‘Makasine o o Tshwanelwang ke go Silwa’

DAVID o ithutela go nna ramolao kwa Obafemi Awolowo University kwa Nigeria. Bosheng jaana o ne a kwalela ofisi ya lekala la Basupi ba ga Jehofa ya lefelo la bone a re: “Go na le porofesa mongwe yo o itsegeng thata yo o nang le dingwaga tse 70 mo lephateng la yunibesithi ya rona la dithuto tsa molao, yo ke mo isetsang dimakasine tsa Tsogang! ka metlha. Moso mongwe fa a sena go amogela dimakasine tsa bosheng, o ne a raya motho mongwe yo o neng a mo etetse mo ofising ya gagwe a re: ‘Dibuka dingwe di tshwanetse go latswiwa fela, tse dingwe go metswa, mme di se kae tsone di tshwanetse go tlhafunwa le go silwa. Tsogang! ke makasine o o tshwanelwang ke go tlhafunwa le go silwa.’”

David a re nako nngwe fa a sena go tswa mo ofising ya porofesa yono, o ne a mo utlwa a kgothaletsa motho mongwe yo o neng a mo etetse mo ofising ya gagwe gore a bale dimakasine tsa Tsogang! “O ne a buelela thata kafa go dirwang dipatlisiso tse di tseneletseng ka gone fa go rulaganngwa makasine wa Tsogang! le kafa makasine ono o tlhalosang dilo ka tlhamalalo ka gone le fa o sa tseye letlhakore. Ke ne ka mo utlwa a re: ‘Ke bala dimakasine tseno ka kelotlhoko tota. Go bonala Modimo e le ene a nayang bakwadi ba tsone botlhale jwa go kwala ditlhogo tse di molemo thata jaana.’”

Dimakasine tsa Tsogang! di a ruta e bile di bua ka dilo di le dintsi. Selo se se botlhokwa le go feta ke gore, di dira gore batho ba ikanye se Mmopi a se solofetsang mo Baebeleng, gore go tla nna le lefatshe le lesha la kagiso le le tla tseelang tsamaiso eno ya dilo sebaka. Boroutšhara jwa ditsebe tse 32 jwa Modimo o Batla Gore re Direng? bo gatelela boikaelelo joo jwa Modimo, bo naya tshedimosetso go tswa mo Baebeleng e e bontshang se re tshwanetseng go se dira gore Modimo a re amogele. O ka ikopela khopi ya boroutšhara jono ka go tlatsa le go romela setlankana se se fa tlase kwa atereseng e e kwadilweng fano kgotsa kwa atereseng e e tshwanetseng mo go tse di mo go tsebe 5 ya makasine ono.

□ Tsweetswee nthomelelang khopi ya boroutšhara jwa Modimo o Batla Gore re Direng?

□ Tsweetswee ikgolaganyeng le nna malebana le thuto ya legae ya mahala ya Baebele.