota ke ne ke iteegile tsebe thata mo e leng gore ke ne ke sa utlwe gore o ne a reng. Gone ke gakologelwa mafoko ‘bana’ le ‘lelapa.’ Monna yono o ne a ntsha buka e e bidiwang Sephiri sa Boitumelo mo Lelapeng. E ne ya re fa ke bona setlhogo seno, ke ne ka simolola go lela mme ka palelwa ke go kgaotsa. O ne a leba kwa godimo, mme morago ga moo a kopa maitshwarelo ka go bo a ne a ntshwentse, a nnaya buka, mme a bo a tsamaya.

“Kgakgamatso ke eng moo? Ke go gakololwa gore fa ke sa itse gore ke direng, go siame ka gonne Modimo ene o a itse. Ke tlhoka go ikanya Modimo. E bile o romela le morongwa. Ke a leboga.”

Buka ya Sephiri sa Boitumelo mo Lelapeng e ka solegela mongwe le mongwe mo lelapeng molemo. Gareng ga dikgaolo tsa yone tse di rutang go na le tse di reng “Sireletsa Lelapa la Gago mo Tlhotlheletsong e e Bosula,” “Boloka Legae la Gago Le na Le Kagiso,” le “O ka Fenya Mathata a a Senyang Lelapa.”

Fa o batla khopi ya buka eno, tsweetswee tlatsa setlankana se se fa tlase fano o bo o se romele kwa atereseng e e bontshitsweng mono kana kwa atereseng e e tshwanetseng mo go tse di bontshitsweng mo tsebeng ya 5 ya makasine ono. O tla bona dikakantsho tse di maleba tse di ka go thusang go rarabolola mathata le go dira gore botshelo jwa lelapa e nne jo bo itumedisang fela jaaka Mmopi a ne a batla gore bo itumedise.

□ Nthomelelang khopi ya buka ya Sephiri sa Boitumelo mo Lelapeng.

□ Tsweetswee ikgolaganyeng le nna malebana le thuto ya mahala ya legae ya Baebele.