Dikgwa Tsa Pula—Ke Mang yo o Tla di Bolokang?

MONGWE le mongwe yo o batlang go rarabolola mathata a a amang dikgwa tsa boboatsatsi o tshwanetse go simolola pele go baakanya se se a bakang. Ke eng seo? Bothata fano ga se go ntsifala ga batho fela. Dikgaolo tse di ungwang tsa lefatshe di ka kgona go tlamela baagi ba lefatshe motlhofo—tota le fa ba ka nna bantsi jang.

Tota e bile, dipuso kwa dinageng dingwe di amegile thata ka gore dikungo tsa dipolasi di dintsi thata mme ka ntlha ya moo di dira gore ditlhwatlhwa tsa dijo di ye kwa tlase thata. Dipuso dingwe di kgothaletsa balemirui go fetola dibata tsa bone tsa naga ba di dire mafelo a boitapoloso a a jaaka mafelo a go tlhoma ditente, mafelo a go tshamekelwang kolofo mo go one le dirapa tsa diphologolo.

Jaanong ke ka ntlha yang fa dikgwa tse di mo lefatsheng di fokotsega? Re tshwanetse go sekaseka mabaka a a fetang a re a umakileng go fitlha fano a a bakang bothata jono.

Mabaka a Konokono a go Senngwa ga Dikgwa

Tota le pele batho ba nna bantsi thata jaaka go ntse gompieno, dipuso di le dintsi di ne di ntse di senya dikgwa ka gonne di ne di batla go busa e bile di batla le dikhumo. Ka sekai, fa Mmusomogolo wa Boritane o ne o tlhoka dikgong go aga dikepe, o ne wa senya ditlhare tsa moakere tsa Boritane mme morago ga moo wa senya le dikgwa tsa ditlhare tse ditelele tsa Burma le Thailand. One mmusomogolo ono o ne wa rema dikgwa kwa India gore o tlamele madirelo a tshipi ka lookwane. Go ne ga senngwa le dikgwa tse dingwe go dira mafelo a temo a rabara, kofi le khoukhou.

Le fa go ntse jalo, morago ga ntwa ya bobedi ya lefatshe, go ne ga dirisiwa disaga le diterekere tse dikgolo go senya dikgwa ka lobelo lo logolo thata. Dikgwa di le dintsi tse di neng di le mo kotsing ya go senngwa di ne di senngwa go dira madi.

Dikhampani tse dikgolo di ne tsa reka dibata tse dikgolo tse di ungwang mme ba dirisa metšhine ya segompieno go jala dijalo tse ba ka kgonang go di rekisa gore ba bone madi ka bonako. Batho ba le bantsi ba metseselegae ba ne ba fudugela kwa ditoropong ka ntlha ya go bo ba ne ba feletswe ke tiro. Le fa go ntse jalo, ba bangwe ba ne ba kgothalediwa go fudugela kwa dikgweng tsa pula. Ka dinako tse dingwe, naga e e ntseng jalo e ne e buelelwa go twe ke “naga e e se nang batho ya batho ba ba se nang naga.” Mme fa ba lemoga kafa go leng boima ka gone go lema mo mafelong a a ntseng jalo, gantsi go a bo go setse go le thari—sebata se segolo sa sekgwa sa bo se setse se senyegile.

Bonweenwee jwa badiredibagolo le jone bo nnile le seabe mo go senyeng dikgwa di le dintsi. O tshwanelwa  ke go duela madi a le mantsi gore o newe tetla ya go rema ditlhare. Go bolelwa gore badiredibagolo bangwe ba amogela pipamolomo ba bo ba naya dikhampani dingwe tetla ya lobaka lo lokhutshwane ya go rema dikgwa ba sa kgathalele go di boloka.

Le fa go ntse jalo, sengwe se se kotsi thata mo diphologolong tse di mo sekgweng ga se go rengwa ga ditlhare mme ke go fetolwa ga dikgwa gore e nne mafelo a temothuo. Fa naga e le e e ungwang, ka dinako tse dingwe go ka tsewa go siame go dira diphetogo tse di ntseng jalo. Mme gantsi, badiredibagolo ba ba bonweenwee kgotsa ba ba sa tshwanelegeng ba ne ba ntsha tetla go sa tlhokege ya gore dikgwa tse go ka se kgonegeng gore di tsosoloswe gape di senngwe.

Dikebekwa le tsone di senya dikgwa. Baremi ba dikgwa ba ba sa letlelelwang ke molao ba rema ditlhare tse di botlhokwa thata go sa itsege, tota le tse di leng mo diparakeng tsa setšhaba. Ka dinako tse dingwe ba ne ba saga dikota ba di dira dipolanka gone mo sekgweng—e leng mokgwa o o senyang le o o seng kafa molaong. Batho ba motse ba duelelwa gore ba ntshe dikgong tseo ka dibaesekele kgotsa ba di rwale. Morago ga moo, fa letsatsi le sena go phirima, diteraka di a di tsaya mme di bo di tsamaya ka ditsela tse di sa dirisiweng thata tsa mo thabeng gore ba se ka ba feta ka mafelo a dikoloi di phuruphudiwang mo go one.

Ka gone, go senngwa ga dikgwa le go bolawa ga diphologolo tsa naga ga go bakiwe ke go ntsifala ga batho. Gantsi ke ka ntlha ya go se tsamaise dilo sentle, kgwebo ya bopelotshetlha, bokebekwa le puso e e bonweenwee. Mo maemong a a ntseng jalo, go na le tsholofelo efe kaga go sireletsa ditshedi tse di kwa dikgweng tsa pula tsa boboatsatsi?

Go na Le Tsholofelo Efe ka Dikgwa Tsa Pula?

Buka ya The Cutting Edge: Conserving Wildlife in Logged Tropical Forest e bolela jaana: “Ke karolo e potlana fela ya lefatshe ya dikgwa tsa boboatsatsi mo lefatsheng tse di tlhokomelwang sentle.” E oketsa jaana: “Gone jaanong, ke dikgwa di le mmalwa (fa e le gore di teng) tse di tlhokomelwang sentle.” Eleruri go a kgonega go laola dilo sentle, le fa go ntse jalo maswabi ke gore lefatshe ka bophara go senngwa dikgwa ka lobelo lo logolo.

Go ile ga bolelwa gore naga e e tlhomologileng ka go sa senye dikgwa ke Bolivia, e go bolelwang gore diperesente tse 25 tsa dikgwa tsa yone tsa pula tsa boboatsatsi di tlhokomelwa sentle. Le fa go ntse jalo, fa e bapisiwa le ya lefatshe ka bophara e kwa tlase ga peresente e le nngwe—e leng palo e e kwa tlase thata. Bontsi jwa dikgwa tsa boboatsatsi di senngwa mo go maswe. Mabaka a a dirang gore di senngwe jalo ke bogagapa le bopelotshetlha. A go a utlwala go solofela gore barekisi le boradipolotiki ba lefatshe ba tla emisa mokgwa ono mme ba simolole go sireletsa dikgwa le diphologolo tsa naga?

Buka ya Forests of Hope e konela ka kakantsho eno e e ka tshwanelang batho botlhe: “Go lemoga le go batla botshelo jo bo siametseng batho mo lefatsheng lotlhe le jo bo sa senyeng lefatshe le dikhumo tsa lone.” Eo ke kakantsho e ntle—mme a e ka kgona go fitlhelelwa?

Mmopi wa rona o ne a ikaeletse eng ka lefatshe le batho? O ne a laela banyalani ba ntlha jaana: “[Tlatsang] lefatshe lo bo lo le fenye, mme lo laole ditlhapi tsa lewatle le dibopiwa tse di fofang tsa magodimo le sebopiwa sengwe le sengwe se se tshelang se se tsamayang mo lefatsheng.” (Genesise 1:28) Ka jalo Modimo o letlelela batho go dirisa popo. Mme go le ‘laola’ ga se tetla ya go le senya.

Ka jalo, potso ke gore, A batho lefatshe ka bophara ba ka fetola mokgwa wa bone wa botshelo gore ‘ba se ka ba senya lefatshe le dikhumo tsa lone’? Mafoko ao a raya gore ka selekanyo se se rileng ba rate baagelani ba bone ba bo ba tlotle popo ya Modimo e leng selo se se sa tlwaelegang mo lefatsheng la gompieno. Go solofela gore baeteledipele ba batho ba tla amogela le go rotloetsa mokgwa wa botshelo o o ntseng jalo ke go ijesa dijo tsa ditoro.

Le fa go ntse jalo, Lefoko la Modimo le bolelela pele ka nako ya fa lefatshe le tla bong le tletse ka batho ba ba ratang ba bangwe e bile ba rata le Mmopi wa bone. Baebele ya re: “Ga di kitla di utlwisa botlhoko le fa e le go senya mo thabeng ya me yotlhe e e boitshepo; ka gonne lefatshe le tla tlala kitso ya ga Jehofa jaaka metsi a khurumeditse lewatle.” (Isaia 11:9; Pesalema 37:29; Mathaio 5:5) Ela tlhoko gore lebaka la go bo batho ba Modimo ba sa ‘utlwise lefatshe botlhoko’ le fa e le go le “senya” ke gonne ba simolotse go itse Jehofa e bong Mmopi yo Mogolo e bile ba mo rata. Ga go pelaelo gore batho ba ba ntseng jalo ga ba kitla ba senya lefatshe.

Seno ga se toro fela. Le eleng gone jaanong, Jehofa o kokoanya batho ba ba peloephepa e bile o a ba ruta. Ka go ithuta Lefoko la Modimo, dimilione tsa batho lefatshe ka bophara di ithutile mokgwa wa botshelo o o theilweng mo loratong lwa go intsha setlhabelo. (Johane 13:34; 1 Johane 4:21) Makasine ono, mmogo le makasine o o tshwanang nao wa Tora ya Tebelo, o gatisiwa go thusa batho gore ba ithute go le gontsi ka mokgwa oo wa botshelo le kafa ba ka o latelang ka gone. Re go kopa gore o tswelele o ithuta. O tla go fitlhela go solegela molemo tota.

[Ditshwantsho mo go tsebe 26]

Batho ba tla tlhokomela lefatshe le lentle go na le go le senya