Hisitori—A re Tshwanetse go e Ikanya?

“Go itse hisitori go dira gore . . . re ikutlwe re le karolo ya setšhaba se se sa bolong go nna teng bogologolo pele ga re tsholwa le morago ga re sena go swa.”—A COMPANION TO THE STUDY OF HISTORY, KA MICHAEL STANFORD.

FA RE sa itse hisitori, re a bo re sa itse dilo tse di botlhokwa thata mo botshelong. Fa wena, lelapa la gaeno, lotso lwa gaeno, kgotsa setšhaba sa gaeno lo sa itse hisitori, go tla nna jaaka e kete ga lo itse kwa lo tlholegileng gone. Go tla nna jaaka e kete dilo tse di diragalang gone jaanong ga di na kwa di simolotseng teng e bile ga di na bokao bope.

Hisitori e ka nna bobolokelo jo bogolo jwa dilo tse re ka di ithutang tsa botshelo. E ka re thusa gore re se ka ra dira diphoso tse di tshwanang gangwe le gape. Jaaka fa mofilosofi mongwe a ile a tlhomamisa, ga go na pelaelo gore batho ba ba lebalang hisitori ba tla boeletsa diphoso tsa yone. Go itse hisitori go ka re thusa go tlhaloganya ditlhabologo tsa nako e e fetileng, diphitlhelelo tse di gakgamatsang, batho ba ba kgatlhang thata, le go leba dilo ka ditsela tse di sa tshwaneng.

Mme e re ka hisitori e bua ka batho le ditiragalo tsa bogologolo, re itse jang gore e ka ikanngwa? Fa e le gore re tlile go ithuta dithuto tse di botlhokwa mo hisitoring, ga go na pelaelo gore di tshwanetse tsa bo di bua ka dilo tse tota di diragetseng. Mme fa re simolola go itse boammaaruri, re tshwanetse go bo amogela, le fa ka dinako tse dingwe go se monate go dira jalo. Hisitori e ka tshwana le tshingwana e ntle ya motoroko—e ntle fela thata mme gape e na le bothata jwa go tlhaba; hisitori e ka itumedisa fela thata mme gape e ka hutsafatsa.

Mo ditlhogong tse di latelang, re tla sekaseka dikarolo dingwe tsa hisitori tse di ka re thusang go bona boammaaruri jwa se re se balang. Gape re tla sekaseka go bona gore hisitori e e boammaaruri e ka solegela molemo jang mmadi yo o dirisang temogo.

[Setshwantsho mo go tsebe 3]

Kgosigadi Nefertiti

[Setshwantsho mo go tsebe 3]

Re ka ithuta eng mo hisitoring?

[Metswedi ya Ditshwantsho mo go tsebe 3]

Nefertiti: Ägyptisches Museum der Staatlichen Museen Preußischer Kulturbesitz, Berlin

Border: Photograph taken by courtesy of the British Museum