Baebele ya Reng

A o Tshwanetse go Duedisiwa Ditirelo Tsa Bodumedi?

MO DINAGENG di le dintsi, baeteledipele ba madumedi a a ipitsang a Bokeresete le madumedi a e seng a Bokeresete ba duedisetsa batho ditirelo tsa bodumedi. Ditirelo tseno di ka nna tsa akaretsa dikolobetso, manyalo kgotsa diphitlho. Dituelo tseno e ka nna makgolo a diranta mme ka dinako tse dingwe e nne diketekete tsa diranta.

Baruti bangwe ba duelwa ke puso ka ntlha ya go dira ditiro dingwe tsa meletlo le tsa boruti le tsa go bula ditirelo tsa semolao ka thapelo letsatsi le letsatsi. Batho ba ka tswa ba anaanela ditirelo tse di ntseng jalo mme e bile le dikereke di na le ditshenyegelo tse di tshwanetseng go duelelwa. A mme Baebele e tshegetsa ditlwaelo tse di ntseng jalo tsa go duedisa batho ditirelo tsa bodumedi kgotsa le e leng go dira gore batho ba ikutlwe ba patelesega go duela?

A ke “Ntlo ya Thekisetso”?

Fa Jesu Keresete a ne a le mo lefatsheng, baeteledipele ba bodumedi ba Bajuda le batho ba bangwe ba ne ba dirisa dikokoano tsa bodumedi gore e nne tshono ya go dira madi, segolobogolo ka nako ya Tlolaganyo. A Jesu o ne a tsaya tlwaelo eno e siame? Nnyaa! Tota e bile, Baebele e re bolelela gore o ne a “tsholola madi a tshipi a baananyi ba madi a ba a pitikolola ditafole tsa bone.” O ne a re: “Tlogelang go dira ntlo ya ga Rre ntlo ya thekisetso!”—Johane 2:14-16.

Go ile ga direga se se tshwanang ka nako ya ga moporofeti Mika, yo o neng a tshela mo lekgolong la borobedi la dingwaga B.C.E. Baebele e bega gore baeteledipele ba bodumedi ba kwa Iseraele ba ne ba ‘tlhoile tshiamiso’ mme baperesiti ba ne ba ‘ruta fela ba gabile tlhwatlhwa.’ Le fa go ntse jalo, ka nako e tshwanang, ba ne ba bolela gore ba tshegediwa ke Modimo ba re: “A Jehofa ga a mo gare ga rona?” (Mika 3:9, 11) Mme Jehofa Modimo o ne a se mo gare ga bone go ba tshegetsa. Go na le moo, o ne a tlhoile boitshwaro jwa bone mme a tlhalosa seo sentle thata ka moporofeti wa gagwe.

Gompieno baeteledipele ba le bantsi ba bodumedi ba dirisa yone mekgwa eo ya bogagapa, mme ka tsela eo ba dira gore mafelo a bone a kobamelo e nne ‘matlo a thekisetso.’ Tota e bile, mekgatlho ya bodumedi yotlhe e na le seabe mo kgwebong mme gantsi e atlega thata mo go rekiseng ditshwantsho tsa bodumedi le dilo tse dingwe tse dintsi tsa bodumedi. *—1 Johane 5:21.

“Lo Amogetse Mahala, Nayang Mahala”

Fa Jesu a ne a laela baaposetoloi ba gagwe go rera dikgang tse di molemo, go alafa batho ba ba  lwalang, le e leng go tsosa ba ba suleng, o ne a bolela jaana: “Lo amogetse mahala, nayang mahala.” (Mathaio 10:7, 8) Ebu, balatedi ba gagwe ba boammaaruri ba ne ba sa tshwanela go duedisa batho ditirelo tsa bone. Mo godimo ga moo, Jesu ka boene o ne a tlhoma sekao ka go direla batho ba bangwe kwantle ga go ba duedisa.

Ka go latela sekao se se tlhomilweng ke Jesu, moaposetoloi Paulo o ne a dira bodiredi jwa gagwe “kwantle ga tuelo.” (1 Bakorintha 9:18) Fa a ne a tlhoka madi, o ne a dira tiro ya boitshediso e le modiri wa megope. (Ditiro 18:1-3) Ka jalo, o ne a bolela jaana ka ene le balekane ba gagwe ba barongwa: “Ga re babapatsi ba lefoko la Modimo jaaka batho ba le bantsi ba ntse.” (2 Bakorintha 2:17) Mme go tweng ka go batla madi a a tla dirisiwang mo phuthegong, gongwe e le a go reka kgotsa go hira lefelo la kobamelo?

“Modimo o Rata yo o Nayang ka Boitumelo”

Basupi ba ga Jehofa ba bona madi a a tlhokegang ka meneelo ya boithatelo. Ba dirisa molaomotheo ono: “A mongwe le mongwe a dire fela jaaka a sweditse mo pelong ya gagwe, e seng ka go ikgoga fela kgotsa ka go patelelwa, gonne Modimo o rata yo o nayang ka boitumelo.” (2 Bakorintha 9:7) Ka ntlha ya seo, Basupi ga ba duedisetse batho dikgatiso tsa bone kgotsa go ba duedisetsa ditirelo tsa bodumedi tse di jaaka go kolobetsa batho, manyalo kgotsa diphitlho. Mme e bile ga ba ntshe ditsabosome kgotsa go tsamaisa poleiti ya dikoleke kwa dipokanong tsa bone. Ope fela yo o batlang go ntsha moneelo ka ntlha ya tiro ya go rera e e dirwang mo lefatsheng lotlhe, a ka dira jalo ka go tsenya moneelo ono mo mabokosong a moneelo a a beilweng sentle mo mafelong a bone a kobamelo.

Mo lefatsheng lotlhe, Basupi ba ga Jehofa ba ntsha meneelo ya boithatelo go duelela Diholo tsa bone tsa Bogosi, Diholo tsa Dikopano, diofisi tsa makala le mafelo a a gatisang dikgatiso tsa bone mmogo le ditiro tsa namolo. Ba bangwe, jaaka motlholagadi yo o humanegileng yo Jesu a neng a mo akgola, ba kgona go ntsha moneelo o monnye fela. (Luke 21:2) Ba bangwe ba kgona go ntsha moneelo o montsi. Le fa maemo e ka tswa e le afe, ba ba latelang melaometheo e e kwadilweng mo Baebeleng mme ba ntsha meneelo go ya ka se ba nang le sone, ba nna le kgotsofalo, ba bona masego a magolo a a tswang kwa Modimong e bile ba nna le boitumelo jwa mmatota.—Ditiro 20:35; 2 Bakorintha 8:12.

[Ntlha e e kwa tlase]

A O KILE WA IPOTSA GORE. . .

● Jesu o ne a raya batho ba ba neng ba dira kgwebo mo tempeleng a reng?—Johane 2:14-16.

● A moaposetoloi wa Mokeresete e bong Paulo o ne a amogela tuelo ka ntlha ya ditirelo tsa bodumedi?—2 Bakorintha 2:17.

● Jehofa o itumedisiwa ke go naya go go ntseng jang?—2 Bakorintha 9:7.

[Mafoko a a mo go tsebe 23]

“Tlogelang go dira ntlo ya ga Rre ntlo ya thekisetso!”—Johane 2:14-16.