Leina la Modimo le Tsosa Kganetsano

KA MOKWADI WA TSOGANG! KWA NETHERLANDS

BARANODI ba Baebele e ntšha ya Se-Dutch ba ne ba tsosa kganetsano mo gare ga bakanoki ba Baebele le batho fela ka go tshwana. E ne e bakwa ke eng? E ne e le ka ntlha ya tshwetso ya bone ya go ranola leina la Modimo ka lefoko Heer, kgotsa Morena.

Ka December 1998, dibeke di sekae fela morago ga gore baranodi ba golole Baebele ya bone ya ntlha, setlhopha sa basadi ba Kerk en Wereld (Kereke le Lefatshe), e leng mokgatlho mongwe wa Porotesetanta, se ne sa bolotsa letsholo la go ngongorega se dirisa lokwalodikgang. Lebaka e ne e le eng? Ba ne ba leba lefoko “Morena” e le “la bonna thata.” Go ise go ye kae, ditlhopha tse dingwe—tsa Bakatoliki le Baporotesetanta—di ne tsa kopanela mo letsholong leno la go ngongorega. Ka February 1999, bakanoki bangwe ba bararo le bone ba ne ba latlhela tlhware logonnyana ka go bolela gore ba ne ba buelela gore go adimiwe fela ditlhaka tse nnè tsa Sehebera tsa leina la Modimo gore e nne YHWH. Go ise go ye kae, bakanoki ba Baebele, baranodi le baithutabodumedi ba ne ba kopana kwa Amsterdam go tlotla ka kgang eno. Kwa morago ga dipuisano, batsayakarolo botlhe ba ne ba kopiwa gore ba boute gore ba ne ba ka rata gore le ranolwe jang.

Ka fa tlase ga setlhogo se se reng “Ke Modimo yo re Buang ka Ene, A re Se Lwantshaneng ka Leina la Gagwe,” lokwalodikgang lo lo bidiwang Nieuwsblad van het Noorden lo ne lwa bega jaana ka matswela a dibouto: “Thanolo e e reng MORENA e bona fela dibouto di le supa. Mme bontsi jwa dithanolo tse dingwe le tsone ga di a ka tsa boutelwa ke ba le bantsi go le kalo: Thanolo e e reng Leina (1), yo o Esi (3), yo o Boutlwelobotlhoko (6), Yo o Ka se Bidiweng ka Leina (7), yo o Tshelang (10) le wa Bosakhutleng (15). Mme thanolo e e neng ya boutelwa ke ba le bantsi ke . . . YHWH!” Ka March 15, 2001, Komiti e e Okamelang ya thanolo e ntšha e ne ya swetsa gore e dirise HEER (MORENA) ka ditlhaka tse dikgolo tse di ngotlilweng go emela leina la Modimo.

Kganetsano eno e gatelela ntlha ya gore le fa go sa dumalanwe ka gore go tlhophiwe thanolo efe go ranola leina la Modimo ka Se-Dutch, bakanoki ba dumela gore Modimo o na le leina. Ka Sehebera leina leno le na le ditlhaka di le nnè tsa Sehebera, e leng, יהוה, kgotsa YHWH. Dithanolo tse dingwe tsa Baebele tsa Se-Dutch tsa nako e e fetileng le gompieno, di ranotse jang YHWH?

Ka 1762 monna mongwe wa Mo-Dutch yo o bidiwang Nicolaas Goetzee o ne a gatisa thanolo ya Baebele ya Staten ya ditsebe tse di mennweng. E ne ya bolela jaana mo tsebeng ya setlhogo: “Ka ntlha ya mabaka a a utlwalang le a a itsegeng, re tlogetse gape Leina la Modimo la Segopotso JEHOFA le sa ranolwa.” Bakanoki ba bangwe ba ba itsegeng ba Ba-Dutch—ba ba tshwanang le Porofesa Nicolaas Beets le Petrus Augustus de Genestet—le bone ba ne ba dirisa leina Jehofa.

Go a kgatlha go lemoga gore Thanolo ya Lefatshe le Lesha ya Dikwalo Tse di Boitshepo * e dirisa leina Jehofa ka metlha. Mametlelelo ya Thanolo ya Lefatshe le Lesha ka Se-Dutch e bolela gore e “tswelela go dirisa sebopego ‘Jehofa’ ka gonne batho ba tlwaelane le lone ka makgolokgolo a dingwaga. Mo godimo ga moo, e boloka . . . ditlhaka tse nnè tsa leina la Modimo, YHWH.” Ka jalo Thanolo ya Lefatshe le Lesha e thusitse dimilione tsa batho go itse boammaaruri malebana le Modimo.

[Ntlha e e kwa tlase]