Kgopolo E e Mo Baebeleng

A Jehofa E ne E le Modimo wa Setšhaba sa Bajuda Fela?

MO DINAGENG di le dintsi gompieno, leina la ga Jehofa le amanngwa thata le phuthego ya motlha wa segompieno ya Basupi ba ga Jehofa. Le fa go ntse jalo, leina leno le tlhaga mo dithanolong dingwe tsa Dibaebele tse di dirisiwang ke ditumelo tse dingwe tse e seng tsa Basupi ba ga Jehofa. Eleruri, leina la ga Jehofa jaaka le emelwa ke ditlhaka di le nnè tsa Sehebera ga le bolo go dirisiwa ka diketekete tsa dingwaga.

Ka dinako tse dingwe Jehofa o bidiwa “Modimo wa Iseraele.” (1 Ditiragalo 17:24) Polelwana eno e dirile gore batho bangwe ba dumele gore e ne e le modimo fela o o tlwaelegileng wa setšhaba sengwe o Bahebera ba neng ba mo tsaya kwa ditsong tse dingwe kana o bone ka bobone ba mo itiretseng. Mokwadi wa buka ya A History of God e bong Karen Armstrong o bolela jaana: “Kwa tshimologong [Jehofa] e ne e le Modimo o o bogale thata wa setšhaba sa Iseraele. Moragonyana mo e ka nnang mo lekgolong la bosupa kana la borataro la dingwaga B.C., baporofeti ba Baiseraele . . . , ba ne ba dirisa Modimo ono wa setšhaba sa bone go nna setshedi sengwe se se ka se kang sa kgona go tlhalosiwa ke batho.”

Borahisitori ba le bantsinyana ba bodumedi ba lekile go tlhalosa gore leina leno la Jehofa le simolotse mo Bakananeng kana mo Baegepetong. Ba bangwe ba gatelela gore ke “leina la bogologolo la setšhaba sengwe” mme ga se la Modimo o go buiwang ka ene mo “Tesetamenteng e Ntšha.” A seno se boammaaruri? Baebele e re senolela eng fa re e bala ka kelotlhoko?

Jehofa—Modimo wa Batho Botlhe

Baebele e a dumela gore setšhaba sa Iseraele se ne se na le botsalano jo bo gaufi thata le Jehofa. Le fa go ntse jalo, leno ga se lone lebaka la go bolela gore ke modimo wa setšhaba se se  rileng fela. Moaposetoloi wa Mokeresete e bong Paulo o ne a botsa jaana: “A ke Modimo wa Bajuda fela? A gape ga se wa batho ba ditšhaba?” Paulo o ne a araba potso eno jang ka phepafalo? “Ee, le wa batho ba ditšhaba gape.” (Baroma 3:29) Paulo o ne a bua ka Modimo ofe? Gone mo lekwalong leno la Baroma, leina la ga Jehofa le tlhaga makgetlo a le 19. Moaposetoloi yono, fa a nopola moporofeti mongwe wa bogologolo wa Mohebera e bong Joele, o ne a bolela gore “mongwe le mongwe yo o bitsang leina la ga Jehofa o tla bolokwa,” e seng Bajuda fela.—Baroma 10:13; Joele 2:32.

Baiseraele ga ba ka ba itlhopela gore Jehofa e nne Modimo wa bone; go na le moo, Jehofa ke ene yo a neng a ba tlhopha gore a diragatse boikaelelo jwa gagwe—jwa go baakanyetsa Mesia tsela. Le gone, modimo wa setšhaba se se rileng o diragalelwa ke sengwe le sengwe se se diragalelang batho ba one. Fa setšhaba se fenngwa, modimo wa sone le one o a fenngwa. Ga go a nna jalo ka Jehofa.

Kgolagano e Jehofa a neng a e dira le Aborahame—e e neng ya simolola go dira makgolo a le mantsi a dingwaga pele ga motlha wa Bokeresete—e ne e solofetsa batho ba ditšhaba tsotlhe masego, go bontsha kafa Modimo a kgatlhegelang batho botlhe ka gone. (Genesise 12:1-3; Ditiro 10:34, 35; 11:18) Kgosi ya Iseraele e bong Dafide, o ne a bontsha jaana gore Jehofa o ne a sa rua naga ya Iseraele fela: “Lefatshe ke la ga Jehofa le se se le tladitseng, naga e e ungwang le ba ba nnang mo go yone.”—Pesalema 24:1.

Moragonyana, fa morwa Dafide e bong Solomone a neela tempele ya kobamelo mo go Jehofa, o ne a bontsha gore go ne go na le tsela nngwe e batho ba ba ikokobeditseng ba ditšhaba tse dingwe ba neng ba ka atamela Jehofa ka yone. Solomone o ne a bolela jaana mo thapelong ya gagwe ya go neela tempele: “Gape le motswakwa, yo e seng mongwe wa batho ba gago ba Iseraele yo o tswang kwa lefatsheng le le kgakala . . . a rapela mo ntlong eno, e kete o ka reetsa o le kwa magodimong, kwa lefelong la gago le le tlhomameng la bonno, mme o dire go ya ka sotlhe se motswakwa a se go biletsang; gore ditšhaba tsotlhe tsa lefatshe di tle di itse leina la gago gore di go boife fela jaaka batho ba gago Iseraele ba dira.”—1 Dikgosi 8:41-43.

Iseraele e a Ganwa

Porofesa C. J. Labuschagne o ne a kwala jaana malebana le botsalano jo Iseraele e neng e na le jone le Jehofa: “Go ralala hisitori, Baiseraele ba ne ba bona gangwe le gape gore Modimo wa setšhaba sa bone o ne a ka dira dilo go bontsha gore ga a ba amogele le gore ka dinako tse dingwe a ka ba tlhanogela.” Mo lekgolong la ntlha la dingwaga fa Iseraele e gana Mesia, Jehofa o ne a latlha setšhaba seno.

Le fa go ntse jalo, leina la ga Jehofa le ne le tshwanetse go tswelela pele le dirisiwa ke Bakeresete. Jaaka fa phuthego ya Bokeresete e ne e ntse e gola, maloko a yone a ne a simolola go akaretsa le batho ba ditšhaba tsotlhe. Ka nako ya fa morutwa wa Mojuda e bong Jakobe a okametse kopano nngwe ya Bokeresete kwa Jerusalema, o ne a bolela gore Modimo o ne a ‘lebisa tlhokomelo ya gagwe kwa ditšhabeng [tse e seng tsa Bajuda] gore a ntshe batho ba leina la gagwe mo go tsone.’ Jaaka bosupi jwa gore kgang eno e ne e boleletswe pele, Jakobe o ne a nopola boporofeti bongwe mo bukeng ya ga Amose e leina la ga Jehofa le tlhagang mo go yone.—Ditiro 15:2, 12-18; Amose 9:11, 12.

O Amega ka Botlhe, O Segofatsa Botlhe

Paulo o ne a kwala jaana fa a tswelela pele go tlhomamisa kafa Jehofa e leng Modimo wa lobopo lotlhe ka gone: “Ga go na pharologanyo fa gare ga Mojuda le Mogerika, gonne go na le Morena a le mongwe fela mo go botlhe, yo o humetseng botlhe ba ba mmitsang.” (Baroma 10:12) Ebu, batho botlhe ba ba kutlo ba ka segofadiwa ke Jehofa.

Jehofa o solofetsa bana botlhe ba gagwe ba ba ikanyegang le ba ba kutlo isagwe e e molemolemo—le fa e ka tswa e le ba setšhaba kana lotso lofe. Lefoko la gagwe le tlhalosa batho bano e le “dilo tse di eletsegang tsa ditšhaba tsotlhe.” (Hagai 2:7) Batho bano ba simolola go itse Jehofa le go mo rata. Buka ya bofelo ya Baebele e bolela jaana ka bone: “Ditšhaba tsotlhe di tla tla di obama fa pele ga gago [Jehofa], ka gonne ditaelo tsa gago tse di siameng di bonaditswe.”—Tshenolo 15:4.

[Setshwantsho mo go tsebe 28]

Moshe a tshwere Melao e e Lesome