Malwetse a a Tshelanwang—A Kotsi Mme a ka Thibelwa

le fa dithoromo tse di boitshegang tsa lefatshe le merwalela e e kotsi di begwa e le dikgangkgolo mo metsweding ya dikgang, ke ka sewelo fela metswedi ya dikgang e begang ka malwetse a a tshelanwang a a anamang ka tidimalo e le kgangkgolo. Le fa go ntse jalo, “palo ya batho ba ba bolailweng ke malwetse a a tshelanwang (a a jaaka AIDS, malaria, malwetse a go hema le letshololo) e feta ya ba ba bolailweng ke dikudumedi tsa tlholego mo ngwageng o o fetileng go menagane ga 160,” go bolela jalo lekwalodikgang la Red Cross/Red Crescent la June 2000. “Mme boemo bo ntse bo nnela maswe go ya pele.”

Go na le dilo di le pedi tsa konokono tse go tweng di baka palo e e tshosang eno. Sengwe sa tsone ke go anama mo go sa fokotsegeng ga AIDS, e e bolayang batho ba le 300 ura nngwe le nngwe. Peter Walker e bong mokaedi wa thulaganyo ya masetlapelo ya International Federation of Red Cross and Red Crescent Societies o bolela gore AIDS “ga e tlhole e le bolwetse, ke masetlapelo. Bolwetse jo bo anameng jaaka jo, bo bolaya babereki e bile bo senya le ikonomi.” Selo se sengwe ke go senyega ga tsamaiso ya tsa kalafi, mo go felelang ka go boa ga malwetse a bogologolo a a jaaka thiibi, thosola le malaria. Ka sekai, gone jaanong naga nngwe ya kwa Asia e nna le batho ba bangwe ba le 40 000 ngwaga le ngwaga ba ba tshwarwang ke bolwetse jwa thiibi. Kwa nageng nngwe ya kwa Yuropa Botlhaba, batho ba ba tsenwang ke bolwetse jwa thosola ba ile ba oketsega go menagane ga 40 mo dingwageng di le lesome tse di fetileng.

Le fa go ntse jalo, selo se se gakgamatsang ke gore le fa malwetse a a tshelanwang a fetogile masetlapelo, ke mangwe a masetlapelo a a ka kgonang go thibelwa. Tota e bile, pego e bontsha gore bontsi jwa dintsho tsa batho ba le dimilione di le 13 ba ba bolailweng ke malwetse a a tshelanwang ka 1999 “di ka bo di thibetswe ka go dirisa US$ 5 [R40] mo mothong mongwe le mongwe.” Fa dipuso tsa lefatshe di ka bo di iketleeleditse go dirisa R40 mo mothong mongwe le mongwe go mo tlhokomela ka tsa kalafi—palogotlhe ya diranta di le dimilione di le dikete tse 230—akanya fela gore go ne go ka thibelwa dintsho tse dintsi jang ne tse di sa tlhokegeng!

Le mororo e le madi a mantsi tota, ga se sepe fa a bapisiwa le madi a lefatshe le a dirisang mo ditirelong tse dingwe. Ka sekai, ngwaga mongwe bosheng jaana, madi a a dirisitsweng mo sesoleng mo lefatsheng lotlhe a ile a fitlha go diranta di le dibilione di le supa—R1 120 motho mongwe le mongwe. A ko o akanye fela gore go senngwa madi a mantsi go le kana kang go baakanyediwa ntwa go feta a a dirisiwang go thibela go anama ga malwetse! Gongwe batho ga ba kgone go thibela go anama ga malwetse—e se ka ntlha ya go bo madi a tlhaela, mme e le ka ntlha ya mabaka mangwe a a boteng. Tota e bile, dipuso tsa batho ga di kgone go bona gore ke eng se se botlhokwa se se tshwanetseng go dirwa pele.

[Metswedi ya Ditshwantsho mo go tsebe 12]

X ray: New Jersey Medical School—National Tuberculosis Center

Photo of man coughing: WHO/Thierry Falise