Dirisa Diokobatsi Tsa Kalafi ka Botlhale

KA MOKWADI WA TSOGANG! MO AFRIKA BORWA

FA NGAKA ya gago e go naya diokobatsi tsa kalafi, kwantle ga pelaelo e di go naya ka tumelo ya gore di tla go thusa, o go di naya morago ga go go tlhatlhoba, ka kitso ya bongaka le maitemogelo. Le fa go ntse jalo, molwetse ga a tshwanela go tsaya gore ngaka e ikarabelela ka mo go feletseng ka botsogo jwa gagwe. Molwetse ke ene a ikarabelelang ka se a se tsenyang mo mmeleng wa gagwe.

Fa o nwa melemo e o e neilweng ke ngaka, sekaseka dikaelo tse di mosola tse di latelang tse di ntshitsweng ke ngaka ya kalafi:

● Diokobatsi tsotlhe di na le mo di se kitlang di tshwara motho sentle gone. O na le tshwanelo ya go itse gore o newa molemo ofe le gore o ka nna wa nna le ditlamorago dife tse di sa siamang. Fa ngaka ya gago e sa go neye tshedimosetso eno, o se ka wa tshaba go botsa. Gantsi o tla solegelwa molemo ke go nwa melemo eo go feta go nna le ditlamorago tse di sa siamang. Mme o tshwanetse go bolelelwa gore o tle o dire tshwetso e e botlhale.

● Diokobatsi di ama motho mongwe le mongwe ka tsela e e farologaneng. Ngaka ya gago e ka se kgone go itse sentle tota gore seokobatsi se se rileng se tla go tshwara jang. Fa o tshosiwa ke go bona ditlamorago tse di sa siamang tse o neng o sa di lebelela, ikgolaganye le ngaka ya gago.

● Botsa gore o tla tshwanela go dirisa molemo oo ka lobaka lo lo kana kang. Gape o batlisise gore a o ka go tshwakgola.

● O tlhokomele gore o se ka wa emisa go nwa molemo ka bowena fela, gongwe e le ka gonne o ikutlwa o le botoka. Go tlogela go nwa molemo ka bonako go ka nna ga gakatsa boemo jwa gago. Go na le moo, botsa ngaka ya gago pele.

● Ka metlha o dirise melemo e o e neilweng ke ngaka o kaelwa ke yone.