Thulaganyo e e Raraaneng ya Botshelo

“Ditshedi tsa mefuta e e farologaneng ke inshorense ya rona. Botshelo jwa rona le tsela e bo tlamelwang ka yone bo ikaegile ka ditshedi tseno tse di farologaneng.”—THULAGANYO YA TIKOLOGO YA LEKGOTLA LA DITŠHABA TSE DI KOPANENG.

GO NA le ditshedi tse dintsi thata tsa mefutafuta mo lefatsheng. Polelwana “ditshedi tsa mefutafuta” e kaya mefuta yotlhe ya ditshedi tse di mo lefatsheng, go simolola ka dibakateria tse dinnye thata go fitlha ka ditlhare tse dikgolo thata tsa sequoia; go simolola ka diboko go fitlha ka bontsu.

Ditshedi tseno tsotlhe tse di farologaneng tse di mo lefatsheng di bopa thulaganyo e kgolo ya dilo tse di dirisanang mmogo e e akaretsang le dilo tse di sa tsheleng. Botshelo bo ikaegile ka dilo tse di sa tsheleng tse di jaaka atemosefere ya lefatshe, mawatle, metsi a a phepa, mafika le mebu. Setlhopha seno sa dilo tse di thusanang go tsweledisa botshelo pele se bidiwa biosphere mme batho ke karolo e e botlhokwa ya sone.

Ditshedi tsa mefutafuta di akaretsa dibakateria tsotlhe le ditshedinyana tse dinnye tse di sa kgoneng go bonwa ka matlho. Bontsi jwa tsone di itsege ka go dira ditiro tse di botlhokwa tse di thusang tikologo go dira ditiro tsa yone. Ditshedi tsa mefutafuta kgotsa thulaganyo ya botshelo gape e akaretsa dimela tse ditala tse di ntshang okosejene ka fotosentesese, tse di monyang lesedi la letsatsi di bo di le boloka e le sukiri, e e leng motswedi o o botlhokwa wa maikatlapelo a a dirisiwang ke ditshedi tse dingwe tse dintsi.

Go Nyelela ga Ditshedi Tsa Mefuta e e Farologaneng

Se se utlwisang botlhoko ke gore, le fa go na le ditshedi tse dintle tsa mefuta e e farologaneng, babatlisisi ba le bantsi ba bolela gore batho ba di nyeletsa ka lobelo lo lo tshosang. Ka ditsela dife?

▪ Go senya lefelo la tsone la bonno. Seno ke sone selo sa konokono se se nyeletsang ditshedi. Se akaretsa go rema ditlhare go di dira dikota, go dira meepo, go direla dikgomo mafulo ka go kgaola ditlhare le go aga matamo le ditsela tse dikgolo mo lefelong le pele e neng e le naga fela. Fa tikologo e ntse e ngotlega, ditshedi tse di farologaneng di felelwa ke dilo tse di tshelang ka tsone. Tikologo ya tlholego e sala e le makgaoganyane e bile e a senngwa. Ditshedi ga di tlhole di kgona go fudugela kwa mafelong a mangwe. Mefuta e e farologaneng ya tsone e a nyelela. Ditshedi tse di mo lefelong leo ga di kgone go boa di ata gape morago ga go tlhaselwa ke bolwetse le mathata a mangwe. Ke gone ka moo ditshedi tsa mefuta e e farologaneng di felang ka iketlo.

Go nyelela ga ditshedi tsa mefuta mengwe gape go ka baka go nyelela ga e mengwe, gonne fa karolo nngwe ya thulaganyo ya botshelo e senyega, tse dingwe le tsone di ka amega. Go nyelela ga ditshedi tse ditshedi tse dingwe di ikaegileng ka tsone—jaaka tse di budulang mmudula wa dithunya—go ka ama mefuta e mengwe e mentsintsi ya ditshedi.

▪ Ditshedi tse di fuduseditsweng kwa lefelong le sele. Fa batho ba fudusetsa ditshedi kwa lefelong lengwe le sele, ditshedi tseo di ka amoga tse dingwe lefelo la tsone la bonno. Gape, ditshedi tse di tswang kwa dinageng di sele di ka nna tsa  fetola tikologo eo fela thata ka tsela e e dirang gore tsa lefelo leo di tsamaye, kgotsa di ka nna tsa tla le malwetse a a tla tshwaetsang tsa lefelo leo. Segolobogolo kwa ditlhaketlhakeng tse ditshedi tsa teng di sa bolong go itshelela di le nosi fela di ise di ke di tshele le tse di tswang kwa mafelong a sele, di ka nna tsa se ka tsa kgona go tlwaela botshelo jo bosha e bile di ka nna tsa swa.

Sekai se se tlwaelegileng sa seno ke boléle jo bo “bolayang,” e leng Caulerpa taxifolia, jo bo bolayang mefuta e mengwe ya ditshedi tsa mo metsing mo Lewatleng la Mediterranean. Bo fitlhile ka phoso kwa lotshitshing lwa Monaco, mme bo setse jaanong bo simolotse go anama mo boalong jwa lewatle. Bo na le botlhole e bile jone ga bo tsongwe ke setshedi sepe. Alexandre Meinesz, e bong porofesa wa thutotshelo ya ditshedi tsa mo metsing kwa Yunibesithing ya Nice, kwa Fora, o bolela jaana: “Re ka tswa re bona tshimologo ya masetlapelo a ikholoji.”

▪ Go sa tshwarweng sentle ga tsone. Seno se dirile gore ditshedi tsa mefuta e le mmalwa di nyelele. Sekai se se tlhomologileng sa seno ke passenger pigeon. Mo masimologong a lekgolo la bo19 la dingwaga, e ne e le yone nonyane e ntsi thata kwa Amerika Bokone. E ne e re fa e fuduga—ka lesaisai la tsone di le dimilione di le sekete kgotsa go feta—e bo e fifatsa loapi malatsi a le mmalwa. Le fa go ntse jalo, kwa bokhutlong jwa lekgolo la bo19 la dingwaga, e ne e tsomilwe thata mo e neng e setse e le gaufi le go nyelela, mme ka September 1914, kwa serapeng sa diphologolo sa Cincinnati, passenger pigeon ya bofelo e e neng e setse e ne ya swa. Ka tsela e e tshwanang, nare ya Amerika ya kwa Great Plains e ne ya tsongwa thata mo e neng e setse e le gaufi le go nyelela.

▪ Go gola ga palo ya batho. Mo bogareng jwa lekgolo la bo19 la dingwaga, palo ya batho e ne e le dimilione di le sekete. Mme jaanong, morago ga lekgolo la dingwaga le halofo, mo batho ba oketsegileng ka dimilione di le dikete tse tlhano, mme ba setse ba ipotsa gore a palo ya bone e tla feta dilo tse ba tlamelwang ka tsone. Fa palo ya batho e ntse e gola ngwaga le ngwaga, ditshedi tsa mefuta e e farologaneng di nyelela ka lobelo lo lo tshosang.

▪ Matshosetsi a go gotela ga lefatshe. Go ya ka Intergovernmental Panel on Climate Change, go ka direga gore mo lekgolong leno la dingwaga, mogote o tlhatlogele godimo ka didikerii di le 3,5 tsa Celsius. Go ka direga gore ditshedi dingwe di se ka tsa kgona go tshela fa mogote o sena go tlhatloga ka bofefo jalo. Go ya ka babatlisisi, go bonala e kete selo sengwe se se dirang gore di-coral reef di swe (tsone tse bontsi jwa ditshedi tsa mefutafuta tsa mo metsing di ikaegileng ka tsone) ke go thuthafala ga metsi.

Baitsesaense ba re go tlhatloga ga bogodimo jwa lewatle ka metara e le nngwe fela go ka senya mafelo a a bongola a lefatshe a a leng mo dintshing tsa mawatle, e leng lefelo le le tletseng ka ditshedi tsa mefutafuta. Bangwe ba dumela gore go gotela ga lefatshe go ka tswa go ama aese e e kwa Greenland le Antarctic. Fa aese eno e ka gakologa, tikologo ya teng e tla tlelwa ke masetlapelo.

Leroborobo la go Nyelela ga Ditshedi

Mefuta ya ditshedi e nyelela ka lobelo lo lo kana kang? Potso eno ga e na dikarabo tse di tlhomameng. Baitsesaense ga ba ise ba itse bontsi jwa ditshedi tse di nyelelang. Sa ntlha, ba tshwanetse go tlhotlhomisa gore go na le mefuta e le kae ya ditshedi. Go ya ka John Harte, e bong moitsesaense wa ikholoji kwa Yunibesithing ya California, kwa Berkeley, “go na le mefuta ya ditshedi e ka nna milione le halofo e e nang le maina mo lefatsheng, mme re a itse gore go na le mefuta e le mentsi ya tse go sa itsiweng maina a  tsone, mme palogotlhe ya yone e ka tswa e le fa gare ga dimilione di le 5 le di le 15.” Bangwe ba fopholetsa palo e e kwa godimo ya mefuta e le dimilione di le 50 kgotsa go feta. Go ya ka moitsesaense e bong Anthony C. Janetos, go bonala go sa kgonege go bona palo ya mmatota ya tsone ka gonne “ditshedi tse dintsi tsa mefuta eo di tla nyelela pele di newa maina le go tlhalosiwa.”

Saense ya segompieno ga e ise e simolole go tlhaloganya ka botlalo thulaganyo e e raraaneng ya ikholoji e e dirang gore botshelo mo tikologong bo tswelele pele fela ka thelelo. Fa e le gore batho ga ba itse gore go na le mefuta e le kae ya ditshedi, ba tla tlhaloganya jang thulaganyo e e raraaneng ya botshelo le gore e amiwa jang ke go nyelela ga tsone? Ba tla itse jang gore go nyelela ga ditshedi tsa mefuta mengwe go tla ama jang thulaganyo ya lefatshe ya go tsweledisa botshelo pele?

Fa baitsesaense ba leka go tlhotlhomisa gore go nyelela mefuta e le kae ya ditshedi, diphopholetso tsa bone gantsi di kgoba marapo, le fa di farologane. Mokwadi mongwe o bolela jaana: “Diperesente di ka nna 50 tsa dimela le ditshedi tsa lefatshe di ka tswa di tlile go nyelela mo dingwageng di ka nna lekgolo tse di tlang.” Polelelopele ya ga Harte yone e hutsafatsa le go feta: “Baitsethutotshelo ba fopholetsa gore go rengwa ga dikgwa kwa dinageng tsa boboatsatsi go tla felela ka go nyelela ga halofo kgotsa go e feta ya ditshedi tsa mefuta e e farologaneng tse di sa ntseng di le teng mo lefatsheng mo dingwageng di le 75 tse di tlang.”

Go ya ka dipalopalo tsa ga moitsesaense e bong Stuart Pimm wa Yunibesithi ya Tennessee, National Geographic e tlhalosa gore “diperesente di le 11 tsa dinonyane, kgotsa mefuta e le 1 100 ya tsone mo go e e batlang e nna 10 000 ya lefatshe lotlhe, e tloga e nyelela; ga go na tsholofelo ya gore bontsi jwa mefuta e 1 100 eno e tla bo e sa ntse e le gone fa re wetsa [lekgolo la bo21 la dingwaga].” One makasine ono o ne wa tlhalosa jaana: “Bosheng jaana setlhopha sa baithutadimela ba ba tlotlegang se ne sa bega gore semela se le sengwe mo go dingwe le dingwe di le robedi se mo kotsing ya go nyelela. Pimm a re ‘ga se mefuta ya ditshedi tse di leng mo ditlhaketlhakeng kgotsa mo dikgweng tsa pula kgotsa dinonyane kgotsa diamusi tse dintle tse dikgolo fela tse di leng mo kotsing ya go nyelela. Setshedi sengwe le sengwe se mo kotsing gongwe le gongwe. . . . Ke leroborobo la lefatshe lotlhe la go nyelela ga ditshedi tsa mefuta e e farologaneng.’”

A re Tlhoka Mefuta Eno Yotlhe ya Ditshedi?

A go na le lebaka la gore re tshwenngwe ke go nyelela ga ditshedi tsa mefuta e e farologaneng? A tota re tlhoka ditshedi tse di ntseng jalo tsa mefuta e e farologaneng? Baitse ba le bantsi ba ba tlotlegang ba gatelela gore re a di tlhoka. Lefatshe le tletse ka ditshedi tsa mefuta e e farologaneng tse di nayang motho dijo, dikhemikale tse di mosola le dilo tse dingwe tse dintsi. Gape, akanya ka melemo e ditshedi tse di iseng di itsiwe di ka e tlisetsang batho. Ka sekai, go fopholediwa gore mefuta e le 120 ya diokobatsi tsa kalafi mo go e le 150 e e ntshiwang ke dingaka kwa United States e dirilwe ka metswako ya dilo tsa tlholego. Ka jalo, fa batho ba latlhegelwa ke dimela tsa lefatshe, gape ba latlhegelwa ke sebaka sa go bona diokobatsi le dikhemikale tse  disha. Sir Ghillean Prance, e leng mokaedi wa Kew Gardens kwa Lontone, o bolela jaana: “Nako le nako fa re latlhegelwa ke semela, re latlhegelwa ke sengwe se re neng re ka se dirisa mo isagweng. Re latlhegelwa ke kalafi ya AIDS e re neng re ka e bona kgotsa semela se se lwantshang megare. Ka jalo, ka tsela nngwe, re tshwanetse go emisa go latlhegelwa ke mefuta ya ditshedi e seng fela ka go bo re tshwenyega ka polanete ya rona mme ka go bo re tshwenngwa ke go latlhegelwa ke dilo . . . tse re di tlhokang le tse re ka di dirisang.”

Gape, re tlhoka gore tikologo ya tlholego e re neye dilo tse di botlhokwa tse ditshedi tsotlhe di ikaegileng ka tsone. Okosejene, metsi a a phepa, go tlhotlha dileswafatsi le go thibela kgogolo ya mmu tsotlhe ke dilo tse di botlhokwa tse di dirwang ke tikologo e e itekanetseng.

Ditshenekegi di budula mmudula wa dithunya. Digwagwa, ditlhapi le dinonyane di thibela diji tse di senyang;  ditlhapi dingwe le ditshedi dingwe tsa mo metsing di phepafatsa metsi a rona; dimela le ditshedinyana tse dinnye di re direla mebu. Ditiro tseno tsotlhe di somarela ikonomi ya rona fela thata. Fa re dirisa ditlhwatlhwa tsa 1995, ditshedi tsa mefutafuta mo lefatsheng lotlhe di somarela madi a a ka nnang diranta di le dibilione di le 24 ka ngwaga.

Le fa go ntse jalo, le fa re ikaegile ka ditshedi tsa mefuta e e farologaneng, go lebega lefatshe le le mo matlhotlhapelong a go nyelela ga tsone go go tsenyang thulaganyo eno e e raraaneng ya botshelo mo kotsing. Jaanong ka nako e ka yone re simololang go tlhaloganya seabe se se botlhokwa sa ditshedi tsa mefutafuta, batho ba di nyeletsa go feta le fa e le leng pele! Le fa go ntse jalo, a batho ba ka kgona go rarabolola bothata jono? Isagwe ya ditshedi tse di farologaneng mo lefatsheng e ntse jang?

[Lebokoso/Setshwantsho mo go tsebe 22]

Botshelo bo Mosola go le Kae?

Tlhaloso eno yotlhe e e malebana le mosola wa ditshedi tsa mefutafuta e ka nna ya bonala e kete e bolela gore re tshwanetse go amega ka ditshedi tsa mefuta e mengwe fa fela di re naya dilo tse re di tlhokang. Bangwe ba akanya gore go akanya ka tsela e e ntseng jalo ke go akanyetsa ntlha e le nngwe. Moithutadifosele e bong Niles Eldredge o umaka mosola o botshelo bo nang le one: “Le rona batho re rata botshelo jo bo re dikologileng—ditshedi tse dintle tse di kgatlhang tsa mefuta e e farologaneng, mafelo a mantle a tlhago a a tshwerweng sentle—ka ntlha ya mosola o mogolo wa jone. Go na le sengwe mo teng ga rona se se re lemotshang gore re amana ka tsela nngwe le lefatshe la tlholego le gore re bona kagiso le boitumelo ka go nna mo go lone nako epe fela fa re kgona go dira jalo.”

 [Lebokoso/Ditshwantsho mo go tsebe 23]

Red List

“Red List” e gatisitswe ke International Union for Conservation of Nature and Natural Resources, e leng mokgatlho o o sekasekang boemo jwa ditshedi tse di leng mo kotsing ya go nyelela. Mo tsebeng eno, go bontshiwa ditshedi di le mmalwa tsa mefuta e e farologaneng tse di leng mo kotsing ya go nyelela tse di tsentsweng mo go “Red List” ya ngwaga wa 2000:

Albatross e e kgarakgatshegang (Diomedea exulans)

Ono ke mongwe wa mefuta e le 16 ya di-albatross tse go kaiwang di le mo kotsing ya go nyelela mo lefatsheng lotlhe. Go bolelwa gore dinonyane tseno di le dintsi di a nwela fa di sena go tshwarwa ka phoso ke dikgoge tse di nang le sethaiso tse di tshwerweng ka tlhale e telele ya go tshwara ditlhapi ka mekoro.

[Motswedi wa Setshwantsho]

Photo by Tony Palliser

Douc langur e e maoto mahibidu (Pygathrix nemaeus)

Tshwene e ntle eno ya kwa Asia e fitlhelwa kwa borwabogare jwa Vietnam le kwa mafelong a mangwe a Laos. E mo kotsing ya go nyelela ka ntlha ya go senngwa ga lefelo la yone la bonno le go tsongwa. E tsomelwa go jewa le dikarolo tse dingwe tsa yone tsa mmele tse di dirisediwang go dira metswako ya melemo ya setso.

[Motswedi wa Setshwantsho]

Photo by Bill Konstant

Kgopa ya kwa Corsica (Helix ceratina)

Lefelo le kgopa eno e e mo kotsing ya go nyelela e leng mo go lone ke la bogolo jwa diheketara di le supa fela, gaufi le Ajaccio, kwa lotshitshing lo lo kwa borwabophirima jwa Corsica. E ka tswa e le mo kotsing ya go nyelela ka ntlha ya tiro ya go aga e e akaretsang go agiwa ga boemafofane le ditsela tse di yang kwa dintshing tsa lewatle.

[Motswedi wa Setshwantsho]

Photo by G. Falkner

Golden pagoda (Mimetes chrysanthus)

Sethunya se sentle seno se ne sa bonwa ka 1987 kwa Kapa Bophirima, mo Afrika Borwa. Melelo e megolo e e runyang gangwe le gape mo dikgweng le dimela tse di anamang tse gotlhelele di sa tshwaneng le tse di golelang mo nageng e golden pagoda e golelang mo go yone, di tsenya semela seno mo kotsing ya go nyelela.

[Motswedi wa Setshwantsho]

Photo by Craig Hilton-Taylor

Freshwater sawfish (Pristis microdon)

Ditlhapi tseno tse di leng mo kotsing ya go nyelela di fitlhelwa mo lewatleng la India le la West Pacific, mmogo le mo makopanelong a dikgogometso, mo bokgwelong jwa mawatle le dinoka. Di tsongwa thata e bile palo ya tsone e fokotsegile fela thata. Gape di mo kotsing ya go nyelela ka ntlha ya go latlhegelwa le go senngwa ga lefelo la tsone la bonno.

[Motswedi wa Setshwantsho]

Photo courtesy of Sun International Resorts, Inc.

[Lebokoso/Setshwantsho mo go tsebe 24]

Go Ganyaola Ditshedi Tsa mo Lewatleng

Ditshedi tse di seng kana ka sepe tsa mo lewatleng, tse di kileng tsa bo di lejwa jaaka tse di ka se kang tsa fela, di itshupile gore ruri di ka fela. Fa Moithutadifosele e bong Niles Eldredge a ne a kwala mo makasineng wa Natural History, o ne a tlhalosa kafa mawatle a sa tshwarweng sentle ka gone: “Botegeniki jwa segompieno bo dirile gore ditshedi tsa mo lewatleng di tshwarwe motlhofo fela mo e leng gore boalo jo bogolo jwa lewatle bo tlogelwa bo se na sepe fela jaaka go sala go se na sepe fa ditlhare tsa sekgwa di sena go rengwa. Le fa go ntse jalo, botegeniki jono bo senya ka tsela e e maswe thata; dikhudu tsa mo lewatleng le manyebi, mmogo le ditlhapi di le dintsi tse di sa rekisiweng mo marekisetsong le ditshedi tse di se nang lerapo la mokwatla, di a swa nako le nako fa go latlhelwa letloa gore go tshwarwe ditlhapi kgotsa fa go gogwa letloa le legolo mo boalong jwa lewatle.”

Fa makasine wa National Geographic o ne o akgela ka se o se bitsang “tshenyo e e bakwang ke go tshwara di-shrimp,” o ne wa tlhalosa gore “kwa Gulf Coast [kafa ntle fela ga Texas, U.S.A.] ditshedi tsa mo lewatleng tsa bokete jwa diponto di le lesome le bobedi [mo e ka nnang dikilogerama di le thataro]—tse bontsi jwa tsone e leng ditlhapi tse dinnye—di ka bolawa fela gore go bonwe di-shrimp tsa bokete jwa ponto e le nngwe fela [mo e ka nnang halofo ya kilogerama].” Ditlhapi tseno tse di sa ratiweng le ditshedi tse dingwe tsa lewatle tse di nang le logapa gatwe di a bo di tshwerwe ka phoso. Moithutatshelo mongwe wa puso o ne a bua jaana a hutsafetse: “Palogare ya ditshedi tsa lewatle tse di tshwarwang go ne go sa batliwe tsone ke di le nnè go e le nngwe.” Ga go gakgamatse go bo mawatle a rona a fetogile mafelo a go bolawa ga ditshedi tsa mefuta e mentsintsi e e leng mo kotsing ya go nyelela!

[Lebokoso/Setshwantsho mo go tsebe 25]

Ditshedi Tse di Iphitlhileng mo Dikgweng

Dikgwa tsa polanete ya rona di tletse ka ditshedi tse di seng kana ka sepe, go akaretsa le mefuta ya ditshedi tse di iseng di itsiwe ke batho. Moitsesaense mongwe wa ikholoji e bong John Harte o ne a bolela jaana: “Dikgwa tsa pula tsa dinaga tsa boboatsatsi di bogolo jwa diperesente tse di kafa tlase ga di le pedi fela tsa polanete eno mme le fa go ntse jalo ke tsone fela boago jwa ditshedi tsa mefuta e e leng diperesente di le 50 gongwe le di le 90 tsa mefuta yotlhe ya ditshedi tse di mo lefatsheng. Lebaka la phopholetso e e kwa godimo eno ke la go bo go tsewa gore mefuta e le mentsi ya ditshedi tse di sa ntseng di tla bonwa mo isagweng e tla nna tsa dinaga tsa boboatsatsi ka gonne ditshedi tse go ithutiwang botshelo jwa tsone kwa dinageng tsa boboatsatsi di mo mafelong a a makgaoganyane. Go na le mafelo a mangwe a le one a iseng a hukudiwe ka botlalo e bile ga go na pelaelo gore a na le mefuta e mentsi ya ditshedi tse borasaense ba sa di itseng gompieno. Mangwe a one ke mebu ya dikgwa tse di nang le maemo a a ritibetseng a loapi tse di jaaka dikgwa tse di sa bolong go gola tse di bongola kwa Northwest Pacific ya United States.”

Ke mang yo o itseng gore motho o tlile go bonang fa a ka bona sebaka sa go ithuta ka botshelo jo bo iphitlhileng mo dikgweng?

[Setshwantsho mo go tsebe 21]

‘Passenger pigeon,” jaanong e nyeletse

[Motswedi wa Setshwantsho]

U.S. Fish & Wildlife Service, Washington, D.C./Luther C. Goldman