Sengwe se se Botoka go Feta “Makhubu a Lewatle”

Jaaka go Boletse Karl Heinz Schwoerer

Ke tshotswe ka 1952 kwa Pittsburgh, Pennsylvania, U.S.A., mme ke goletse kwa New Smyrna Beach, Florida. Fa ke ne ke le mosha ke ne ke rata thata motshameko wa go sesa fa godimo ga makhubu a lewatle. Tota e bile, e ne e le sone selo sa botlhokwa mo botshelong jwa me.

KA 1970, ke ne ka tsenela Embry-Riddle Aeronautical University kwa Daytona Beach, Florida, ka maikaelelo a gore ke tla nna mofofisi wa difofane tsa kgwebo. Le fa go ntse jalo, ke ne ka simolola go swabisiwa thata ke puso, ka gonne e ne ya simolola go tsosa ntwa kgatlhanong le Vietnam, e ke neng ke akanya gore e ne e sa tshwanela tota. E re ka ke ne ke swabisitswe ke tsamaiso yotlhe, fela jaaka le basha bangwe ba nako eo, ke ne ka tlogela sekolo mme ka tshela botshelo jwa mahipi. Ke ne ke na le moriri o moleele e bile ke dirisa diokobatsi.

Go ise go ye kae, ke ne ka kopana le Susan, kgarebe e e ratang go intsha e bile a na le bokgoni jo bogolo mo go penteng le go tsaya ditshwantsho. Ke ne ka lemoga gore fa re ka tshela botshelo jo bo sa raraanang, nka dira tiro ya go aga dikgwedi tse thataro go ya go tse robedi mo Florida mme re ka kgona go ya go iketla ngwaga otlhe kwa mabopong a Phasifiki a Mexico le kwa Amerika Bogare.

Go Tshwenyega ka Dilo Tse di Tlhokegang Semoyeng

Go tshela botshelo jo bo se nang matshwenyego mo mabopong a mantle a boboatsatsi—le Sue a ntse a penta le go tsaya ditshwantsho mme nna ke ntse ke sesa fa godimo ga makhubu seo se ne se itumedisa eleruri. Mme morago ga dingwaga di le mmalwa, re ne ra lemoga gore botshelo jwa rona bo ne bo sa kgotsofatse. Go ne go na le sengwe se re se tlhokang. Ka ntlha ya seo, mo magareng ga 1975, fa re ntse re le mo lebopong la Phasifiki la Costa Rica, ke ne ka simolola go batla tshedimosetso ya semoya. Ke ne ka simolola go bala dibuka tsa ditumelo tsa kwa Botlhaba le tsa difilosofi, tse di neng di itsege thata mo metlheng eo.

E re ka dibuka tse ke neng ke di bala gantsi di ne di nopola Baebele go supa gore di bua boammaaruri, ke ne ke tsaya gore go raya gore Baebele ke yone motheo wa boammmaaruri. Ka jalo ke ne ka rekisa dithuthuntshwane tse di dirang gore motho a bone dipono, gore ke tle ke nne le Baebele ya bogologolo ya King James Version. Maitseboa mangwe le mangwe, fa ke sena go sesa fa godimo ga makhubu moso otlhe, ke ne ke nna fa fatshe ke bo ke bala Baebele. Go sa kgathalesege tsela e ke neng ke tlhoafaletse go bala Baebele ka yone, ke ne ke sa ntse ke sa e tlhaloganye sentle.

“A o Na le Dipotso Dingwe ka Baebele?”

Ka August 1975 fa re ne re tswa kwa Costa Rica re ya kwa United States, re ne ra ema mo khemising nngwe kwa El Salvador go reka molemo mongwe. Fa re ntse re tshwere bothata jwa go bua le rakhemisi, moreki mongwe yo o bidiwang Jenny o ne a ithaopela gore thusa. Jenny e ne e le mosetsana wa Moamerika wa dingwaga tse 16 yo o kgonang go bua Se-Spain sentle. O ne a re bolelela gore ene le batsadi ba gagwe ke Basupi ba ga Jehofa mme ba ne ba tshwanelwa ke go fudugela El Salvador go tla go ruta batho Baebele.

Jenny o ne a mpotsa jaana: “A o na le dipotso dingwe ka Baebele?”

“Ee di teng!,” ke ne ka araba jalo. Go sa kgathalasege tsela e re neng re lebega ka yone ya bohipi,  Jenny o ne a re laletsa gone foo go ya kwa gaabo gore re kopane le batsadi ba gagwe, e bong Joe le Nancy Trembley. Re ne ra amogela taletso ya gagwe. Mme ra fetsa thapama yotlhe re botsa dipotso tsa Baebele, re ne ra gakgamadiwa thata ke tsela e Joe le Nancy ba neng ba araba dipotso tsa rona ka yone. Ba ne ba ntse ba re, “Bula lekwalo leno mo Baebeleng ya gago mme o le bale.”

Ka bonako fela e ne e setse e le maitseboa, ka jalo ba ne ba re kopa gore re robale mo ntlong ya bone. Le fa go ntse jalo, ga ba a ka ba re letla go robala mmogo mo kamoreng e le nngwe, gonne re ne re sa nyalana. Mo gare ga bosigo, Sue le Jenny ba ne ba sa robale ba ntse ba tlotla ka dikgang tse dintsi tsa Baebele—ba tlotla ka kgang ya ga Adame go ya go Haramagedona.

Baebele e Tala

Letsatsi le le latelang, pele ga re tsamaya Joe le Nancy ba ne ba re fa dikhopi tse dintsi tsa dimakasine tsa Tora ya Tebelo le Tsogang!, dibuka dingwe le Baebele. E ne e le Baebele ya Thanolo ya Lefatshe le Lesha ya Dikwalo tse di Boitshepo, e ka nako eo e neng e gatisiwa ka khabara e thata e tala. Joe o ne gape a re isa kwa Holong ya Bogosi. E ne e le kago e ntle, e e bile e se maphatsiphatsi e Basupi ba ga Jehofa ba kopanelang mo go yone go tla go ithuta Baebele. ‘A bo e ne e farologane jang ne, le dikereke tse di maphatsiphatsi tsa ditumelo tse di ipitsang tsa Bokeresete, tse batho ba rutiwang Baebele go le gonnye fela!’

Moragonyana mo go lone letsatsi leo, fa re sena go fitlha fa molelwaneng wa Guatemala re ne ra phuruphudiwa pele re kgabaganya molelwane, mme Baebele e tala e re neng re e tshotse e ne ya akabatsa balaodi. Ba ne ba gakgametse ka gonne ba ne ba itse gore gantsi e ne e dirisiwa ke Basupi ba ga Jehofa. Le fa go ntse jalo, re ne re sa lebege jaaka Basupi. Le fa re ne re lebega ka tsela e ba neng ba re bona ka yone, balaodi bano ba ne ba re tlogela gore re tsamaye morago ga metsotso e le mmalwa. Seno se ne sa re gakgamatsa ka gonne gantsi ba ne ba tle ba phuruphutshe koloi ya rona le dilo tsa rona ba batlana le diokobatsi kgotsa dilo tse di utswitsweng. Ka jalo re ne ra simolola go leba Baebele e tala jaaka pheko.

Fa re ntse re tsweletse re bala Baebele le dibuka tse di thusang go ithuta Baebele, re ne re tlhatswegile pelo gore re bone boammaaruri ka Modimo. Fa re ntse re tsamaya ka koloi go ralala Mexico, ke ne ke itumeletse go sesa mo makhubung kwa Puerto Escondido—e leng lefelo le ke neng ke rata go sesa kwa go lone. Fa ke sena go itumelela go sesa mo godimo ga “makhubu” ao, ke ne ka boela kwa Florida, ke ikemiseditse go nna mongwe wa batlhanka ba ga Jehofa.

Ke ne ka fetsa dibeke tse pedi ke ntse ke sesa fa godimo ga makhubu mo mesong. Mo maitseboeng fa ke ntse mo lobopong ke ne ke bala Baebele le dibuka dingwe tse di thusang go ithuta Baebele. Baebele e tala e ne ya ngoka mosetsana wa dingwaga tse robedi, yo o neng a gatelela gore re isa golo gongwe mo maitseboeng. Re ne re sa itse gore o re isa kae, mme gone re ne re itse gore go amana le Baebele e tala. Re ne re sa batle, mme o ne a nna a re laletsa. Kgabagare morago ga malatsi a se kae re ne ra tsamaya le ene. O ne a re isa kwa Holong ya Bogosi ya Basupi ba ga Jehofa, e e agilweng ka lotlhaka lwa bambuse mme e ruletswe ka bojang. Mongwe le mongwe koo o ne a re dumedisa ka matsogo le ka go re tlamparela jaaka e kete kgale re le ditsala.

 Re ne ra kgatlhiwa ke maitseo a batho ba ba neng ba le gone. Bana bangwe ba ne ba re lebile thata kwa dipokanong, gongwe e ne e le la ntlha ba bona batho ba meriri e blonde e bile e le meleele jaana. Batsadi ba bone ba ne gangwe le gape ba tshwanela ke go ba gopotsa gore ba tlhwaye tsebe. Mme e bile, Jehofa o dirisitse ngwana yo o tshwanang le bone go re tlisa mo dipokanong tsa rona tsa ntlha.

Go Ikemisetsa go Direla Jehofa

Morago ga dibeke tse pedi ke ntse ke itumelela go sesa mo makhubung, ke ne ka rekisa didirisiwa tse ke neng ke sesa ka tsone, mme re ne ra ya ka tlhamalalo kwa Florida. Fa re le koo re ne ra simolola go ithuta Baebele le Basupi ba ga Jehofa mme ra nna teng le kwa dipokanong tsotlhe tsa phuthego. E re ka re ne re ikemiseditse go direla Jehofa re ne ra tlogela go nna mmogo ka re ne re sa nyalana gape ra tlogela le go itisa le bao e neng e le ditsala tsa rona pele. Ke ne ka beola ditedu ka ba ka ntsha le moriri, Sue ene o ne a ithekela mesese e mmalwa. Dikgwedi tse nné moragonyana re ne ra nyalana, mme ka April 1976, re ne ra kolobediwa go bontsha boineelo jwa rona jwa go direla Modimo.

Jaanong re tshela matshelo a a nang le maikaelelo. E le go leboga Jehofa go bo a re segofaditse, re ne re tlhoafaletse go boela kwa nageng e go buiwang Se-Spain kwa go yone e le gore re tle re rere dikgang tse di molemo tsa Bogosi jwa Modimo. Bagolwane ba Bakeresete mo phuthegong ya rona ba ne ba re gakolola jaana: “Lo se ka lwa tsamaya pele. Ikageng pele semoyeng gore le tle lo kgone go nna le sengwe se lo ka thusang ba bangwe ka sone fa le fitlha koo.” Re ne ra amogela kgakololo ya bone, mme morago ra ipeela mokgele wa go nna babulatsela, bareri ba nako e e tletseng ba Basupi ba ga Jehofa.

Sue o ne a simolola go nna mmulatsela ka January 1978. Le nna ke ne ke batla go nna mmulatsela, mme ke ne ke kolota yunibesithi madi a mantsi. Ke ne ka tla ka tharabololo e e bonolo. Ke ne ke tla ipolela kafa molaong gore ga ke kgone go duela melato ya me ka gonne ke sa dire mme ke bo ke gololesegile go ka nna mmulatsela.

Le fa go ntse jalo, bagolwane ba ne ba ganana le leano leo, ba ile ba ntlhalosetsa gore go tla bo go sa tsamaisane le melaometheo ya Baebele, e e batlang gore re ‘ikanyege mo dilong tsotlhe.’ (Bahebera 13:18) Ka jalo, ke ne ka tswelela go dira gore ke tle ke duele dikoloto tsa me. Kgabagare, ka September 1979, ke ne ka fitlhelela mokgele wa me wa go kopanela le Sue mo tirong ya bobulatsela. Morago ga foo, ka go tlhofofatsa matshelo a rona, ke ne ke bereka malatsi a se makae fela mo bekeng gore ke kgone go tlamela lelapa.

Go Direla Kwa Bethele ya Brooklyn

Ka April 1980, re na le sebaka se se ka fa tlase ga ngwaga re le babulatsela, re ne ra gakgamadiwa thata ke sengwe se re neng re sa se solofela. Pelenyana fa go ne go dirilwe kopo ya badiri ba ba tla thusang mo tirong ya kago, re ne ra tsenya dikopo tsa go direla kwa Bethele, ntlokgolo ya diofisi tsa Basupi ba ga Jehofa kwa Brooklyn, New York. Re ne ra lalediwa go tla mo malatsing a le 30 kwa Bethele! Re ne re na le maikutlo a a tlhakatlhakaneng, gonne re ne re itumelela tiro ya bobulatsela thata. E re ka re ne re sa itse gore re direng, re ne ra bua le bagolwane ba babedi ka kgang eno, mme ba ne ba re thusa go bona gore e ne e le tshiamelo e kgolo e re neng re e newa. Ba ne ba re gakolola jaana: “Lekang go direla kwa Bethele ngwaga fela.” Ka jalo re ne ra rekisa sengwe le sengwe se re neng re na le sone, mme ra ya kwa Brooklyn.

Morago ga go dira mo tirong ya go aga ka dingwaga di le pedi, ke ne ka kopiwa go direla mo Ofising ya Kago ya Boenjenere, mme ke ne ka thapisiwa mo go tlhameng dikago. Sue ene o ne a le mo go dirwang dibuka gone sebaka sa ngwaga, mme morago o ne a kopiwa go direla mo Lephateng la Ditshwantsho. Ngwaga le ngwaga fa re gopola letsatsi la lenyalo la rona, re akanya ka ngwaga o o fetileng re bo re sekaseka maemo a rona le dikeletso tsa rona re bo re swetsa gore a re tla tswelela re direla mo Bethele.

Fa dingwaga di ntse di feta, re ne ra nna le ditsala tse di molemo thata. Mo godimo ga moo, e re ka Bethele e ne e re naya sebaka sa go direla Jehofa le bakaulengwe mo lefatsheng lotlhe ka tsela e e molemo, re ne ra ititaya sehuba gore re tla tswelela go direla mo Bethele. Ka 1989 re ne ra simolola go ithuta Se-Spain, mme seo sa dira gore re abelwe go ya go direla kwa phuthegong e e buang puo eno mo Brooklyn. Ka ntlha ya seno, re ne re ikutlwa re tshwere kafa le kafa—go direla mo Bethele le mo phuthegong e e buang puo e sele.

Nako nngwe Jenny, yo go builweng ka ene kwa pelenyana, o ne a re etela mo Bethele ya Brooklyn, go ne go itumedisa go utlwa a re tlotlela ka nako e a neng a kopana le rona ka yone kwa El Salvador. O  ne a le mo thutong ya gagwe ya Baebele mme a simolola go lwala. Fa a le mo tseleng a boela kwa gae, o ne a ya kwa khemising nngwe gore a reke molemo. Ka mabaka mangwe ga a ka a ya kwa khemising e a tlwaetseng go ya kwa go yone, mme a ya kwa go e re neng re le kwa go yone.

Go Direla Kwa Dinageng Tse Dingwe

Letsatsi lengwe ka 1999, molebedi wa lephata la me kwa Bethele o ne a mpotsa potso eno ke sa lebelela, “A o ka rata go ya kwa lekaleng la Australia go ya go thusa ka porojeke nngwe mo lephateng la Ofisi ya Kgaolo ya Boenjenere ka dikgwedi tse tharo?”

“Ee,” ke ne ka araba jalo kwantle ga go okaoka. Ka bonako fela re ne ra ya Australia, mme ra direla koo dingwaga tse tharo. Go ne go itumedisa go thusa ka dipolane tsa dikago tsa makala a dinaga tsa Botlhaba le tsa South Pacific. Fa re boela kwa Brooklyn ka 2003, go ne go na le sengwe gape se re neng re sa se lebelela. Re ne ra abelwa gape go direla kwa nageng e sele—go ya go direla mo lephateng la Ofisi ya Kgaolo ya go Agiwa ga Diholo Tsa Bogosi ya lekala la Brazil, sekgalanyana se se rileng go tswa mo toropong e kgolo ya São Paulo.

Re sa ntse re direla koo le gompieno. Ofisi eno e okamela tiro ya go agiwa ga Diholo tsa Bogosi mo dinageng tse dintsi tsa Amerika Borwa. Kabelo ya me e akaretsa go thusa ka tiro eo ya go aga le go rotloetsa ba ba dirang mo diporojekeng tse dintsi tse di tshwanang le yone—mme Sue o kgona go tsamaya le nna.

Go Dira Gore Dilo Tse di Tlang Pele di Nne Tsa Pele

Gone mme ke sa ntse ke rata go sesa fa godimo ga makhubu, mme ke bone sengwe se se molemo go feta go “go sesa mo makhubung ao.” Ka jalo, ke sesa ka nako e e tshwanetseng, e le fela go itapolosa. Ka tshegetso e e lorato ya ga Sue, ke tsepamisitse mogopolo wa me mo go sengwe se se botlhokwa le go feta, go direla Jehofa Modimo.

Maikaelelo a rona a magolo jaanong ke go dirisa matshelo le bokgoni jwa rona mo go tsweletseng dikgatlhego tsa Bogosi pele le go tsweledisa pele kobamelo e e phepa ya ga Jehofa Modimo. Re ithutile gore selo sa botlhokwa le go feta, ga se gore re direla Jehofa kae, mme ke gore re mo direle ka pelo yotlhe gongwe le gongwe kwa re leng gone.—Bakolosa 3:23.

[Mafoko a a mo go tsebe 25]

“Ke sa ntse ke itumelela go sesa fa godimo ga makhubu, mme ke bone sengwe se se molemo go feta makhubu ao”

[Setshwantsho mo go tsebe 22, 23]

Setshwantsho sa me ke sesa fa godimo ga makhubu, se se neng sa dirisiwa mo Summer Surf Festival

[Setshwantsho mo go tsebe 23]

Fa ke ne ke na le dingwaga tse 13

[Setshwantsho mo go tsebe 23]

Ke fitlhetse botshelo jwa me jwa bohipi bo sa nkgotsofatse

[Ditshwantsho mo go tsebe 25]

Kwa Godimo: Ke thusa ka go agiwa ga Holo ya Bogosi Kafa Mojeng: Nna le Sue gompieno