Thusa Basha ka Dilo Tse ba di Tlhokang

BASHA ba tlhoka mongwe yo ba ka buang le ene ka mekgele ya bone, dilo tse ba di solofetseng le ka mathata a bone. Mme gape ba tlhoka ditsala tse di siameng. Mme fa ba ntse ba gola, ba tlhoka go ikitse gore tota ke bomang. Fa batsadi ba thusa bana ba bone ka dilo tseno, ba tla bo ba ba sireletsa gore ba se ka ba nna le ditsala tse di kotsi, go akaretsa le tse ba ka di dirang motlhofo mo Internet.

▪ Basha ba tlhoka go bua. Basha ba ka nna ba bonala e le batho ba ba sa batleng go atamelwa kgotsa ba ba nang le diphiri fa go tla mo kgannyeng ga go tlhalosa maikutlo a bone. Le fa go ntse jalo, tlhomamisega gore ba batla go bua—ee, ba batla go bua le wena, motsadi wa bone—ka dikgang tse di masisi le tse di sa reng sepe. Mme potso ke go re, a wena o batla go ba reetsa e bile a o ikemiseditse go ba reetsa?—Jakobe 1:19.

O se ka wa letla gore mathata a botshelo a go amoge ditshono tse di botlhokwa tsa go bua le bana ba gago. Fa e le gore o na le mathata mo kgannyeng eno, eno e ka tswa e le nako ya gore o akanye masisi ka kgakololo e e botlhokwa eno ya Baebele: ‘Tlhomamisa dilo tse di botlhokwa thata.’ (Bafilipi 1:10) Ga go na sepe se se botlhokwa go feta bana ba gago.

O se ka wa itlhaganelela go swetsa ka gore basha ba bona go le botoka go ya kwa balekaneng ba bone go na le gore ba ye kwa batsading ba bone go bona kgakololo. Mo patlisisong nngwe, baithuti ba ba fetang 17 000 ba setlhopha sa bo6 go ya go sa 12, ba ne ba bolelelwa gore ba lekanye mo selekanyong sa 0 go ya go 5 gore batsadi ba bone, ditsala tsa bone, batho ba ba tumileng, tshedimosetso ya dikgang le barutabana ba bone ba ba tlhotlheletsa go le kana kang. Mo e ka nnang halofo ya bone ba ile ba supa gore batsadi ba bone ba ba tlhotlheletsa ka selekanyo sa 5.

Ga go na pelaelo gore jaaka motsadi, o ka kgona go nna le seabe se segolo mo go tlhotlheletseng tsela e bana ba gago ba itshwarang ka yone le mekgele e ba e tlhophang. Motsadi mongwe o ne a re: “O ka nna wa se ka wa kgona go ba tlhotlheletsa ka sengwe le sengwe se o se buang. Mme fa o sa bue le bone, o ka se ka wa fitlhelela dipelo tsa one.”

▪ Basha ba tlhoka ditsala. Mosetsana mongwe wa dingwaga di le 15 a re: “Gantsi batsadi ga ba itse gore bana ba bone ba dira eng mo Internet kgotsa gongwe tota ga ba batle go itse.” Mo nakong e re tshelang mo go yone, go kotsi gore batsadi ba bo ba sa itshwenye ka gore bana ba bone ba tsalana le bomang. A o itse gore bana ba gago ba itisa le bomang, e ka tswa e le ka tlhamalalo kgotsa ka ditsela tse dingwe? Baebele ya re: “Go itlwaelanya le ba ba bosula go senya mekgwa e e  molemo.” (1 Bakorintha 15:33) Ee, go na le lebaka le le go pateletsang gore o ele tlhoko thata batho ba ngwana wa gago a tlwaelanang le bone.

Go amega ka basha ga go akaretse fela go ba sireletsa mo tlhotlheletsong e e bosula. Bana ba tlhoka ditsala tse di siameng. Baebele ya re: “Yo o tsamayang le batho ba ba botlhale o tla nna botlhale.” (Diane 13:20) Ka jalo, o tlhoka go thusa bana ba gago go tlwaelana le batho ba ba siameng—go akaretsa le basha ba ba tlhomang sekao se sentle sa go gakologelwa Mmopi wa bone.—Moreri 12:1.

Jehofa Modimo o kelotlhoko thata ka batho ba a ba dirang ditsala tsa gagwe, mme le rona re tshwanetse go leka go mo etsa. (Pesalema 15:1-5; Baefeso 5:1) Ee, tsela e e molemo go gaisa ya go tshela e o ka e rutang bana ba gago—ka se o se buang le ka sekao sa gago—ke ya go tlhopha ditsala tse di siameng.—2 Bathesalonika 3:6, 7.

▪ Basha ba tlhoka go itlhaloganya. Sengwe sa dilo tsa botlhokwa tse di amanang le go gola ke go itlhaloganya—go nna le dinonofo di le mmalwa tse di farologanyang ngwana yo mongwe mo go ba bangwe botlhe. Seane sengwe sa Baebele sa re: “Ngwanyana o tle a itshenole ka ditiro tsa gagwe.” (Diane 20:11, Baebele e e Boitshepo) Mangwe a maikarabelo a gago jaaka motsadi ke go jalelela melaometheo e e siameng mo dipelong tsa bana ba gago.—Duteronome 6:6, 7.

Ka sekai: Gantsi batsadi ba tlhophela bana ba bone ba bannye se ba tla se aparang letsatsi le letsatsi ba solofetse gore ba tla ithuta tsela ya go apara sentle. A mme o ka akanya ka mogolo wa dingwaga di le 30 a sa ntse a apesiwa ke batsadi ba gagwe? Seo ga se utlwale le e seng! Ka go dirisa tshwantshiso ya diaparo, Baebele e re kgothatsa jaana: “Lo apare botho jo bosha”—botho jo bo tshwanang le jwa ga Keresete. (Bakolosa 3:10) O ka thusa bana ba gago go apara botho jo bosha ka go dirisa kotlhao e e lorato le ‘taolo ya mogopolo.’ (Baefeso 6:4) Mme fa ba ntse ba gola mme ba simolola go ikemela, le bone ba ka nna ba tlhopha go dira “botho jo bosha” go nna “seaparo” sa bone, ba bo bona bo le bontle e bile bo kgatlha.—Duteronome 30:19, 20.

Ipotse: ‘Bana ba me ba ikutlwa jang tota ka melao e e rutiwang mo Lefokong la Modimo? Nka ba thusa jang gore ba “tshele ka go itekanela sentle ga mogopolo”?’ (Tito 2:12) Ga o batle go godisa ngwana yo o kutlo fela fa a bonwa ke batho. Bana ba bangwe ba bonala ba dira sentle thata mo go sengwe le sengwe se ba se bolelelwang, ba sa botse dipotso, ba sa ganetse kgotsa go tsuologa. Mme ngwana yo o dirang fela se o batlang gore a se dire gompieno a ka nna a dira se lefatshe le batlang gore a se dire ka moso. Ka jalo, thapisa bana ba gago go godisa ‘maatla a bone a go akanya.’ (Baroma 12:1) Ba thuse go bona gore ke ka ntlha yang fa melaometheo ya Baebele e utlwala le kafa e re solegelang molemo rotlhe ka gone.—Isaia 48:17, 18.

Ee, go thusa basha go lebana le dikgwetlho tsa bone go tlhoka maiteko a magolo. Mme melemo ya gone e megolo thata! Fa bana ba gago ba tshela ka melaometheo e e siameng, o ka kgona go bua ka pelo yotlhe o re ruri bana ke “boswa jo bo tswang kwa go Jehofa.”—Pesalema 127:3.

[Ditshwantsho mo go tsebe 9]

Thusa bana ba gago go tlhopha ditsala tse di siameng tsa Bakeresete