Go Thusa Basha go Falola “Tlwaelo ya go Bolaya”

Ke eng se se dirang gore basha gompieno ba kgatlhiwe ke loso? Moemedi wa naga ya Illinois kwa United States e bong Henry Hyde o boletse jaana: “Go na le dilo tsa semoya tse basha ba di tlhaelang gompieno tse di tseetsweng sebaka ke tlwaelo ya go bolaya le thubakanyo.”

MMADI mongwe wa Time o ne a kwala jaana: “Ke batsadi ba ba botswa, boitlosobodutu jo bo tletseng thubakanyo le go sa thapisiwe mo boitsholong le mo semoyeng tse di bakang tlwaelo ya go bolaya e e leng teng gareng ga basha ba rona gompieno.”

Go jewa ke bodutu ke bongwe jwa mathata a magolo a basha ba nang le one. Bangwe ba tshela mo magaeng a mo go one batsadi ba berekang ka bobedi mme ba se teng mo e batlileng e le letsatsi lotlhe; ba bangwe ba na le motsadi a le mongwe fela. Go ya ka motswedi mongwe, basha ba kwa United States ba nna diura di ka nna 3,5 ba le bosi letsatsi le letsatsi mme fa go bapisiwa le basha mo dingwageng tsa bo1960, palo ya diura tse batsadi ba di nnang le bana beke le beke e fokotsegile ka diura di le 11. Tota e bile, basha bangwe ga ba nne le batsadi ba bone kana ga ba engwe nokeng mo maikutlong gotlhelele.

Se Batsadi Ba ka Se Dirang

Ka ntlha ya go ‘tlhaela dilo tsa semoya’ mo basha ba emelanang le gone, seabe sa batsadi se botlhokwa go le kana kang? Batsadi ba ba botlhale ba itse gore mo letlhakoreng le lengwe bana ba bone ba tlhoka boitlosobodutu  jo bo siameng mme mo go le lengwe ba tlhoka go engwa nokeng ka dinako tsotlhe. Fa batsadi ba tlhotlhelediwa ke go ba kgatlhegela ka lorato, ba ka buisana le bone ka mmino o ba o ratang, dithulaganyo tsa thelebishene, dibidio, dipadi, metshameko ya bidio le dibaesekopo. Le fa gone basha ba bantsi ba sa go bontshe, ba le bantsi ba bone ba eletsa go kgatlhegelwa le go kaelwa ka lorato ke batsadi ba bone. Ba tlhoka dikarabo tse di tlhamaletseng ka gonne ba tshela mo lefatsheng le le sa tlhomamang. Bagolo ba tshwanetse go tlhaloganya gore bana ba lebane le lefatshe le le raraaneng thata go feta fa bone ba ne ba sa le basha.

Batsadi ba ba eletsang go sireletsa bana ba bone ba tla buisana le bone ka metlha, ba ba reetsa ka kelotlhoko le go ba tlhagisa ka dikotsi tse di leng teng mo setsong sa bosheng. Fa batsadi ba tlhoma ditekanyetso tse di sa fetofetogeng mme ba tlhomame e bile ba lekalekane gape ba rata bana ba bone, gantsi ba tla bona ditlamorago tse di siameng.—Mathaio 5:37.

Batsadi ba e leng Basupi ba ga Jehofa ba dira boiteko jwa go nna le metlotlo ya ka metlha le bana ba bone, ba dirisa Baebele le dikgatiso le dibidio * tse di theilweng mo Baebeleng. Ba dirisa dinako tse di ntseng jalo, e seng go omanya bana ba bone, mme go na le moo go tlotla le bone ka dikgang tse di agang semoyeng. Mo dikokoanong tseno tsa lelapa, ba reetsa mathata kana dikgwetlho tse di amang mongwe le mongwe wa bana ba bone e le gore basha ba ka nna le tshono ya go bona tlhokomelo ya motho ka namana.

Basha ba ba sa boneng kaelo ya semoya go tswa mo batsading ba bone ba ka nonotshiwa ke Pesalema 27:10, e e bolelang jaana: “Gonne rre le mme ba ntatlhile, mme Jehofa o tlaa ntshola.” Jehofa, Rara wa mautlwelobotlhoko a a tlekeetso, o thusa jang basha? Diphuthego tsa Basupi ba ga Jehofa e nnile botshabelo jo ba le bantsi ba boneng lorato lwa batho ba bangwe mo go jone le go rarabololelwa dipelaelo tsa bone. Josías, lekawana lengwe le le neng la go fitlhela e le boammaaruri, le akgela jaana: “Phuthego ya ga Jehofa e na le seabe sa botlhokwa. Ke ne ke ikutlwa gore botshelo ga bo na mosola ope. Ke ne ke tshela kwantle ga boikaelelo, ke se na tsholofelo. Go itse gore ga ke nosi go ne ga fetola botshelo jwa me gotlhelele. Ke ne ka ikutlwa gore bakaulengwe kwa phuthegong ke lelapa le le neng le ntatlhegetse. Bagolwane le malapa mo phuthegong ba tshwana le tshetledi mo maikutlong.”

 Tota e bile, basha ba bantsi le bagolo ba tokafaditse boitekanelo jwa bone jwa tlhaloganyo le jwa semoya ka go nna teng ka metlha kwa dipokanong tsa phuthego tsa Basupi ba ga Jehofa. Moitsethutomotho e bong Patricia Fortuny o ne a akgela ka ditlamorago tseno tse di siameng mo tlhamong ya gagwe ya Los Testigos de Jehová: una alternativa religiosa para enfrentar el fin del milenio (Basupi ba ga Jehofa: Bodumedi Jo o Ka bo Tlhophang go Lebana le Bokhutlo Jwa Mileniamo): “Basupi ba ga Jehofa ba na le thulaganyo ya ka metlha e e phepafetseng le e e tlhaloganngwang e o ka e dirisang mo botshelong jwa letsatsi le letsatsi, melaometheo e e tlhomameng e e kaelang go akanya le go dira dilo . . . “Thulaganyo ya ka metlha” le “melaometheo” tse di umakilweng fano di theilwe mo Baebeleng. Ka jalo, le fa gone Basupi ba ga Jehofa ba lebana le mathata le dikgatelelo tse di tshwanang le tsa baagelani ba bone, ba nonotshiwa ke botlhale jo bo sa tshwaneng le bope jwa buka eo ya bogologolo. Ee, Basupi ba bona botshabelo mo dithutong tsa teng tse di itshekileng le mo melaometheong e e bonwang mo Baebeleng.

Fa “Loso lo Tla bo lo Seyo”

Thuto e e newang kwa Diholong Tsa Bogosi tsa Basupi ba ga Jehofa e gatelela gangwe le gape tsholofetso ya Modimo ya lefatshe le lesha le le tla tlogang le tla, le mo go lone ‘go tla nnang le tshiamo’ le mo ‘ope a se ketlang a ba boifisa.’ (2 Petere 3:13; Mika 4:4) Mo godimo ga moo, moporofeti Isaia o ne a bega gore ka nako eo Modimo o tla bo a “komeditse loso ka bosakhutleng; Morena Modimo o tlaa phimola dikeledi mo matlhong otlhe.” Loso lo ne lwa wela lotso lwa motho e le ditlamorago tsa go tlola molao ga monna wa ntlha e bong Adame, mme tsholofetso ya Modimo ke gore ka bonako “loso lo tla bo lo seyo.”—Isaia 25:8; Tshenolo 21:3, 4; Baroma 5:12.

Fa e le gore o mosha yo o tlhokang thuso, re go laletsa gore o bone tsholofelo le lebaka la go tshela mo Baebeleng. Ka thuso ya Basupi ba ga Jehofa, o ka nna le tsholofelo ya gore go larile dinako tse di monate kwa pele ga rona mo lefatsheng le lesha le Modimo a le solofeditseng.

[Ntlha e e kwa tlase]

[Setshwantsho mo go tsebe 9]

Batsadi ba tshwanetse go ipha nako ya go reetsa bana ba bone ka kelotlhoko le go tlhaloganya mathata a bone

[Ditshwantsho mo go tsebe 10]

“Basupi ba ga Jehofa ba na le thulaganyo ya ka metlha e e phepafetseng le e e tlhaloganngwang e o ka e dirisang mo botshelong jwa letsatsi le letsatsi”