Ditoropo—Ke Eng Fa di Le mo Mathateng?

“Tlang! A re ikageleng motse le tora e bogodimo jwa yone bo fitlhang kwa magodimong . . . e se re kgotsa ra gasama mo godimo ga lefatshe lotlhe.”—Genesise 11:4.

MAFOKO ano, a a neng a buiwa dingwaga di feta di le 4 000 tse di fetileng, a ne a itsise ka go agiwa ga toropo e kgolo ya Babele.

Babele, e moragonyana e neng ya bidiwa Babelona, e ne e le mo mabaleng a a kileng a bo a ungwa a Shinare kwa Mesopotamia. Le fa go ntse jalo, go farologana le se batho ba le bantsi ba se akanyang, e ne e se yone toropo ya ntlha go umakiwa mo Baebeleng. Totatota ditoropo di simolotse pele ga Morwalela wa motlha wa ga Noa. Kaine wa mmolai o ne a aga ya ntlha e go kwadilweng ka yone. (Genesise 4:17) Toropo eno e e bidiwang Enoke, go bonala e ne e le motse kgotsa motsana o o sireletsegileng. Kafa letlhakoreng le lengwe, Babele e ne e le toropo e kgolo—lefelo la konokono la kobamelo ya maaka le le neng le na le tora e e goletseng kwa godimo ya bodumedi. Le fa go ntse jalo, Babele le tora ya yone e e neng e sa ratege di ne di ganetsana le Modimo. (Genesise 9:7) Ka jalo go ya ka Baebele, Modimo o ne a kgaosetsa baagi ba yone mme a tlhakatlhakanya puo ya bone, a fedisa leano la bone la bodumedi la bopelotshetlha. “Go tswa koo” Modimo “a ba gasamisetsa mo godimo ga lefatshe lotlhe,” go bolela jalo Genesise 11:5-9.

Ga go gakgamatse go bo seno se ile sa felela ka gore go nne le ditoropo di le dintsintsi. Mo godimo ga moo, ditoropo di ne di sireletsa batho gore ba se ka ba tlhaselwa ke baba. Ditoropo di ne di na le mabolokelo a balemirui ba neng ba baya dikungwa tsa bone mo go one le go di aba go tswa mo go one. Go nna teng ga marekisetso le gone go ne ga dira gore banni ba le bantsi ba mo ditoropong ba itshedise ka ditsela tse dingwe tse di farologaneng go na le go itshedisa ka go lema. The Rise of Cities e bolela jaana: “Fa banni ba mo ditoropong ba setse ba dule mo mathateng a lehuma, ba ka kgona go simolola go dira ditiro di le dintsi tsa diatla tse di jaaka: go dira diroto, dinkgo, go otlha, go loga, go dira dilo tsa letlalo, go betla ka logong le go betla maje—sengwe le sengwe fela se se ka rekisiwang mo marekisetsong.”

Ditoropo e ne e le mafelo a dilo tseno di neng di abiwa motlhofo mo go tsone. Akanya ka pego ya Baebele ya leuba le legolo kwa Egepeto. Tonakgolo Josefa o ne a bona go le molemo gore batho ba nne mo ditoropong. Ka ntlha yang? Go bonala e le ka gonne seno se ne se dira gore dijo tse di setseng di kgone go abiwa motlhofo.—Genesise 47:21.

Gape, ditoropo di ne di kgona go tokafatsa ditsela tsa puisano le go tsalana ga batho ka nako ya fa tirelo ya dipalangwa e ne e le bonya e bile go se na dipalangwa di le dintsi. Seno le sone se ne sa akofisa diphetogo tsa loago le setso. Ditoropo e ne ya nna mafelo a mo go one go neng ga nna le mokgwa o mosha wa go dira dilo le go etleetsa kgatelopele ya  botegeniki. Fa go ntse go tlhaga megopolo e mesha, go ne ga tlhaga le dilo tse disha tsa saense, bodumedi le filosofi.

Ditoro Tse di Sa Diragadiweng

Mo metlheng ya segompieno, ditoropo di tswelela pele go solegela batho ba le bantsi molemo ka ditsela tse di tshwanang. Ga go gakgamatse he go bo di tswelela pele go ngoka batho ba le dimilione—segolo jang kwa dinageng tse kwa go tsone botshelo mo metseselegaeng bo leng boima ka tsela e e ka se kang ya kgona go itshokelwa. Le fa go ntse jalo, ditoro tsa botshelo jo bo botoka tsa batho ba le bantsi ba ba fudugelang kwa ditoropong ga di diragadiwe. Buka ya Vital Signs 1998 e bolela jaana: “Go ya ka patlisiso nngwe ya bosheng jaana e e dirilweng ke Lekgotla la Palo ya Batho, gompieno maemo a botshelo kwa mafelong a le mantsi a setoropo a dinaga tse di tlhabologang a kwa tlase thata go gaisa kwa metsesetoropong.” Ke ka ntlha yang fa go ntse jalo?

Henry G. Cisneros o kwala jaana mo bukeng ya The Human Face of the Urban Environment: “Fa batho ba ba humanegileng ba nna bantsi thata mo lefelong le le lengwe fela, mathata a bone a oketsega ka bonako. . . . Go oketsega thata ga batho ba ba humanegileng go ntse go patilwe ke go oketsega ga bothata jwa go tlhoka tiro, jwa go nna le batho ba le bantsi ba ba tshelang ba ikaegile ka batho ba bangwe lobaka lo loleele, mathata a magolo a boitekanelo mo setšhabeng, mme se se tshosang le go feta, go oketsega ga bokebekwa.” Buka ya Mega-city Growth and the Future le yone e bolela jaana: “Go tla ga batho ba le bantsintsi mo ditoropong gantsi go dira gore go nne le ba le bantsi ba bone ba ba se nang tiro le ba ba dirang ditiro tsa nakwana fela ka gonne mmaraka wa tiro o sa kgone go thapa batho ba le bantsi ba ba batlang tiro.”

Palo e e ntseng e gola ya bana ba ba nnang mo mebileng ke bosupi jo bo hutsafatsang thata jwa lehuma le le tseneletseng le le leng gone mo ditoropong tsa dinaga tse di tlhabologang. Go ya ka diphopholetso dingwe, go na le bana ba ka nna dimilione di le 30 ba ba nnang mo mebileng mo lefatsheng lotlhe! Buka ya Mega-city Growth and the Future e bolela jaana: “Lehuma le mathata a mangwe di gogotse kutlwano ya lelapa mo e leng gore bana ba ba nnang mo mebileng ba ile ba patelesega go iphataphatela.” Bana ba ba ntseng jalo gantsi ba lepalepana le masetlapelo ano ka go sela dijo mo matlakaleng, ka go kopa kgotsa go dira tiro ya maemo a a kwa tlase mo mebarakeng ya lefelo le ba nnang mo go lone.

Dilo Tse Dingwe Tse di Hutsafatsang

Lehuma le ka baka bokebekwa. Kwa toropong nngwe ya kwa Amerika Borwa e e itsegeng ka dikago tsa yone tsa bosheng, bokebekwa bo aname thata jaana mo e leng gore dikago tsa toropo eo di ageletswe ka magoratshipi e bile di tsentswe ditshipi mo difensetereng. Baagi ba ba humileng thata le ba ba dikobo di magetleng ba aga magoratshipi go sireletsa dikago tsa bone le gore ope a se ka a tsena mo go tsone. Tota e bile, ba  nna mo teng ga dikampa. Bangwe e bile ba tsenya magora ano le pele matlo a bone a fetsa go agiwa.

Gape palo e e kwa godimo ya baagi e dira gore batho ba se ka ba kgona go tlamelwa botlhe ka dilo tsa botlhokwa tse di jaaka metsi le ditirelo tsa go tlosa leswe le go thibela malwetse. Go fopholediwa gore kwa toropong nngwe ya kwa Asia, go tlhokega matlwana a boithomelo a le 500 000. Le fa go ntse jalo, patlisiso nngwe ya bosheng e bontshitse gore go na le matlwana a le 200 fela a boithomelo a a dirang sentle!

Selo se sengwe se se sa tshwanelang go itlhokomolosiwa ke diphelelo tse di diphatsa tse gantsi di nnang gone mo tikologong ka ntlha ya palo e e kwa godimo thata ya batho. Mafelo a go lengwang mo go one a a gaufi le toropo a a nyelela fa melelwane ya ditoropo e ntse e atologa. Mookamedi wa pele wa Mokgatlho wa Lekgotla la Ditšhaba Tse di Kopaneng wa Thuto, Saense le Setso e bong Federico Mayor o bolela jaana: “Ditoropo di dirisa motlakase o montsi thata, di fetsa metsi le dijo le didirisiwa tse dingwe. . . . Tikologo ya tsone e feletswe ke maatla, ka gonne ga e tlhole e kgona go naya batho se ba se tlhokang kgotsa go lepalepana le se ba se ntshang mo go yone.”

Mathata a Ditoropo Tse Dikgolo Kwa Dinageng Tsa Bophirima

Boemo bo ka tswa bo se maswe go le kalo kwa dinageng tsa Bophirima, mme go sa ntse go na le mathata mo metsesetoropong. Ka sekai, buka ya The Crisis of America’s Cities e bolela jaana: “Gompieno ditoropo tsa kwa Amerika di tletse bothubaki jo bo feteletseng. . . . Thubakanyo e ntsi thata kwa ditoropong tsa Amerika mo e leng gore makwalopaka a tsa kalafi a simolotse go tlotla thata ka yone jaaka bongwe jwa mathata a magolo a boitekanelo mo motlheng wa rona.” Gone ke boammaaruri gore thubakanyo ke bothata jo bo leng teng mo ditoropong di le dintsi tse dikgolo mo lefatsheng lotlhe.

Go senyega ga botshelo mo ditoropong ke lengwe la mabaka a a dirileng gore bathapi ba se ka ba tlhola ba kgatlhegela ditoropo di le dintsi. Buka ya The Human Face of the Urban Environment e bolela jaana: “Dikgwebo di fudugetse kwa mafelong a a ka kwa ntle ga ditoropo kgotsa kwa moseja, di tswetse madirelo, di tlogetse ‘masimo a sentswe’—dikago tse di se nang sepe mo dibateng tse di leswe tsa lefatshe tse go epetsweng matlakala mo go tsone, tse di sa kgoneng go tlhabololwa gotlhelele.” Ka ntlha ya moo, mo ditoropong di le dintsi, batho ba ba humanegileng ba tlala thata mo mafelong a “kwa go one mathata a tikologo a tlhokomologiwang motlhofo fela—kwa dipeipi tsa matlwana a boithomelo di sa berekeng sentle gone; kwa go se nang metsi a a lekaneng gone a a phepa; kwa ditshedinyana tse dinnye di tlalang mo mafelong a a tletseng matlakala gone di bo di tshwenya baagi; kwa bana ba bannye ba jang pente e e nang le lloto gone e e obogang mo maboteng a difolete tse di onetseng thata . . . koo go lebegang go se na ope yo o kgathalang gone.” Mo tikologong e e ntseng jalo, go tletse bokebekwa, thubakanyo e bile batho ba feletswe ke tsholofelo.

Mo godimo ga moo, ditoropo tsa kwa Bophirima di na le bothata jwa go thusa batho ka dilo tse ba di tlhokang. Mo nakong e e fetileng ka 1981, bakwadi bano e bong Pat Choate le Susan Walter ba ne ba kwala buka e e nang le setlhogo se se reng America in Ruins—The Decaying Infrastructure. Ba ne ba tlhalosa jaana mo go yone: “Dikago tsa batho botlhe tsa kwa Amerika di onala ka bonako go feta kafa di tlhabololwang ka gone.” Bakwadi bano ba ne ba tshositswe thata ke kafa maborogo a rusitseng ka gone, ditsela di senyegileng ka gone, le kafa dipeipi tsa matlwana a boithomelo mo ditoropong tse dikgolo di senyegileng ka gone.

Dingwaga di le masomeamabedi moragonyana, ditoropo tse di jaaka New York di sa ntse di na le mathata ka dilo tsa tsone tsa motheo. Setlhogo sengwe mo go New York Magazine se ne sa tlhalosa tiro nngwe e kgolo ya mogogoro wa Third Water Tunnel. E ntse e tsweletse ka dingwaga di ka nna 30 jaanong, e bile e bidiwa “tiro e e leng yone fela e kgolo go di gaisa tsotlhe ya dilo tsa motheo kwa Bophirima.” Tiro eno e ja madi a diranta di le dimilione di le dikete di le 40. Fa e weditswe, mogogoro ono o tla fetisetsa dilitara di le dimilione di le dikete di le tlhano tsa metsi a a phepa kwa New York City ka letsatsi. Mokwadi o bolela jaana: “Mogogoro ono o mogolo o diretswe gore go emisediwe dipeipi tse di leng teng, gore di tle di kgone go baakanngwa lekgetlho la ntlha fa e sa le di tsenngwa mo tshimologong ya lekgolo la bo20 la dingwaga.” Go ya ka setlhogo sengwe sa The New York Times, go baakanya dilo tsotlhe tse di senyegang tsa motheo tsa toropo eno—diporo tsa diterena tse di tsamayang kafa tlase ga lefatshe, dipeipi tse dikgolo tsa metsi, ditsela tsa teng le maborogo a teng, go tla ja madi a a kana ka diranta di le dimilione di le dikete di le 695.

New York ga se yone fela toropo e e nang le bothata jwa go tlamela batho ka dilo tse ba di tlhokang. Tota e bile, ditoropo di le mmalwa tse dikgolo di senngwa thata ke dilo tse dintsi tse di farologaneng. Ka February 1998, motlakase o ne wa kgaoga  ka dibeke di feta di le pedi kwa Auckland, New Zealand. Baagi ba kwa Melbourne, kwa Australia, ba ne ba nna malatsi a le 13 ba se na metsi a a bolelo fa sefetlhagase se ne se tswetswe ka ntlha ya kotsi e e neng ya direga kwa go sone.

Gape go na le bothata jo bo tlhasetseng mo e batlang e nna ditoropo tsotlhe—go kitlana ga pharakano. Motlhami wa dipolane e bong Moshe Safdie o bolela jaana: “Dilo di a thulana—ga di tsamaisane—fa gare ga bogolo jwa ditoropo le tsamaiso ya tsone ya dipalangwa. . . . Ditoropo tse dikgologolo di ne tsa tshwanelwa ke go dira gore mafelo a tsone a kgwebo a tsamaisane le bontsi jwa pharakano e go neng go sa akanngwe gore e tla gola ka nako ya fa di ne di agiwa.” Go ya ka The New York Times, kwa ditoropong tse di jaaka Cairo, Bangkok le São Paulo, pharakano e nna e kitlane ka dinako tsotlhe.”

Go sa kgathalesege mathata ano otlhe, go bonala batho ba sa kgaotse go fudugela kwa ditoropong. Jaaka fa setlhogo sa The UNESCO Courier se tlhalosa gore, “le fa seno se ka tswa se le boammaaruri kgotsa nnyaa, go bonala toropo e dira gore batho ba dire kgatelopele le go gololesega, e ba naya tsholofelo, selo se se ba ngokang fela thata.” Mme gone, ditoropo tse dikgolo mo lefatsheng di na le isagwe e e ntseng jang? A go na le ditsela dipe fela tse di mosola tsa go rarabolola mathata a tsone?

[Mafoko a a mo go tsebe 5]

“Go tla ga batho ba le bantsintsi mo ditoropong gantsi go dira gore go nne le ba le bantsi ba bone ba ba se nang tiro le ba ba dirang ditiro tsa nakwana fela”

[Setshwantsho mo go tsebe 7]

Ditoropo di le dintsi di na le bothata jo bogolo jwa pharakano

[Setshwantsho mo go tsebe 7]

Bana ba le dimilione ba ba nnang mo mebileng ba a iphataphatela

[Setshwantsho mo go tsebe 7]

Ditoro tsa botshelo jo bo botoka tsa batho ba le bantsi ba ba nnang mo ditoropong ga di diragadiwe