Baagi ba mo Magageng ba Segompieno

KA MMEGADIKGANG WA TSOGANG! KWA LESOTHO

BAAGI ba mo magageng mo motlheng wa rona? Re bone bangwe kwa Lesotho, naga e e dithaba mo borwa jwa Afrika. Motse wa bone, wa Ha Kome, o dikilometara di ka nna 60 go tswa kwa Maseru, e leng motsemoshate wa Lesotho, kwa mehapheng ya Dithaba tse dikgolo tsa Maluti. Ka dikgwedi tsa selemo, gantsi mekgokolosa eno ya dithaba e apesiwa ke dithunya tse di bohibidu jo bo galolang. Dithunya tseno tse di ntlentle tse di itsegeng thata ka leina le le rayang ditshipi tse di kgotletsang molelo tse di bolelo mo di bileng di leng khibidu, di dira phetogo e kgolo mo dimeleng tse dingwe tse ditala tsa lefelo leno.

 Malapa a le mmalwa mo motseng ono a sa ntse a tshela ka tsela ya segologolo. Totatota ba aga matlo a bone mo teng ga magaga a mokgokolosa wa thaba. Ba dira ditlhomeso mo leboteng le lekima la kwa pele ka dikota le dilo tse dingwe tse di jaaka lotlhaka. Ba dila lebota ka mmu o o tswakantsweng le boloko jwa dikgomo. Go dila lebota jalo go ba sireletsa mo marigeng a a tsididi a Lesotho, koo ka dinako tse dingwe serame sa teng se ka fetang serame se se dirang gore metsi a swe dikgapetla. Mo teng ga ntlo, go epilwe lefelonyana lengwe fa fatshe le le bidiwang ifo, ke gore “leiso,” le gape le dirisediwang go thutafatsa ntlo fa go le tsididi.

Borulelo, lebota la kwa morago, gantsi le mabota a a ka fa matlhakoreng, otlhe a dirwa ke leje la legaga ka bolone. A dilwa ka mmu o o tswakantsweng le boloko jwa dikgomo, mme a nna a dilwa jalo ngwaga le ngwaga. Seno se dira gore leje le nne le mmala e bile le nne borethenyana mo godimo. Matlalo a dikgomo a kgabisa ka fa teng mme gape a dirisiwa jaaka phate ya go robala.

Moeng yo o tswang kwa dinageng tsa Bophirima o tla kgatlhwa thata ke setso sa koo ka go bo se farologane le tse dingwe. Moaparo o o ratiwang thata ke dikobo tse di mebalabala le dihutshe tse di motsu tse di dirilweng ka bojang. Gantsi o ka bona basimane ba badisa ba ba tsamayang ba sa rwala ditlhako ba disa metlhape ya bone. O ka bona banna ba motse ba bereka kwa masimong a bone a mmidi kana ba tsere dikgang le banna ba bangwe.

Nako le nako go nna go bonala dilo tsa boranyane jwa gompieno. Nako nngwe go tla sefofane se sennye se fofa fa godimo kana dikoloi tse di gogang ka maotwana a manè di tlisitse baeng go tla go bona magaga ano mme o fitlhela batho botlhe mo motseng, bagolo le bana, ba gakgametse. Gantsi go apeelwa kwa ntle ka dipitsa tsa tshipi tse dintsho tsa maotwana a mararo tse di bewang mo godimo ga molelo. Ka ntlha ya go tlhaela ga dikgong, go dirisiwa dibi, matlhaka le matlharenyana a ditlhare go tlhotlhetsa molelo. Dilo tse di tlwaelegileng tse di dirisiwang mo ntlong tse di fitlhelwang mo matlong ano a magaga di akaretsa lelwala la setso le go silelwang mmidi mo go lone le leiso le le fuduang phaletšhe.

Lesotho e itsege thata ka ditshwantsho tse di takilweng ke Basarwa, tse di fitlhelwang mo magageng a le mantsi le mo majeng go ralala naga eno yotlhe. Basarwa ke bone batho ba ntlhantlha go nna kwa magageng a Ha Kome. Ditshwantsho tsa bone di bontsha dilo tse di farologaneng tse ba neng ba di dira, go simolola ka go tshwara ditlhapi ka mekoro le ka matloa go ya go ditantshe tse di kgatlhang tse go bonalang batsayakarolo ba tsone ba ne ba rwala mmampakisi wa diphologolo mo go tsone. Gape ditshwantsho tseno di bontsha diphologolo tse di jaaka ditshwene, ditau, dikubu le phofu, e leng e kgolo go di gaisa tsotlhe mo losikeng lootshepe. Bontsi jwa ditshwantsho tse di neng di takilwe mo magageng a Ha Kome di nyeletse. Go setse matshwaonyana a mannye fela a a re gopotsang botaki jono jwa Basarwa.

Setlhopha sengwe sa Basupi ba ga Jehofa se dira tiro ya sone ya go rera kwa lefelong lengwe le le seng kgakala thata le Ha Kome. Nako le nako, ba etela batho bano ba ba nnang mo magageng, ba ba itsegeng ka moya wa bone o montle wa go amogela baeng. Gantsi Basupi ba amogelwa ka diatla tsoopedi ka go tsholelwa motogo. Batho ba le bantsi ba Ha Kome ba itumelela go amogela dibuka tsa Baebele. Gantsi ba bontsha gore ba anaanela dibuka tseno ka go ntsha merogo, mae, kana dilo tse dingwe e le meneelo ya tiro ya go ruta ya Basupi.

Batho bano ba motlha wa gompieno ba ba nnang mo magageng ba tlotla Baebele thata mme ba rata go botsa dipotso tse dintsi ka ga botshelo, loso le ka ditumelo tsa bone tsa setso. Tiro ya Basupi ba ba tlhagafetseng kwa karolong eno e feletse ka gore batho ba le mmalwa ba tshwarelwe thuto ya Baebele. Ka tsela eno, peo ya boammaaruri e wetse mo mmung o o nonneng mo dipelong tsa batho bano ba ba boikobo.—Mathaio 13:8.

[Mmapa mo go tsebe 26]

(Go bona mokwalo o o feletseng, leba kgatiso)

HA KOME