Metshameko ya Bana—Leroborobo le Lesha la Bothubaki

▪ Setlhopha sa baithuti ba sekolo se segolo se kopana mmogo go tla go tshameka kgwele ya dinao. Fa motshameko o fela, go tsoga modumo wa batsadi ba ba fetang 100, bakatisi le batshameki ba goa le go itaana ka mabole fa setlhopha se sengwe se sena go fenya ka go nosa nno morago ga nako e e okeditsweng.

▪ Setlhopha sa basha ba dingwaga tsa bolesome se tshameka motshameko wa basimane le basetsana. Fa motshameki mongwe yo o nang le dingwaga di le lesome a diga kgwele e a neng a e latlheletswe, mokatisi wa gagwe o mo digela fa fatshe a bo a robega mabogo oomabedi.

▪ Mokatisi wa bana ba bannye ba motshameko o o etleediwang ka madi wa baseball o ntsha mongwe wa batshameki ba gagwe mo motshamekong. Rraagwe mosimanyana o tshosetsa mokatisi gore o tla mmolaya mme o atlholelwa malatsi a le 45 mo kgolegelong.

▪ Fa bana ba ntse ba ikatisa mo motshamekong wa go relela mo aeseng, borre ba le babedi ba ngangisana ka melao e e gagametseng ya motshameko ono. Mongwe wa borre bano o itaya yo mongwe mo pele ga bana ba gagwe ba bararo gore a bo a swe.

DIPEGO tse di tshosang tse di tshwanang le tseno di tlwaelegile fela thata. Go bonala leroborobo le lesha la bothubaki le anama mo mabaleng a metshameko, mo mabaleng a di basketball le mo metshamekong ya go relela mo aeseng.  Thubakanyo eno e bakwa ke batsadi le bakatisi ba ba bonang go le botoka gore ba lwe go na le gore ba latlhegelwe. Jeffrey Leslie, e bong poresidente wa Mokgatlho wa Diatleletiki wa Jupiter-Tequesta (Florida) o bolela jaana: “Ke bone batsadi ba goelela bana ba bone, ba ba kgadiepetsa gore ba tshameke thata; ke bone bana ba lwa mo metshamekong, ba tlhotlhelediwa ke batsadi; ke bone bana ba emela kwa thoko ba lela ka gonne batsadi ba bone ba ba tlhabisitse ditlhong.” O oketsa jaana: “Metshameko ya basha e dira gore batsadi ba itshware ka tsela e e maswe tota.” Go sireletsa bana mo bothubaking joo, batho bangwe mo setšhabeng ba ile ba tsaya kgato e e gagametseng ya go thibela batsadi gore ba se ka ba nna teng mo metshamekong e bana ba bone ba tsayang karolo mo go yone.

Bothubaki jono bo nnile le matswela afe? Fred Engh, motlhami le poresidente wa Mokgatlho wa Bosetšhaba wa Metshameko ya Basha wa kwa Florida o bolela jaana: “Boitshwaro jono jo bo tlhabisang ditlhong jwa palo e e ntseng e oketsega ya bagolo bo senya metshameko ya basha, bo dira gore e se ka ya nna monate e bile bo ruta dimilione tsa bana thuto e e sa siamang.”

Go Lwela go Fenya

Go bonala bothata jono bo bakwa ke keletso e batsadi bangwe ba nang le yone ya go bona bana ba bone ba gaisa ba bangwe le go fenya go sa kgathalesege gore go diregang. Moemedi mongwe wa Mokgatlho wa go Thibela go Sotlwa ga Bana, kwa Canada a re: “Fa go fenya e le sone selo sa botlhokwatlhokwa, fa go dirisiwa dikgoka, seno se dira gore ba ba bokoa ba gobale. Mo metshamekong eno, bana ke bone batho ba ba bokoa.” Modiredimogolo mongwe wa Mokgatlho wa Thuto ya go Ikatisa Mmele le Boitekanelo wa kwa Ontario (Canada) o bolela gore bana ba ba gateletsweng ka tsela e e ntseng jalo, “ba ka nna le mathata a tlhaloganyo ba sa ntse ba le bannye. Mme fa ba gola, ba tla thatafalelwa ke go amogela gore ba fentswe.”

Ga go gakgamatse he go bo go galefa ga batsadi le go tlhoafala mo go feteletseng ga bakatisi go fetela mo batshameking bano ba ba botlana. Fa mosetsana mongwe a ne a tshameka volleyball, batshameki ba ne ba tlhasela molaolamotshameko ga supa. Mosetsana yo o neng a ntshiwa mo motshamekong wa tenese o ne a thuba koloi ya molaolamotshameko. E ne ya re fa moithuti mongwe wa sekolo se segolo yo o tshamekang motshameko wa go sokasokana a ne a bolelelwa gore o dirile phoso, a thula molaolamotshameko ka tlhogo gore a bo a idibale. Darrell Burnett, moithuta tlhaloganyo ya bana le moithutatlhaloganyo wa metshameko ya basha a re: “Metshameko ya basha e kile ya bo e na le moya wa botsalano. Mme ga e tlhole e ntse jalo. Ga e tlhole e le motshameko fela.”

Se Batsadi Ba ka Se Dirang

Batsadi ba dira sentle go gakologelwa gore go itlosa bodutu le go itshidila mmele ke one mabaka a go bo bana ba itumelela metshameko. Go dira gore metshameko e bakele bana mathata le go ba gobolola ka mafoko ga go dire gore ba e itumelele—mme seo ga se lorato. Baebele ya re: “Batsadi, lo se ka lwa galefisa bana ba lona.”—Baefeso 6:4, The Jerusalem Bible.

Ke eng se se ka thusang motsadi gore a nne tekatekano mo kgannyeng eno? Sa ntlha, se se ka thusang ke go leka go gakologelwa gore go ne go ntse jang fa o ne o sa ntse o le monnye. A tota o ne o kgona go nna le seabe mo metshamekong ya diporofeshenale? A go a utlwala go lebelela gore morwao kgotsa morwadio a dire jalo? Tota e bile, “bana ba bokoa.” (Genesise 33:13) Gape, leka go leba go fenya le go fenngwa ka tsela e e siameng. Baebele e bitsa go gaisana kwantle ga boithibo e re ke “lefela le go kgaratlhela phefo.”—Moreri 4:4.

Selo se se kgatlhang ke gore motshameki mongwe yo pele a neng a tshamekela setlhopha sa batho ba ba godileng sa baseball o ne a kgothaletsa batsadi gore ba lebe go fenya le go fenngwa ka tsela e e tshwanetseng, ba se ka ba galefa fa ngwana a sa tshameke sentle le e leng go itumela go feta selekanyo fa a fenya. Go na le gore go fenya e nne selo se se botlhokwa go feta tekano, batsadi ba tshwanetse go tlhoma mogopolo mo go itumeleleng motshameko ga ngwana le melemo ya go nna a itekanetse mo mmeleng.

Ka jalo, batsadi bangwe ba sweditse ka gore metshameko e e rulagantsweng ya bana e tsosa moya o o sa siamang wa kgaisano. Le fa go ntse jalo, seno ga se reye gore bana ga ba itumelele go tshameka le ba bangwe. Ka sekai, batsadi ba le bantsi ba Bakeresete ba fitlhetse gore bana ba bone ba itumelela go tshameka le badumedi ka bone kafa morago ga ntlo kgotsa kwa parakeng ya mo lefelong  la bone. Ka tsela eno, batsadi ba kgona go ela tlhoko gore bana ba bone ba tsalana le bomang. Go intsha lo le lelapa le gone go ka lo naya ditshono tsa go nna le seabe mo motshamekong o o phepa. Gone ke boammaaruri gore go tshameka ka fa morago ga ntlo ga go kitla go dira gore ba itumele jaaka fa ba le mo motshamekong o go nang le bangwe ba ba fenyang mo go one. Le fa go ntse jalo, o se ka wa lebala gore “go thapisa mmele go tswela mosola go le gonnye [fela]; mme boineelo jwa bomodimo bo tswela mosola mo dilong tsotlhe” fa go dirwa sentle. (1 Timotheo 4:8) Fa o leba metshameko ka tekatekano jalo, o ka kgona go sireletsa ngwana wa gago gore a se ka a amiwa ke leroborobo le lesha la bothubaki.

[Ditshwantsho mo go tsebe 21]

Metshameko e tshwanetse go nna selo se se itumedisang e seng ntwa