Kokolofutwe—Nonyane e e Buiwang Bosula

KA MOKWADI WA TSOGANG! KWA KENYA

 “Ga ke ise ke tsamaye ke bone nonyane epe e e nang le botlhodi go feta kokolofutwe.”—The World’s Wild Places—Africa’s Rift Valley.

MO DINONYANENG tse dintsintsi tse di fitlhelwang mo Afrika, ke di sekae fela tse di ileng tsa buiwa bosula jaaka kokolofutwe. Gantsi nonyane eno e lejwa e le letshwenyo, e le maswe e bile e se molemo ka gope. Go phepafetse gore kokolofutwe ga e ratwe ke batho.

A o kgatlhwa ke dinonyane tse dintle tse di nang le molodi o o monate? Kokolofutwe yone ga e na ditebego tse dintle e bile ga e na molodi o o monate. E re ka e na le tlhogo e pinki le molala o o se nang mafofa, e lebega e hutsafetse e bile e sotlegile. Tse di godileng di na le kgetsana e khibitswana e e kgonang go budologa e e lebegang e kete ke thae e kima e e lepeletseng mo molaleng. Batho ba le bantsi ba akanya gore kgetsana eno e dira gore setshedi seno se nne maswe le go feta. Le fa go ntse jalo, Dr. Leon Benun, mookamedi wa Lephata la Thutodinonyane la National Museums kwa Kenya, o re gakolola jaana: “Lebaka fela la gore re bona kgetsana eno e le maswe ga le bolele gore le kokolofutwe e bona e le maswe.” Le fa go ntse jalo, go tla go fitlha jaanong, ga go na ope yo o itseng tiro ya kgetsana eno.

Mokgwa o nonyane eno e jang ka one le one o dira gore babogedi ba yone ba se ka ba e rata. Lebaka ke gore e ja nama e e bodileng. Go bolelwa gore fa e sa kgone go bona ditoto, e bolaya dinonyane tse dingwe gore e di je. Ga go gakgamatse go bo batho ba le bantsi ba e ila lekongkong.

Mme gone, le fa kokolofutwe e na le tebego le mekgwa e e sa kgatlheng, e na le dinonofo di le mmalwa tse di rategang. Mma re ithute nonyane e e buiwang maswe eno botoka.

Mokaloba wa Dinonyane Tse Dingwe

Ga go na pelaelo gore kokolofutwe ke nonyane e kgolo go gaisa tsotlhe tsa losika lwa dinonyane tsa mogolodi. Fa e tonanyana e godile sentle, e ka golela kwa godimo ka disentimetara di le 150 mme ya feta dikilogerama di le robedi ka bokete. Tse di namagadi tsone di dinnye go sekae. Molomo o o boima wa nonyane eno wa sebopego sa khutlotharo o ka kgona go gola go nna boleele jwa disentimetara di feta 30—o thusa nonyane eno thata fa e natha nama mo setotong sa phologolo.

Le fa nonyane eno ya losika lwa mogolodi e le kgolo jaana, e kgona go fofa ka tsela e e manontlhotlho. Ka diphuka tsa yone tse di boleele jwa dimetara di le pedi le sephatlo fa di tsharolotswe, kokolofutwe e kgona go fofa sentle fela jaaka dinonyane tse dingwe tse le tsone di fofang ka tsela e e manontlhotlho. E ntle tota fa e fofa, tlhogo ya yone e gonyela go sekae mo magetleng mme maoto a yone a maleele a bo a phuthologela kwa morago ga mmele. E dirisa diphefo tse di mogote ka botswerere fa e fofa, e bile e kgona go fofela kwa godimo thata mo e leng gore ka dinako tse dingwe e batla e sa bonale go tswa fa fatshe! Aitsane, bokokolofutwe ba bonwe ba fofela kwa godimo go fitlha go dimetara di le 4 000!

Batsadi ba ba Nang le Boikarabelo

Le fa go ntse jalo, se se kgatlhang thata ke tiro e kokolofutwe e e dirang  jaaka motsadi. Eleruri, go nna motsadi ke tiro e e boima tota e e simololang ka go aga sentlhaga. Fa e tonanyana e sena go bona lefelo le le tshwanetseng, e simolola ka tiro ya go aga, e le gore e tla thusiwa ke e namagadi moragonyana. Sentlhaga sa yone, se ka dinako tse dingwe se nnang dimetara di le 40 go tswa fa fatshe, ga se sentle go le kalo. Sentlhaga seno se se boatlhamo jwa metara o le mongwe ke lefelo fela le le bulegileng le le dirilweng ka dithupana tse di omeletseng tse di seng borethe, dikala tsa ditlhare le matlhare. Tota e bile, ka dinako tse dingwe nonyane e e beelang mae e dirisa sentlhaga sa bogologolo e bo e se tlhabolola fela ka go se tsenya dithupana le dilo tse dingwe. Masika mangwe a bokokolofutwe a dirisa sentlhaga se le sengwe dingwaga di le 50.

Fa kokolofutwe e tonanyana e ntse e aga sentlhaga se sesha, e simolola go ipatlela molekane. Go farologana le tsela e mefuta e mengwe ya dinonyane e tlwaetseng go dira ka yone, e tonanyana e emela gore e namagadi e e fereye. Go tla di le mmalwa kwa go yone nngwe le nngwe ka tsholofelo ya gore e tla amogelwa ke e tonanyana. Bontsi jwa tsone di a ganwa. Mme e e itshokang ke yone e labofelo e tla amogelwang. Ka nako ya fa di ratana, dinonyane tseno ka bobedi di budulosa dikgetsana tsa tsone tse di mo molaleng di bo di dira modumo wa go leleka tse dingwe gore di se ka tsa atamela. Medumo eno e ile ya tlhalosiwa jaaka e e tshwanang le ya go lela ga kgomo, selelo sa khutsafalo le melodi—e leng yone fela medumo e go itsiweng e lediwa ke bokokolofutwe, kwantle ga e ba e dirang fa ba itaaganya melomo ya bone e megolo. Lorato lwa tsone lo a gola e bile lo nonotshiwa ke tumediso e di e ratang thata ya go ya “kwa godimo le kwa tlase” fa e nngwe ya tsone e e ntseng e seyo mo sentlhageng e goroga. Di dira seno ka go isa tlhogo kwa morago di bo di e isa kwa tlase mme morago ga moo di bo di itaaganya melomo ya tsone ka lobakanyana.

Bobedi jono bo feleletsa go aga sentlhaga mmogo. Bobedi jwa tsone gape bo tla refosana go elama mae. Fa di sena go a elama ka sebaka sa kgwedi, mae a le mabedi kgotsa a le mararo a masweunyana a tla thuthuga mme go tswe mamphorwana a a pinki a a tla kgatlhang batsadi ba one thata a a nang le mafofanyana. Bokokolofutwe ba bannye bano ba tlhokomelwa fela thata. Ba tla simolola go fepiwa thata ka dijo tse di nang le dikotla tse dintsi, tse di jaaka tlhapi. Bokokolofutwe ba rata go ya thata kwa go leng ditsobotla, mme batsadi ba kgona go tshwara digogwane tse dintsi teng, e leng dingwe tsa dijo tse ba di ratang thata. Mamphorwana a kgona go ja ka go kokoanya manathwana a dijo tse batsadi ba one ba a kgwelang mo sentlhageng. Mamphorwana ano a gola ka bonya, mme a kgona go iphataphatela fela fa a setse a na le dikgwedi di le nnè, ka e a bo e le gone a kgonang go fofa le go tswa mo sentlhageng.

 Badiri ba ba Phepafatsang

Le fa kokolofutwe gantsi a nyadiwa ka gore ke nonyane e e jang nama e e bodileng, totatota o dira tiro e e molemo thata. Diphologolo tse di jang nama di tlogela ditoto tse di bolang di lalaane mo mabaleng a Afrika. Fa ditoto tseno di ne di ka tlogelwa fela jaana, di ne di tla anamisa malwetse motlhofo fela le go nna kotsi mo bathong le mo diphologolong. Le fa go ntse jalo, kokolofutwe e dira tiro e e mosola ya go tlosa leswe. Yone mmogo le manong—a le one e leng dinonyane tse di jang nama—di tsamaya mo mabaleng di batlana le ditoto tsa diphologolo tse di bolailweng. Fa ba e bona, bokokolofutwe ba letela manong a a bogale thata gore a bule setoto ka melomo ya one e e kgopameng e e thata. Fa sebaka se tlhaga, kokolofutwe e tla tabogela ka bonako kwa setotong go ya go natha nama ka molomo wa yone o motelele e o dirisa jaaka thipa ya go ara e bo e boela ka bonako gape kwa e neng e le teng go letela sebaka se sengwe gape. Fa manong a setse a kgotse, ke nako ya gore bokokolofutwe ba lwele namanyana lefa e le efe fela e e setseng. Bokokolofutwe ba ja sengwe le sengwe fela se se kgonang go feta mo mometsong, kwantle ga marapo. Ba kometsa manathwana a nama a boima jwa digerama di le 600 motlhofo fela.

Mo dingwageng tsa bosheng jaana, kokolofutwe ga e tlhole e phepafatsa kwa nageng fela. Nonyane eno ga e tlhole e boifa batho mme gangwe le gape e tla mo dithotobolong tsa matlakala mo ditoropong le mo metseng. Diphelelo tsa seno ke eng? Tikologo e e phepa. Kokolofutwe e gobua le mo metsing a a leswe a a tswang mo diselageng e batla manathwana ape fela a a setseng a nama. Sekai se se latelang se bontsha kafa nonyane eno e kgonang go itshoka ka gone. Fa e ntse e fatafata gaufi le selaga kwa bophirima jwa Kenya e batla manathwana a a setseng a nama, nonyane eno e ne ya kometsa thipa ya kwa selageng. Malatsi a le mmalwa moragonyana, thipa eno—e le phepa e bile e phatsima—e ne ya fitlhelwa gaufi le fa e komeditsweng teng, fa kokolofutwe e e neng e e kgwile yone e ntse e tsweletse ka tiro ya yone ya letsatsi le letsatsi, e sa gobala ka gope!

Isagwe ya Kokolofutwe

Kokolofutwe ya mo Afrika e sa ntse e le ntsi tota mme nonyane ya kwa Asia ya mogolodi e e leng mokaloba yo mogolo, e e gaufi thata le kokolofutwe ka losika, yone e ntse e ngotlega. Ga go itsiwe e na le baba mo nageng e e tshelang mo go yone. Mo dinakong tse di fetileng, motho e ne e le ene mmaba yo o setlhogo thata wa kokolofutwe. Nonyane e kgolo eno ya losika lwa mogolodi e ne e thuntshiwa mme mafofa a yone a a boleta a a kafa morago a ne a tlhobiwa go bo go kgabisiwa dihutshe tsa basadi ka one. Buka ya Storks, Ibises and Spoonbills of the World e bolela jaana: “Ga go motlhofo go dumela gore mafofa a a ntseng jalo a a boleta a mantle, fa a kgabisitse fene kgotsa selo sengwe se mosadi a se ratang thata, a tswa mo nonyaneng eno e kgolo, e e bopameng e e jang leswe e e nang le ditebego tse di sa rategeng.” Ka lesego, go bolawa setlhogo ga dinonyane tseno go ile ga fokotsega fa dingwaga di ntse di kgabaganya, mme palo ya tsone e a oketsega gape. Ga go na pelaelo gore go ithuta ka nonyane eno ya kokolofutwe go bontshitse gore ruri ga e a tshwanela go nyadiwa le go buiwa bosula. Re solegelwa molemo thata ke bokgoni jwa yone le bonatla jwa yone jwa go phepafatsa tikologo. Le fa e se nonyane e ntle go le kalo, e galaletsa Mmopi wa yone e ntse e le nonyane ya maemo a a kwa tlase jalo.—Pesalema 148:7, 10.

[Setshwantsho mo go tsebe 26]

Molomo o o boima wa nonyane eno o o sebopego sa khutlotharo o ka kgona go gola go nna boleele jwa disentimetara di feta 25

[Setshwantsho mo go tsebe 26, 27]

Kokolofutwe e na le diphuka tse bobedi jwa tsone di leng boleele jwa dimetara di le 2,5

[Motswedi wa Setshwantsho]

© Joe McDonald

[Setshwantsho mo go tsebe 27]

Bokokolofutwe ba bannye ba tlhokomelwa fela thata

[Motswedi wa Setshwantsho]

© M.P. Kahl/VIREO

[Setshwantsho mo go tsebe 28]

Tiro ya kgetsana ya kokolofutwe ga e ise e itsiwe

[Setshwantsho mo go tsebe 29]

Ka dinako tse dingwe, sentlhaga se nna dimetara di le 30 go tswa fa fatshe