Ga o Kitla o Batla go e Fosa!

GO FOSA eng? Kopano ya Kgaolo ya Basupi ba ga Jehofa ya “Badiri ba Lefoko la Modimo!” Dikopano tseno tse di tla simololang ka November mo borwa jwa Afrika, di tla tshwarwa mo ditoropong di le makgolokgolo mo lefatsheng lotlhe mo dikgweding di le mmalwa tse di tlang. Mo mafelong a le mantsi thulaganyo e tla simolola ka mmino ka Labotlhano mo mosong ka 9:30.

Fa thulaganyo ya mo mosong e sena go re kgothaletsa go reetsa se Lefoko la Modimo le se buang, e tla tswelela ka puo e e reng “Phatsimang ka Ntlha ya Bomolemo Jwa ga Jehofa” le e e reng “Tswelelang lo Nitame Jaaka e Kete lo Bona Ene Yo o Sa Bonaleng.” Morago ga moo thulaganyo ya mo mosong e tla konela ka puo ya setlhogo sa kopano e e reng, “Bakang Jehofa—Modiri wa Dilo Tse di Molemolemo.”

Puo ya ntlha ya thulaganyo ya thapama e e reng, “O se Ka wa Lesa go Dira se se Molemo,” e tla latelwa ke simphosiamo sa dikarolo tse tharo se se bontshang kafa o ka tlhophang molekane wa lenyalo ka teng, kafa o ka agang lelapa le le nonofileng mo semoyeng ka teng le kafa o ka rutang bana go rata Jehofa ka teng. Puo e e konelang ya letsatsi e e reng, “Go Tsamaisana le Phuthego ya ga Jehofa,” e tla bolela kafa maikaelelo a Modimo a ileng a tlhaloganngwa kgato ka kgato ka teng mo metlheng ya gompieno.

Thulaganyo ya Matlhatso mo mosong e na le simphosiamo sa bobedi sa dikarolo tse tharo, sa setlhogo se se reng, “Bareri ba Lefoko la Modimo.” Simphosiamo seno se tla ntsha dikakantsho tsa kafa re ka dirang tiro ya rona ya go dira batho barutwa ka teng. Morago ga moo go tla nna le puo e e kgothatsang e e reng, “Go se Tlhabise Modimo Ditlhong.” Morago ga moo go tla latela puo ya kolobetso, mme batho ba ba tshwanelegang ba tla newa tshono ya go kolobediwa.

Mo thapameng, simphosiamo sa boraro sa dikarolo tse tharo se tla gatelela setlhogo se se reng “Dira ka Natla go Tlhagolela Bomoya,” se mo go sone go tla ntshiwang dikakantsho tse di molemo tsa kafa bomoya bo ka nonotshiwang ka gone. Thulaganyo eno e tla konela ka puo e e sedifatsang e e reng “Go Tsamaya mo Leseding le le Nnang le Gola la Lefoko la Modimo.” Puo eno e tla tlotla ka Isaia kgaolo 25 le 26 mme e tla tlhalosa kafa re ka tlhaloganyang buka eno e e kgatlhang ya Baebele botoka ka teng.

Thulaganyo ya Sontaga mo mosong e tla akaretsa simphosiamo sa bofelo sa dikarolo tse tharo sa setlhogo se se reng “Boporofeti Jwa ga Sefania jo bo Nang le Bokao mo Bathong ba ba Dirang Thato ya Modimo.” Puo eno e tla tlhalosa kafa boporofeti jono bo neng bo dira ka teng mo metlheng ya bogologolo mo setšhabeng sa Juda le kafa bo dirang ka gone mo motlheng wa rona, segolobogolo mo madumeding a lefatshe leno. Morago ga moo o tla ipelela go leba terama ya moaparo o o feletseng wa bogologolo ya setlhogo se se reng “Dikai Tse di re Tlhagisang mo Motlheng wa Rona,” e e tlhalosang boitsholo jo bo sa siamang jwa banna ba Iseraele pele fela ga gore setšhaba seno se tsene mo Nageng e e Solofeditsweng. Thulaganyo ya bofelo ya kopano ka Sontaga thapama e tla akaretsa puo ya phatlalatsa e e reng, “Ke ka Ntlha Yang fa o Tshwanetse go Tsaya Ditiro Tse di Molemolemo Tsa ga Jehofa Tsia.”

Rulaganya gone jaanong gore o nne teng ka malatsi otlhe a mararo. Gore o itse ka lefelo le le gaufi le legae la gago le kopano eno e tla tshwarelwang kwa go lone, etela kwa Holong ya Bogosi ya Basupi ba ga Jehofa ya lefelo la gaeno kana o kwalele bagatisi ba makasine ono.