Setlhaketlhake sa Christmas—Lebaka La go Bo re Ne re Se Etetse

KA MOKWADI WA TSOGANG! KWA FIJI

SETLHAKETLHAKE sa Kiritimati (se bitsega e le Ki-ris-masʹ, kgotsa Christmas) ke sengwe sa ditlhaketlhake tse dikgolo go di feta tsotlhe tse 33 tsa kwa Lewatleng la Phasifiki tse di bopang setšhaba sa Kiribati. * Setlhaketlhake seno se na le disekweremetara di ka nna 388 tsa lefatshe, e leng se se lekanang le ditlhaketlhake tse 32 tsa Kiribati di kopane. Batho ba ka nna 5 000 ba nna kwa Setlhaketlhakeng sa Christmas, mme palo yotlhe ya batho ba ba nnang kwa ditlhaketlhakeng tsa Kiribati ke 92 000.

Ditlhaketlhake tsotlhe tsa Kiribati ke tsa korale mme ke se le sengwe fela se e seng sa korale. Setlhaketlhake sa Christmas ga se sone fela setlhaketlhake se segolo se se nang le dikorale, mme gape se na le naga e kgolo thata go gaisa ditlhaketlhake tsotlhe mo lefatsheng!

Mo godimo ga moo, setlhaketlhake sa Christmas se lemotshega ka ntlha ya bogaufi jwa sone le mola o o mo mmapeng o o farologanyang dinako tsa dinaga (international date line). Batho ba koo ke bone ba ntlha go itumelela tshimologo ya letsatsi le lesha, ngwaga o mosha, le ditiragalo tsa ngwaga le ngwaga, tse di jaaka go swa ga Jesu Keresete. *

Mo godimo ga moo, setlhaketlhake seno se se kgakala se se nang le dikorale ke sengwe sa tse di botlhokwa thata se dinonyane tsa lewatle di beelang mae mo go sone sa Boboatsatsi. Ga se kgale jalo fa go ne go twe dinonyane tsa sooty tern tse di dimilione di le 25 di beela mae ka metlha mo setlhaketlhakeng seno.

Sephiri sa Dinonyane Jaanong se a Itsiwe

Fa moribolodi Kapotene James Cook a goroga mono pele ga Keresemose ka 1977, go ne go se na batho ba ba nnang mo setlhaketlhake seno. Mme se ne se tletse ka dinonyane. Cook o ne a se bitsa setlhaketlhake sa Christmas. * Ka dingwagangwaga lefelo leno le ne le sa itsiwe fa e se ke dinonyane fela.

Mo go lengwe la maeto a rona motlhokomedi wa Diphologolo tsa Tlhago o ne a re tseisa loeto lo lo itumedisang. Fa motlhokomedi a re isa kwa lobopong, dinonyane tse ditshweu tsa di-tern tse di neng di batla go bona gore go direga eng di ne tsa fofela kwa go rona. Fa di ntse  di tshamekela fa godimo ga rona, di ne di ntse di lebile kgato nngwe le nngwe e re e tsayang.

Kwa morago ga lobopo fa fatshe go ne go na le setlhopha sa dinonyane tsa sooty tern. Dikete di le makgolokgolo tsa dinonyane tseno di tla mo setlhaketlhakeng sa Christmas go tla go godisa mamphorwana a tsone. Fa di goroga di fofa di le dintsi bosigo le motshegare ka dibekebeke di nna di dikologa di dira modumo, mo lefelong le di beelang mae mo go lone, di emetse dinonyane tse dingwe gore di tle pele di ka kotama go beela mae fa fatshe.

Mamphorwana a dinonyane tseno a simolola loeto lwa one go kgabaganya lewatle fa a na le dikgwedi di ka nna tharo. Ga a boele mo lefatsheng go fitlhela a nna le dingwaga di le tlhano go ya go di le supa, fa di setse di siametse go beela mae. Ka dingwaga tseo tsa fa di seyo, nako e ntsi di a bo di le mo moyeng di fofa. Ga di na oli e lekaneng mo mafofeng a tsone gore di tle di kokobale mo godimo ga metsi.

Re ne ra bona di-noddy tse dintsho di dutse mo godimo ga dintlhaga le mamphorwana a tsone le mae a a iseng a thuthuge. Le fa dinonyane tseno tsa mo lewatleng di agela mamphorwana a tsone sentlhaga, di-tern tse ditshweu tsone ga di dire jalo. Di beela mae a tsone mo dikaleng tsa setlhare tse di se nang sepe. Ka lesego, mamphorwana a tsone a thuthuga a setse a na le maoto le dinala tse di godileng sentle, a a siametseng go ka kgona go kgomarela mo setlhareng. Fa re bona mamphorwana ano a a nang le maboanyana a kgomaretse mo dikaleng tsa setlhare re ne ra kgatlhega thata. Batsadi ba tsone le bone ba bantle ka mmala o mosweusweu ka melomo e mentsho e e farologaneng le mebele ya tsone.

Fa re ntse re le mo loetong, nonyane ya lewatle ya setlhaketlhake sa Christmas e e neng e dutse e sa sute mo godimo ga lee la yone e ne e re lebile ka kelotlhoko mo lefelong la yone le le sireletsegileng. Setlhaketlhake sa Christmas se na le setlhopha se segolo go gaisa tsotlhe mo lefatsheng sa dinonyane tse di mogatla o o bopegileng jaaka foroko. Mme gape ke lefelo la bofelo le le itsiweng le dinonyane tsa Polynesian storm petrel le tsa Phoenix petrel di beelang mae mo go lone. Dingwe tsa dinonyane tse di beelang mae koo, ke nonyane e e mogatla o mohibidu ya boboatsatsi, masked booby, brown booby, red-footed booby, brown noddy, le nonyane ya lewatle e e ratang go phamola dijo mo go tse dingwe.

Dinonyane tseno tse di ratang go phamolela tse dingwe dijo di fofa ka matsetseleko fa godimo, di diragatsa mathaithai mo lefaufaung, di phamola ditlhapi mo dinonyaneng tse dingwe, le go lwela dithathana tsa dijo tse di latlhilweng ke batshwaraditlhapi. Matsetseleko ano a a tlhokega ka gonne nonyane eno ga e kgone go kotama motlhofo fela mo godimo ga metsi. Jaaka dinonyane tsa sooty tern, mafofa a tsone ga a kgone go e sireletsa gore e se ka ya koloba, mo godimo ga moo,  diphuka tsa tsone tse di boleele jwa dimetara tse 1,8 di dira gore go se nne motlhofo gore e fofe.

Re ne ra lemoga gore nonyane e re neng re e bone e ne e le Pacific golden plover. Ke nngwe ya dinonyane tse di fudugang tse di dirisang setlhaketlhake sa Christmas go iphepa ka dijo le go ikhutsa koo ka mariga morago ga go fofa sekgala se seleele sa dikilometara tse dintsi go tswa kwa lefelong la tsone la go beela mae, di kgabaganya Arctic Circle. Bokgoni jwa tsone jo bo matsetseleko jwa go kgona go fofa sekgala se seleele bo di thusa gore di kgone go fofa dikilometara di le 2,100 go ya kwa lefelong le di kopanang gone kwa borwa jwa Honolulu, Hawaii.

Lebaka le le Kgethegileng la Loeto Lwa Rona

Ka metlha re etela setlhaketlhake sa Christmas, e seng go bona dinonyane fela, mme e le go kopana le badumedi mmogo le rona ba Basupi ba ga Jehofa ba ba nnang koo go kopanela mmogo le bone mo dipokanong le mo tirong ya go rera. Go nna mo lefelong le le kgakala ga Basupi bano ba ba rategang ke kgwetlho e kgolo. Ka sekai, dingwaga tse dintsi tse di fetileng fa Mosupi mongwe a tlhokafala go sa lebelelwa, mosadi wa gagwe yo o tlhokafaletsweng o ne a tshwanelwa ke go neela puo ya phitlho ka boene ka gonne go ne go se na ope yo o neng a ka dira jalo. O ne a batla gore botlhe ba ba tlileng phitlhong ba utlwe tsholofetso ya Baebele ka baswi.—Johane 11:25; Ditiro 24:15.

Kwantle ga dithanolo tse tharo tse di molemo tsa Baebele, go na le dikgatiso di le mmalwa tsa Baebele tsa dipuo tse di buiwang koo. Le fa go ntse jalo, Basupi ba ga Jehofa ba gatisa makasine wa Tora ya Tebelo wa mebala e mene ka kgwedi, ka puo ya Se-Gilbert go akaretsa le dikgatiso tse dingwe tsa Baebele. Seno se gakgamatsa batho ba le bantsi ka gonne ke batho ba ba kwa tlase ga 100 000 fela mo lefatsheng ba ba buang puo eno. Dikgatiso tseno tse di theilweng mo Baebeleng di thusa setlhopha seno sa Basupi se se nnang kwa lefelong le le kwa kgakala, go tshwara dipokano tsa sone tsa ka metlha le gore se kgone go diragatsa taelo ya ga Jesu ya go rera dikgang tse di molemo tsa Bogosi jwa Modimo.—Mathaio 24:14; Bahebera 10:24, 25.

Dipalangwa ke bothata mo bathong ba ba etelang lefelo leno. Mme le fa go ntse jalo, mo setlhaketlhakeng sa Christmas motho a ka kgona go tsamaya ka koloi go tswa Lontone go ya Poland a ralala Tennessee mo diureng di le tharo fela! Seno se ka kgonega jang? Banana, Lontone, Paris, Poland, Tennessee, le Tabwakea ke maina a a kgatlhang a metse, a a gopotsang batho ka baeti ba bangwe ba ntlhantlha ba ba ileng ba etela setlhaketlhake seno.

Mo go lengwe la maeto a rona, ngaka nngwe e e pelonomi e ne ya re laletsa go tsamaya le yone kwa Poland, mme seno sa re naya tshono ya go rera koo ka lekgetlho la ntlhantlha. E re ka re ne re ka dirisa diura di le pedi fela koo, re ne ra taboga re rera ka ntlo le ntlo e le gore re tle re kgone go fitlhelela matlo otlhe. Mongwe le mongwe yo re neng re bua le ene o ne a reetsa molaetsa wa rona wa Baebele ka kanaanelo le go amogela dikgatiso tsa rona, tse ba neng ba sa dumele gore di kwadilwe ka puo ya bone.

Re rata batho bano ba ba botsalano ba ba nnang mo setlhaketlhakeng seno se se kgakala sa Christmas. Mme gape, re rata le dinonyane tsa lefelo leno tse dintle. Bogologolo Kapotene Cook a ka tswa a ile a akanya gore setlhaketlhake seno ke sa dinonyane fela, mme gompieno batho ba le bantsi ba ka se dumelane le seo. Le bone fela jaaka dinonyane tseno ke legae la bone.

[Dintlha tse di kwa tlase]

[Dimmapa mo go tsebe 16]

(Go bona mokwalo o o feletseng, leba kgatiso)

Setlhaketlhake sa “Christmas”

Banana

Tabwakea

Lontone

Paris

Poland

Mola o o mo mmapeng o o farologanyang dinako tsa dinaga

[Setshwantsho mo go tsebe 16]

Dinonyane tsa lewatle tse di ratang go phamolela tse dingwe dijo

[Motswedi wa Setshwantsho]

GaryKramer.net

[Setshwantsho mo go tsebe 17]

Nonyane e tshweu ya “tern”

[Motswedi wa Setshwantsho]

© Doug Perrine/SeaPics.com

[Setshwantsho mo go tsebe 17]

Di-brown booby

[Motswedi wa Setshwantsho]

Valerie & Ron Taylor/​ardea.com

[Setshwantsho mo go tsebe 18]

Re rera le Basupi ba lefelo leo

[Setshwantsho mo go tsebe 18]

GaryKramer.net