Ditshwantsho Tse di Hepisang di Tsena mo Internet

DIMILIONE TSA BATHO MO LEFATSHENG LOTLHE DI DIRISA Internet letsatsi lengwe le lengwe. Ba le bantsi ba e dirisetsa go tsamaisa kgwebo, go utlwa dikgang tsa lefatshe tsa sesheng, go utlwa ka maemo a bosa, go ithuta ka dinaga tse di farologaneng, go bona tshedimosetso ka bojanala, kana go buisana le ba lelapa le ditsala tse di leng kwa dikarolong tse di farologaneng tsa lefatshe. Le fa go ntse jalo, ba bangwe—bagolo ba ba nyetseng le ba ba sa nyalang, le bana ba le bantsi—ba e dirisa ka lebaka lengwe le le farologaneng thata: GO LEBA DITSHWANTSHO TSE DI HEPISANG.

 DITSHWANTSHO TSE DI HEPISANG TSA KHOMPUTARA, tse gape di bidiwang cyberporn, di setse di ratwa thata mo e leng gore e setse e le kgwebo e e dirang diranta di le dimilione di se kana ka sepe. The Wall Street Journal e ne ya akgela jaana: “Fa o ka bona aterese nngwe ya Web e atlega thata [ka tsa madi] go le gantsi o tla fitlhela gore ke kgwebo ya dilo tse di makgapha [tse di hepisang].”

Journal eno e tswelela e tlhalosa lebaka la go bo batho ba dirisa Internet go leba ditshwantsho tse di hepisang jaana: “Bareki ba ka kgona go leba dilo tse di leswe tse ba itlosang bodutu ka tsone ba sa tlhoke go kukunela kwa lebenkeleng le le rekisang dibuka tse di leswe kana ba sa tlhoke go ya kwa karolong e e kwa moragorago ya lebenkele la dibidio la lefelo la bone. Bareki ba ka kgona go keleka dilo tseno tse di makgapha ba ituletse fela kwa magaeng a bone—kana kwa kantorong.”

Bana le Ditshwantsho Tse di Hepisang

Maswabi ke gore bontsi jwa batho ba ba lebang ditshwantsho tse di hepisang tsa khomputara ke bana. Basha ba molao o ba kganelang go reka dibuka tse di hepisang tsa tlhakanelodikobo kana go hira dibidio tse di bontshang ditshwantsho tseno ba ka kgona go di bona kwa magabone ka go tobetsa mouse wa khomputara go sekae fela. Ba kgona go bona dilo tse dintsi tota.

Bana ba le bantsi ka metlha ba bula diaterese tsa Internet batsadi ba bone ba sa itse. Tota e bile, The Detroit News e bolela gore “bana ba ba fetang ba babedi mo go ba batlhano ba dirile dipeeletso tsa aterese ya web kana ya tirelo e nngwe ya yone le mororo mo e ka nnang diperesente di le 85 tsa batsadi di ba ileditse go dira jalo.”

Le mororo bontsi jwa bana—le bone bagolo—ba le kelotlhoko go fitlha kgang ya gore ba leba ditshwantsho tse di hepisang, ga se mongwe le mongwe yo o bonang go tlhokega go dira jalo. Bangwe ba bona mokgwa ono e le mofuta wa boitlosobodutu o o seng kotsi. Ba bangwe ba dumela gore ditshwantsho tse di hepisang ga di a siamela bana mme ba tlhalosa gore se batho ba bagolo ba se dirang mo sephiring ke kgang ya bone.

Kwa dinageng dingwe kgang ya ditshwantsho tse di hepisang e setse e fetogile kgang ya moruthutha mo dipolotiking. Batho ba ba buelelang kgololesego ya go bua ba dumalana le kgang ya gore batho ba ka leba ditshwantsho tse di hepisang, mme ba ba buelelang mekgwa e mentle ya lelapa bone ba tlhotlheletsa balaodibagolo gore ba thibele ditshwantsho tseno tse di hepisang.

Tsogang! ga e tseye letlhakore mo dikgannyeng tsa dipolotiki. Lebaka la go bo re kwadile ditlhogo tseno ke go lemosa babadi ba rona dikotsi tsa go leba ditshwantsho tse di hepisang, go ba akantsha ditsela tse bone le baratiwa ba bone ba ka itshireletsang ka tsone, le go naya motho ope fela yo o wetseng mo seraing sa go leba ditshwantsho tse di hepisang, mme a batla go ikgolola, dikakantsho tse di theilweng mo Baebeleng.