Motho Kgatlhanong le Tlholego

“Gompieno batho ke bone ba tshwanetseng go rwala maikarabelo a go nyelela go go ntseng go oketsega ga mefuta ya ditshedi.”—JANE GOODALL, MOLWELATSHIRELETSEGO YA TLHAGO.

GO NA le ditshedi tse di seng kana ka sepe mo lefatsheng e bile di dirisana mmogo. Rona batho re karolo e e botlhokwa ya botshelo joo. Re ikaegile ka dilo tse di tshelang tse di mo lefatsheng gore re bone dijo le melemo ya kalafi, okosejene e re e hemang le dilo tse di agang mebele ya rona. Letsatsi lengwe le lengwe, batho mo lefatsheng ba dirisa mefuta e mengwe e feta 40 000 ya ditshedi. Ditshedi tsotlhe tsa lefatshe, fa di le mmogo, di bopa thulaganyo e e gakgamatsang e e raraaneng ya botshelo.

Le fa go ntse jalo, baitse ba le bantsi ba ba ithutang thulaganyo e e raraaneng eno ba dumela gore e a tlhaselwa! Gongwe o utlwile gore ditshukudu, dinkwe, di-panda le maruarua di mo kotsing ya go nyelela. Baitsesaense bangwe ba bolela gore diperesente di le 50 tsa mefuta yotlhe ya dimela le diphologolo di ka nna tsa nyelela mo lefatsheng mo dingwageng di le 75 tse di tlang. Babatlisisi ba boifa gore mefuta mengwe ya tsone e ka nna ya nyelela ka lobelo lwa makgetlo a le 10 000 go feta se baitsesaense ba se bitsang go nyelela ga tsone ka tsela ya tlholego fela. Moitse mongwe o fopholetsa gore go fela mofuta o le mongwe wa ditshedi mo metsotsong mengwe le mengwe e le 10 go ya go e le 20.

Baitsesaense ba dumela gore mo metlheng ya bogologolo, gantsi ditshedi di ne di nyelediwa ke mabaka a tlholego. Mme ba bolela gore bothata jwa gone jaanong bo bakwa ke sengwe se se farologaneng. Gompieno, go bonala go nyelela ga tsone go bakwa ke ditiro tsa batho. Moitsesaense mongwe o ne a bitsa batho a re ke “ditshedi tse di nyeletsang tse dingwe.”

A tota ditiro tsa batho ke tsone tse di bakang go nyelela go go seng kana ka sepe jaana ga ditshedi tsa mefuta e e farologaneng? Fa e le gore go ntse jalo, ba dira seo jang? A re ka kgona go tshela go se na ditshedi tsa methalethale mo lefatsheng? A go na le sengwe se se dirwang go emisa se bontsi bo akanyang gore ke bothata jwa go nyelela ga ditshedi mo lefatsheng?

[Metswedi ya Ditshwantsho mo go tsebe 19]

WHO

NOAA