“Sedirisiwa se se Molemolemo sa go Ruta!”

Ke se modiredi mongwe wa nako e e tletseng wa Basupi ba ga Jehofa wa kwa Panama a ileng a se kwala malebana le buka e e nang le setlhogo se se reng Totatota Baebele e Ruta Eng?—ya ditshwantsho tse dintle, ya ditsebe di le 224, e gone jaanong e dirisiwang gongwe le gongwe e le sedirisiwa se se thusang go ithuta Baebele. O ne a re: “E kwadilwe ka tsela e e khutshwane, e e lomaganang le e e tlhatswang pelo. Tsela e e sa tlwaelegang e ditshupiso le dintlha tse di oketsegileng di dirisitsweng ka yone e kgothaletsa motho ka bonako fela go dira dipatlisiso.”

Morutisi mongwe wa Baebele kwa Missouri, U.S.A., o ne a bolela jaana: “Ke rata tsela e e bonolo e e kwadilweng ka yone. Tsela e ditlhogo tsa teng di latelanang ka yone e kwadilwe ka tsela e e utlwalang sentle go gaisa epe e nkileng ka e bona.” Fa buka ya Totatota Baebele e Ruta Eng? e sena go gololwa fela, morutisi yono o ne a e isetsa mosadi mongwe yo a kileng a leka go ithuta Baebele le ene mme a ile a kgobega marapo moragonyana.

Morutisi yono o tlhalosa jaana: “O ne a ise a fetse go bala kgaolo ya ntlha fa a ne a mphounela go mpolelela kafa a itumelelang go bala buka eno ka gone.” Mosadi yono o ne a bolela gore o ne a ikutlwa e kete buka eno e ne e kwaletswe ene le gore o ne a batla go boa a ithuta Baebele gape. Morutisi a re fa ba sena go ithuta dikgaolo tsa ntlha tse di lesome mmogo, go ne go itumedisa tota go bona boitumelo jwa moithuti yono ka se a neng a se ithuta.

Le mororo buka ya Totatota Baebele e Ruta Eng? e ise e fetse dingwaga tse pedi e le gone, go setse go gatisitswe dikhopi tsa yone tse di fetang dimilione di le 50 ka dipuo tse di fetang 150. O ka nna wa kopa khopi ya gago ka go tlatsa setlankana seno o bo o se romela kwa atereseng e e mo go sone kgotsa kwa atereseng e e tshwanetseng mo lenaaneng le le mo tsebeng ya 5 ya makasine ono.

▫ Kwantle ga go ipofa, ke kopa buka e e bontshitsweng fano. Bontsha gore ka puo efe.

▫ Tsweetswee ikgolaganyeng le nna malebana le thuto ya mahala ya legae ya Baebele.