“E Ntle Tota”

Ke se banyalani bangwe ba kwa Georgia, U.S.A., ba ileng ba se kwala ka buka ya Totatota Baebele e Ruta Eng?, buka ya ditshwantsho tsa mebala e mentle ya ditsebe di le 224 e e gatisitsweng ka 2005. Ba ne ba tlhalosa jaana: “E kwadilwe ka tsela e e motlhofo thata gore mongwe le mongwe a kgone go e bala. Le fa go ntse jalo, e na le tshedimosetso e e lekaneng go ka kgotsofatsa keletso ya semoya ya batho ba ba rutegileng thata.”

Setlhogo ka bosone fela se ngoka kgatlhego ya batho, seno se supiwa ke se se diragetseng ka banyalani bangwe ba ba neng ba tswa kwa New Jersey, U.S.A. Fa ba tswa kwa kopanong ya kgaolo ya Basupi ba ga Jehofa kwa Florida, kwa ba ileng ba ikamogelela buka eno gone, banyalani bano ba ne ba tsamaya ka sefofane go ya kwa Bahamas go ya go ja malatsi a boikhutso. Fa modiredimogolo mongwe wa tsa lekgetho la dithoto a ne a tlhatlhoba dithoto tsa bone, o ne a bona buka eo, a bala setlhogo sa yone mme a re, “Ga ke bolo go batla go itse karabo ya potso eo.” Modiredimogolo yono o ne a itumela thata fa banyalani bano ba Basupi ba ne ba mo naya khopi e nngwe ya buka e ba neng ba na le yone.

Ka letsatsi le le latelang bone banyalani bano ba ne ba ntse ba bala buka eno fa ba dutse kwa lotshitshing lwa lewatle fa mosadi mongwe yo o rekisetsang baeti a e bona. O ne a tlhalosa gore pelenyana mo go lone letsatsi leo o ne a rapela Modimo a mo kopa go mo thusa go bona karabo ya yone potso eo—Totatota Baebele e ruta eng? O ne a botsa gore a ka bona jang buka eo mme o ne a itumela thata fa banyalani ba ne ba mo naya buka e nngwe e e neng e setse.

Buka ya Totatota Baebele e Ruta Eng? e teng jaanong ka dipuo tse di fetang 145 mme go setse go gatisitswe dikhopi di le dimilione di feta 40. O ka kopa go romelelwa buka eno ka go tlatsa setlankana seno mme o se romele kwa atereseng e e mo go sone kgotsa kwa atereseng e e tshwanetseng mo lenaaneng le le mo tsebeng ya 5 ya makasine ono.

□ Kwantle ga go ipofa, ke kopa buka e e bontshitsweng fano.

□ Tsweetswee ikgolaganyeng le nna malebana le thuto ya mahala ya legae ya Baebele.