Lebaka La go Bo ke Tlogetse Diserekise

Jaaka go boletse Marcelo Neím

KE TSHOLETSWE kwa Montevideo kwa Uruguay. Le fa gone batsadi ba me ba ne ba boifa Modimo ba ne ba se mo bodumeding bope. Mmè o ne a tlhokafala mo kotsing fa ke ne ke le dingwaga di ka nna nnè, mme ke ne ka godisiwa ke ba losika ba ba neng ba leka go nkgodisa ka melaometheo e e siameng. Fa ke le dingwaga di le 20, ke ne ka dira tshwetso ya gore ke etele mafelo gore ke tle ke itse dinaga le ditso tse di farologaneng.

Kwa Colombia ke ne ka simolola go bereka mo diserekising ke le mothusi. Ke ne ka bona kafa badiragatsi ba lebegang ba itumetse ka teng fa batho ba ne ba ba opela diatla, mme ka batla go nna mongwe wa bone. Ka jalo ke ne ka simolola go ithuta go dira motshameko mongwe wa dibaesekele ke nna ke fokotsa bogolo jwa tsone, go fitlha ke kgona go dira motshameko ono ka baesekele e nnye go di gaisa tsotlhe ya boleele jwa disentimetara di le 12 fela—nngwe ya dibaesekele tse dinnye thata go gaisa mo lefatsheng. E ne e felela yotlhe mo seatleng sa me. Ke ne ka simolola go tuma go se kae mo karolong e kgolo ya Amerika Borwa. Fa ke le dingwaga di le 25, ke ne ka fitlha kwa Mexico mme ka bereka mo diserekising di le mmalwa.

Botshelo Jwa me bo Fetoga Thata

Ke ne ke rata botshelo jwa diserekise. Re ne re tsamaya thata, re nna mo dihoteleng tse dintle go gaisa re ja kwa diresetšhurenteng tsa maemo a a kwa godimo. Ka nako e e tshwanang ke ne ke utlwa botshelo jwa me bo le lolea mme ke ne ke se na tsholofelo epe ka isagwe. Motshegare mongwe botshelo jwa me bo ile jwa fetoga. Motshwaramarapo wa serekise o ne a nnaya buka e a neng a e neilwe e e nang le setlhogo se se reng Tshenolo—Konelo ya Yone e Molemolemo e Atametse! Fa re sena go diragatsa ke ne ka e bala go fitlha diura tsa mo mosong. Le fa go ne go se motlhofo go tlhaloganya buka eno, ke ne ke kgatlhiwa ke tlhaloso ya sebatana sa mmala o bohibidu jo bo letlhololo le seaka sa Tshenolo. (Tshenolo 17:3–18:8) Morago ga foo, nako nngwe fa ke ntse ke phepafatsa tereilara e ke neng ke e rekile, ke ne ka bona buka e nngwe ya setlhogo se se reng O Ka Tshelela Ruri mo Lefatsheng la Paradaise. Yone e ne le motlhofonyana go e tlhaloganya, mme ka bonako fela ke ne ka lemoga gore ke tshwanetse go rera. Ka jalo, ke ne ka simolola ka bonako go bolelela mongwe le mongwe yo ke kopanang le ene ka se ke se ithutileng.

Fa nako e ntse e tsamaya, ke ne ka akanya gore ke tshwanetse go ikgolaganya le Basupi ba ga Jehofa. Nomoro ya thelefouno ya mosetsana yo o neng a neile tsala  ya me buka, e ne e le mo bukeng ya Tshenolo. Ka jalo, ke ne ka founa mme rraagwe o ne a ntaletsa go ya kwa kopanong ya Basupi ba ga Jehofa ya kgaolo kwa Tijuana, Mexico. Ke ne ka kgatlhwa ke lorato lo lo neng lo bontshiwa koo mme ka tlhatswega pelo gore ke bodumedi jwa boammaaruri. Gongwe le gongwe kwa diserekise di neng di ya gone, ke ne ke ya kwa Holong ya Bogosi ya lefelo leo mme ke senka dikgatiso ke bo ke di tsamaisa.

Go ne ga diragala sengwe se se neng sa ntlhatswa pelo le go feta gore ke mo tseleng e e siameng. Basupi ba ne ba ntaletsa go ya kwa Segopotsong sa loso lwa ga Keresete mme ba ntlhalosetsa gore go botlhokwa jang gore Bakeresete ba nne teng. E ne e le bosigo joo diserekise di neng di simolola ka jone mme ke ne ke akanya gore go ka se kgonege gore ke ye. Ke ne ka rapela Jehofa ka tlhoafalo ka seno, mme go ne ga direga sengwe se se gakgamatsang. Diura di le pedi pele ga tiragatso ya rona, motlakase o ne wa tima! Ka jalo, ke ne ka kgona go ya kwa Segopotsong mme moragonyana ka tla go diragatsa. Go ne go bonala mo go nna e kete Jehofa o ne a arabile thapelo ya me.

Ka nako nngwe, ke ne ke ntse ke tsamaisa dipampitshana fa ke ntse ke letile mo moleng wa banka. Mogolwane mongwe wa Mokeresete o ne a mpona mme a nkakgolela tlhoafalo ya me. O ne a nkgothaletsa gore ke akanyetse go rera le phuthego. O ne a ntlhalosetsa ka lorato gore ke tlhoka go dira diphetogo dingwe mo botshelong jwa me gore ke tle ke kgone go dira jalo. Ka nako ya fa ke ne ke ikaeletse go dira diphetogo tseno, ke ne ka fiwa tshono ya tiro e e duelang madi a a kwa godimo mo diserekising kwa United States. Ke ne ke le pelopedi. Ke ne ke batla go ya United States mme fa ke ne nka dumela go ya, ke ne ke sa itse gore go tla diragala eng ka tsela e ke sa tswang go e simolola. Eno e ne e le teko ya me ya ntlha mme ke ne ke sa batle go swabisa Jehofa. Le fa batho ba ke neng ke bereka le bone ba ne ba sa batle go dumela se ke se dirang, ke ne ka tlogela diserekise, ka kopanela ka metlha le phuthego, ka kgaola moriri wa me o moleele, ka ba ka dira diphetogo tse dingwe mo botshelong jwa me gore ke tle ke kgone go direla Jehofa.

Botshelo Jo bo Kgotsofatsang Jo ke Sa bo Ikwatlhaeleng

Ka 1997 pelenyana fela ga ke kolobediwa go nna mongwe wa Basupi ba ga Jehofa, ke ne ka nna le teko ya me ya bobedi—ka fiwa tshono e nngwe gape ya go ya kwa United States, mo lekgetlhong leno e le go ya go diragatsa mo thulaganyong e e tumileng ya thelebishene kwa Miami ke duelelwa ditshenyegelo tsotlhe. Mme ke ne ke batla go bontsha boineelo jwa me mo go Jehofa ka go kolobediwa. Ke ne ka se ka ka amogela tiro eo mme baemedi ba thulaganyo eo ba ne ba gakgamala thata.

Batho bangwe ba mpotsa gore a ga ke ikwatlhaele go bo ke ile ka tlogela diserekise. Karabo ya me ke gore nka se ka le ka motlha ka ananya botsalano jo ke nang le jone le Jehofa le lorato lwa gagwe ka botshelo jo ke neng ke bo tshela pele. Le fa gone tiro ya me ya go nna mmoledi wa nako e e tletseng wa Mokeresete e sa dire gore ke tume kgotsa go nna le dikhumo tsa lefatshe leno, ga ke tlhole ke ikutlwa ke le lolea fela. Ke na le tsholofelo e ntle ya go tshela mo lefatsheng la paradaise le go boa ke amogela mmè mo tsogong ya baswi.—Johane 5:28, 29.

[Ntlha e e kwa tlase]

E gatisitswe ke Basupi ba ga Jehofa.