Kgaolo e e Tlhomologileng ya Dithunya

TSHAMEKA

Kgaolo e e Tlhomologileng ya Dithunya

KA MOKWADI WA TSOGANG! MO AFRIKA BORWA

FA MOITHUTADIJALO wa lekgolo la bo18 la dingwaga Carol Linnaeus a sena go rulaganya dithunya tsa Afrika, o ne a tlhalosa lefelo le di tswang kwa go lone a re ke “paradaise ele e e mo lefatsheng, Cape of Good Hope, e Mmopi yo o Molemo a e kgabisitseng ka dikgakgamatso tsa Gagwe tse dintlentle.”

Dikgakgamatso tseno tse go tweng di dintlentle di fitlhelwa mo lefelong le le kwa borwa mo ntlheng ya Afrika. Ba-Dutch ba ba neng ba fudugetse moo ba ne ba bitsa dimela tse dintsi tse di neng di le mo lefelong leo ba re fijnbosch, mo go rayang “ditlhatshana tse ditshesane” kgotsa “sekgwa se se sesane.” E re ka lefoko fijn le raya “potlana,” seno gongwe se ne se raya matlhare le dijalo tse dinnye mmogo le ditlhare tse ditshesane tse di neng di gola mo lefelong leo. Fa nako e ntse e tsamaya, lefoko fijnbosch le ne la fetoga la nna “fynbos.” Matlhare a a golang mo Fynbos a ka tswa a le mannye e bile a le thata, mme dithunya tsa teng ga di tshwane ka bogolo, ka mebala le dipopego tsa tsone tse dintle.

Kgaolo ya Fynbos e mo lefelong le le nang le dithunya tse di farologaneng le tse dingwe mo lefatsheng—kgaolo ya Cape Floral. * Le fa lefelo leno le se legolo thata, le na le dimela tsa mefutafuta—buka nngwe e bolela gore di feta 8 550—mme peditharong ya tsone ga di fitlhelwe gope gape mo lefatsheng.

Mo Table Mountain fela, go fitlhetswe mefuta e le 1 470 ya dimela! Lokwalopaka lwa New Scientist lo akgela jaana: “Tseno di feta tse di fitlhelwang mo Ditlhaketlhakeng tsotlhe tsa Boritane.” Le fa go ntse jalo, dithunya tsa Fynbos di tlhotlheleditse dikarolo tse dingwe tsa lefatshe. Jang?

Mefutafuta e e Gakgamatsang

Fa o ka tswa o na le mofuta wa semela se se bidiwang geranium fa fensetereng ya gago, go raya gore o ka tswa o tlhokometse ngwana wa semela se se tswang kwa Fynbos. Mo mefuteng e le 250 e e itlhogelang fela mo lefatsheng, di feta peditharong tsa tsone di fitlhelwa mo kgaolong ya Fynbos.

Mo godimo ga moo, nngwetharong ya dithunya di le 1 800 tsa mofuta wa Iridaceae di gola teng fano, go akaretsa le dithunya tsa gladioli di feta 72 tse di sa fitlhelweng mo lefelong lepe le lengwe mo lefatsheng. Mo nkong ya borwa jwa Afrika go na le mefuta e le 1 646 ya dithunya tsa teisi le di-vygie. * Tseno di akaretsa dithunya tsa everlasting, tse di nnang di thuntse bontle lobaka lo loleele e bile di feditse dingwaga di le dintsi di dirisiwa mo go kgabiseng ka dithunya tse di omisitsweng.

Le fa go ntse jalo, karolo e e tlhomologileng thata ya kgaolo ya Fynbos ke semela se se ntshang dithunya se se bidiwang erica, kgotsa heath. O tla gakgamadiwa ke gore kgaolo ya Fynbos e na le mefuta e le 625 ya erica, go tswa mo palogotlheng ya tse 740 tse di leng teng mo lefatsheng lotlhe!

Sethunya sa Sugar-Bush le Nonyane ya Sugarbird

Linnaeus o ne a tlhatlhoba setlhopha sengwe sa dithunya tsa mo Fynbos tse di neng di na le dipopego tse di farologaneng tse di sa tlwaelegang. O ne a di bitsa Protea (sengwe sa mofuta wa Proteaceae), a di reelela ka modimo wa Bagerika Proteus, yo go neng go dumelwa gore o ne a kgona go iphetolela mo mebeleng e e farologaneng. Mefuta e le 328 e e farologaneng ya dithunya tsa protea e tswa mo kgaolong ya Fynbos. A bo go le monate jang ne go palama dithaba tsa kwa Kapa le go bona protea e kgolo go di feta tsotlhe! Sethunya sa yone se sentlentle ka dinako tse dingwe se feta sefatlhego sa motho!

Protea e nngwe e e tlwaelegileng ke sugar-bush. Dithunya tsa setlhare seno di bopegile jaaka dikopi, mme di na le tswina e ntsi ya dinotshe. Batho ba ba neng ba fudugela mo lefelong leno mo nakong ya bogologolo ba ne ba na le go kgotlhokgotsha dithunya tsa teng mo godimo ga sejana gore ba tsenye tswina mo teng, mme moragonyana ba e bedisa gore e nne kgotlhaomone.

Nonyane e e bidiwang sugarbird kwa Kapa, e leng setshedi se se fitlhelwang fela mo kgaolong ya Fynbos, le yone e rata tswina ya di-protea. Sugarbird e gopa tswina e e mo semeleng seno ka molomo wa yone o moleele le loleme lwa yone lo loleele mme go tswa foo e direla semela seo molemo mongwe ka go isa mmudula wa sone kwa dithunyeng tse di farologaneng, e e leng tsela ya go di atisa. Mo godimo ga moo, sugarbird e ja ditshenekegi tse di ngokwang ke dithunya tse dikgolo. Ka jalo, nonyane le sethunya di a tlhokana gore di kgone go tshela.

Ditirisano Tse Dingwe Tse di Botlhokwa Thata

Dithunya dingwe tsa protea di golela gaufi thata le mmu, di iphitlhile kafa tlase ga dimela tse dingwe. Dipeba di okiwa ke monko o e keteng wa letlhabego o o nkgang mo dithunyeng tseno tsa protea. Dipeba tseno di tsenya ditlhogo tsa tsone mo dithunyeng, di nwa tswina ya tsone di bo di ya kwa dithunyeng tse dingwe tsa protea di tshotse mmudula o o ngaparetseng mo difatlhegong tsa tsone tse di tletseng boboa. Ka jalo dipeba le dithunya tsa protea di a dirisana gore di kgone go tshela.

Dithunya tsa erica le nonyane ya sunbird e e mmala o o galotseng wa namune mo sehubeng, e e fitlhelwang fela mo kgaolong ya Fynbos, le tsone di dirisana ka tsela e e ntseng jalo le sethunya seno. Ka gonne di bopegile jaaka ditšhupu tse di kobegileng, di siametse molomo wa nonyane ya sunbird. Fa sunbird e tsenya molomo wa yone mo tswineng eo gore e gope tswina, tlhogo ya yone e ngaparelwa ke mmudula. Ngwaga yotlhe dithunya tsa erica tse di thuntseng di naya dinonyane tsa sunbird se di se tlhokang, mme dijalo tsone di solegelwa molemo fa dinonyane di tlisa mmudula. A bo go le monate jang ne go tsamaya fa thoko ga thaba le go bona tirisanommogo eno e e gakgamatsang!

Dibopiwa tse dingwe tse dintsi tse di tshelang di botlhokwa thata mo kgaolong ya Fynbos. Ka sekai, serurubele se se bidiwang Table Mountain beauty ke sone fela se se tlisetsang mefuta e le 15 ya dithunya tse dikhibidu mmudula. Sengwe sa dithunya tseno ke disa e e itsegeng thata, e e kgabisitseng Table Mountain.

Go tswa foo go na le dipeba tse di jang medi ya dijalo tsa mofuta wa orchid, lily le iris. Dipeba tsa Kapa tse di jang medi, di tsaya manathwana a digwere di a tsenya mo mesimeng ya tsone. Manathwana a mangwe a medi a wela mo tseleng kgotsa a tlogelwa a sa jewa mo mosimeng, mme gantsi a mela medi a bo a gola.

Dimela di le makgolokgolo tsa kwa Fynbos di na le dithapo tse di nang le matute a a mafura a a nang le monko o ditshoswane di o ratang thata. Fa ditshoswane di sena go tshwara “matshwaronyana” ano, di gogela dithapo kafa tlase ga lefatshe. Morago ga moo, ditshoswane di ja mafura a dithapo tseno mme e seng dithapo tse di thata ka botsone. Ka tsela eo, dithapo tse di kafa tlase ga mmu, fa di sa jewe ke dinonyane le dipeba, di kgona go mela gape moragonyana.

Gape go na le dintsi tse di nang le selopo se setelele se se tswang mo molomong wa tsone. Dintsi tseno di tlisetsa dimela tsa Fynbos tse di nang le dithunya tse ditelele tse e keteng ditšhupu mmudula. Ntsi e le nngwe e na le selopo se se disentimetara di le robedi ka boleele. Eleruri, tirisanommogo e e ntseng jalo e botlhokwa gore kgaolo ya Fynbos e kgone go tswelela e le teng!

Tirisano e e Kotsi

Mo bukeng ya An Introduction to Fynbos, moithutatikologo e bong T. F. J. van Rensburg, o bolela gore “go utlwisa botlhoko gore motho yo o beilweng gore a tlhokomele Popo, gantsi ke ene a senyang mafelo mangwe a yone a tlholego.” Eleruri, go dirilwe tshenyo e kgolo ka nako e khutshwane tota, jaaka Dr. Piet van Wyk a tlhalosa: “Mo dingwageng tse di ka nnang 300 fa e sa le naga eo e simolola go busiwa ke batswakwa, naga ya fynbos e kgaogantswe e bile e fetotswe ke motho mo e leng gore go setse fela diperesente di le 31 tsa naga ya fynbos. Mefuta e le 39 ya dithunya tsa fynbos e fedile, mme e le 1 033 yone ga e tlhole e le mo kotsing fela mme e bonwa sewelo fela thata.”

Ditiro tsa motho gape di senya tirisanommogo e e fa gare ga diphologolo tsa kwa Fynbos le dijalo tsa teng. Buka ya Table Mountain—A Natural Wonder e bolela jaana: “Baithutatikologo ke gone ba simololang go tlhaloganya tirisanommogo e e leng teng e e raraaneng fa gare ga diphologolo le dithunya tsa fynbos. Fa semela se sa tlhole se le teng, a tshenekegi e e se tlisetsang mmudula (sekeketi, serurubele kgotsa khukhwane) le yone e tla fela?” Mme go tweng ka dinonyane tsa kwa Fynbos? Go ya ka moithutatshelo wa Afrika Borwa C. J. Skead, botshelo jwa dinonyane tse di bidiwang sugarbird bo mo kotsing ka ntlha ya “go dirisana ga tsone le mefuta ya dithunya tsa Protea.”

Dipego tse di ntseng jalo ka ga kgaolo ya Fynbos di a tshwenya. Le fa go ntse jalo, ba ba dumelang mo “Mmoping yo o Molemo” jaaka Linnaeus, ba na le lebaka la go nna le tsholofelo. Gonne motho o ka tshepa gore lefatshe le tla nna lentle e bile le tla nna le dithunya go feta le fa e le leng pele fa Jehofa Modimo a diragatsa tsholofetso ya gagwe ya go “dira dilo tsotlhe disha.”—Tshenolo 21:5.

[Dintlha tse di kwa tlase]

^ ser. 5 Lefatshe le kgaogantswe ka dikgaolo tse thataro tsa dithunya. Dikgaolo tseno di farologanngwa ke baithutafatshe ka mefuta e e tlhomologileng ya dimela e e golang mo go tsone. Lefelo le le gaufi le Kapa ya Afrika Borwa ke lengwe la dikgaolo tseno.

^ ser. 9 Diteisi ke mofuta wa dithunya tsa Asteraceae, mme di-vygie ke leina le le dirisiwang mo lefelong leno le le rayang mesems, tsa mofuta wa Mesembryanthemum.

[Dimmapa mo go tsebe 16]

(Go bona mokwalo o o feletseng, leba kgatiso)

Kgaolo ya Fynbos (mo go tshasitsweng botala)

Table Mountain