“E Kete Batho Ba ka Bo ba Itse!”

FA BASHA ba bantsi ba sena go fetsa sekolo se segolwane, ba bo ba itlhomela mekgele ya go nna le dilo tse di bonalang, David ene o ne a akantse ka sengwe se sele. Ka September 2003, ene le tsala nngwe ya gagwe ba ne ba tswa kwa Illinois, kwa United States, mme ba fudugela kwa Dominican Republic. * Davey, jaaka ditsala le ba lelapa la gaabo ba ne ba mmitsa, o ne a swetsa go ithuta Se-Spain le go ya go thusa Phuthego ya Basupi ba ga Jehofa e e kwa Navas mo tirong ya go ruta batho Baebele. Phuthego eo e ne ya mo amogela ka lorato. Juan yo e leng ene fela mogolwane kwa phuthegong eo a re: “Davey o ne a dira sengwe le sengwe se a neng a kopiwa go se dira. Ka dinako tsotlhe o ne a iketleeditse go thusa ba bangwe mme bakaulengwe ba ne ba mo rata.”

Davey o ne a rata kabelo ya gagwe. O ne a kwalela tsala nngwe ya gagwe kwa United States jaana: “Ke itumelela botshelo mono. Tshimo e monate tota! Re bua mo e ka nnang metsotso e le 20 mo ntlong nngwe le nngwe ka gonne batho ba batla gore re ba bolelele sengwe le sengwe. Ke setse ke na le dithuto tsa Baebele di le thataro mme re sa ntse re tlhoka thuso. Mo go nngwe ya dipokano tsa rona tsa phuthego ya baboledi ba Bogosi ba le 30 re ne ra nna le batho ba le 103 ba ba tlileng dipokanong!”

Ka maswabi, ka April 24, 2004, Davey yo o sa leng mosha le lekawana lengwe go tswa kwa phuthegong e a neng a le kwa go yone ba ne ba tlhokafala mo kotsing. Pele Davey a tlhokafala, o ne a le matlhagatlhaga mo tirong ya gagwe mme o ne a kgothaletsa basha ba bangwe ba lefelo le a tswang kwa go lone gore ba tle go bereka le ene. O ne a raya Mosupi mongwe yo mosha a re: “Go tla fetola tsela e o lebang dilo ka yone.”

Tsela e nngwe e Davey a neng a fetotse tsela e a lebang dilo ka yone e ne e le mo kgannyeng ya dilo tse di bonalang. Rraagwe o gakologelwa jaana: “Nako nngwe fa a ne a etetse mo gae, Davey o ne a lalediwa go tsaya loeto lwa go ya go tshameka motshameko wa go relela mo kapokong. O ne a botsa gore go tla ja bokae. Fa a ne a bolelelwa gore go tla ja bokae, Davey o ne a re a ka se ka a dirisa madi a a kalo go ya go relela mo kapokong fela ntswa a ka dirisa madi ao go itshedisa dikgwedi di le dintsi kwa Dominican Republic!”

Tlhoafalo e Davey a neng a na le yone e ne ya tlhotlheletsa ba bangwe. Mosha mongwe wa kwa Davey a tswang gone o ne a re: “Fa ke ne ke utlwa ka dilo tse Davey a neng a di dira le kafa a itumetseng ka teng, ke ne ka lemoga gore le nna nka kgona go dira dilo tseo. Go tlhokafala ga ga Davey go dirile gore ke ipotse gore batho ba tla reng ka nna fa ke tlhokafala le gore a ke tla nna le tlhotlheletso e e molemo jalo mo go bone.”

Batsadi le bana ba kwa gaabo Davey ba e leng Basupi ba ga Jehofa, ba tlhomamisega gore Modimo o tla tsosa Davey mo baswing mo lefatsheng le lesha la tshiamo. (Johane 5:28, 29; Tshenolo 21:1-4) Fa ba sa ntse ba letile nako eo, ba gomodiwa ke go itse gore Davey o ile a dirisa botshelo jwa gagwe ka tsela e e molemolemo—go direla Mmopi wa gagwe. (Moreri 12:1) Nako nngwe Davey o kile a bolela jaana fa a ne a tlhalosa ka tshwetso ya gagwe ya go ya go direla kwa go nang le tlhokego e kgolo gone: “Ke eletsa e kete basha botlhe ba ka dira selo se se tshwanang le seno mme ba ikutlwele gore go ntse jang. Ga go na sepe se se gaisang go direla Jehofa ka peloyotlhe. E kete batho ba ka bo itse!”

[Ntlha e e kwa tlase]