“Boammaaruri bo Tla lo Golola”!

MAFOKO ao a ga Jesu Keresete a a fitlhelwang mo Baebeleng mo go Johane 8:32, ke boammaaruri jo bo nnelang ruri. Boammaaruri joo bo re golola mo tumelobotlhoding le mo dingwaong tse di sa itumediseng Modimo le tse di ka re gobatsang. Maitemogelo a a latelang a bontsha kafa boammaaruri jwa Baebele bo golotseng batho ba ba tswang kwa dinageng tse di farologaneng ka teng mo dingwaong tse di imelang tse di amanang le Keresemose.

Boammaaruri Jwa Baebele bo ba Golotse!

Argentina Oscar a re: “Lelapa la gaetsho le ile la gololwa mo mathateng a a amanang le go ja thata, go nwa bobe le go reka dimpho tse di neng di ja madi a mantsi tse re neng re sa di kgone.”

Mario o ne a ikutlwa a gololesegile thata fa a ne a senolelwa se a se bitsang “maaka a Keresemose.” A re: “Gone jaanong ke na le boipelo jo bogolo jwa go bontsha ba bangwe gore ke a ba anaanela ka go ba abela dimpho nako nngwe le nngwe mo ngwageng  le fa ke na le madi a a lekaneng go dira jalo.”

Canada Elfie o ne a kwala jaana: “Ke rata go aba le go abelwa dimpho. Mme ga ke rate go amogela mpho e mong wa yone a neng a ikutlwa a patelesega go e nkabela. Fa lelapa la rona le ne le tlogela go keteka Keresemose, re ne ra ikutlwa re gololesegile!”

Ulli, mongwe wa bomorwadia Elfie, o gakologelwa jaana: “Fa batsadi ba rona ba ne ba tlogela go keteka Keresemose, ba ne ba re direla dilo tse di itumedisang re sa lebelela kgotsa ba re fa dimpho nako nngwe le nngwe mo ngwageng mme re ne re rata seno fela thata! Fa bana ba re neng re tsena tlelase le bone ba re botsa gore ke ka ntlha yang fa re reketswe dimpho, re ne re ba raya jaana re le motlotlo, ‘Ba re reketse fela!’ Le fa go ntse jalo, go dira diphetogo gore re tshele ka boammaaruri jwa Baebele go ne go se motlhofo mo batsading ba rona, ka gonne ba losika ba ne ba ba ganetsa le go ba gatelela. Mme ba ile ba ema ba nitame. Go bona kafa ba ikemiseditseng ka teng go obamela Jehofa Modimo ka tsela e a e amogelang go ile ga nna le tlhotlheletso e kgolo mo go nna.”

Mo go Silvia, go tlogela go keteka Keresemose e ne e le “kgololosego.” A re: “Morago ga moo, ke ne ka itumela thata! Ke ne ke itse gore ke itumedisa Jehofa Modimo mme seno se ne se dira gore ke ikutlwe botoka go feta go keteka Keresemose gantsintsi.”

Kenya Peter o ne a kwala jaana: “Fa ke ne ke sa ntse ke keteka Keresemose, ke ne ke adima madi a mantsi thata gore ke kgone go reka dimpho le dijo tsa maemo a a kwa godimo. Mme gone, seno se ne se raya gore ke tshwanetse go bereka diura tse di oketsegileng mme go dira jalo, go ne go ntseela nako e nkabong ke e fetsa le ba lelapa la me. A bo ke ile ka itumela jang ne fa ke ne ke gololesega mo dilong tseo tsotlhe!”

Carolyne a re: “Ke aba e bile ke amogela dimpho go tswa go ba lelapa le ditsala ka nako nngwe le nngwe. Ke dumela gore go newa dimpho tse di ntseng jalo, tse o sa di lebelelang e bile di tswa pelong, ke tsone tse di molemo go gaisa.”

Japane Hiroshi le Rie ba kwala jaana: “Bana ba rona ga ba a wela mo seraing sa go nna ba lebeletse go amogela dimpho mme ba bo ba sa di anaanele. Rona batsadi re itumela thata go ba bona ba tlhaloganya gore go aba go tshwanetse ga tswa mo pelong.”

Keiko o gakologelwa jaana: “Lelapa la rona le ne le tlwaetse go keteka Keresemose. Fa re ne re tlhomamisegile gore morwaarona o setse a thulametse, nna le monna wa me re ne re a tle re beye mpho fa thoko ga bolao jwa gagwe. Mo mosong o o latelang, re ne re a tle re mo reye re re: ‘Santa o go file mpho ka gonne o ntse o le mosimane yo o itshwereng sentle.’ Morago ga gore ke ithute boammaaruri ka Keresemose le go bolelela morwaake se ke se ithutileng, o ne a gamarega a bo a lela ka go bo re ne re mo tsieditse. Ka yone nako eo, ke ile ka lemoga gore Keresemose tota ga se selo se sentle jaaka e tlhalosiwa. Go na le moo, ke maaka mme ka go nna ke a boaboeletsa, ke ne ka ikutlwa ke tsieditse morwaake.”

Philippines Dave a re: “Go thata go tlhalosa sentle mo lekwalong leno boipelo jo Jehofa a bo re neileng ka go re bontsha boammaaruri jo bo itshekileng jo bo mo Baebeleng. Fa maloko a lelapa la rona a abela batho ba bangwe dimpho, ga re lebelele sepe go tswa mo go bone. Mme re aba go tswa pelong.”

Batho ba ba umakilweng fa godimo ke bangwe fela mo go ba le dimilione ba ba ileng ba ithuta go tswa mo go se se ba diragaletseng gore boammaaruri jwa Baebele bo golola batho. Se se botlhokwa le go feta ke gore, fa re tshela go dumalana le boammaaruri joo, re itumedisa pelo ya Modimo. (Diane 27:11) Jesu Keresete o ne a re: ‘Baobamedi ba boammaaruri ba tla obamela Rara ka moya le boammaaruri, gonne, eleruri, Rara o batla ba ba ntseng jalo go mo obamela.’ (Johane 4:23) Fa Modimo a leba pelo ya gago, a o bona motho yo o tlhologeletsweng go itse boammaaruri? Re solofela gore karabo ya potso eno ke ee yo o utlwalang sentle!

[Setshwantsho mo go tsebe 9]

Bakeresete ba aba ka lorato mme e le ka nako nngwe le nngwe mo ngwageng