“Ke ne Ke sa Kgone go e Baya fa Fatshe!”

● Basha go ralala lefatshe ba ile ba tlhalosa kafa ba anaanelang buka ya Dipotso Tse Basha ba di Botsang—Dikarabo Tse di Nang le Tharabololo, Bolumo 2, * ka teng. Ela tlhoko dikai dingwe:

“Ke anaanela lebaka la gore buka eno e re rotloetsa gore re buisane le batsadi ba rona. Ke dirisitse dikakantsho tsa yone mme gone jaanong nka bolela gore puisano ya me le batsadi ba me e tokafetse.”—Roberto, Mexico.

“Fa ke setse ke simolotse go bala buka eno, ke ne ke sa kgone go e baya fa fatshe! Ke rata tsebe ya ‘Se ke se Ikaeletseng!’ kwa bofelong jwa kgaolo nngwe le nngwe le tsebe ya setlhogo se se reng ‘Dintlha Ka ga Me’ kwa bofelong jwa karolo nngwe le nngwe ya buka eno. Buka eno e ile ya nthusa go buelela dilo tse ke di dumelang kwa sekolong.”—Joelah, United States.

“Fa ke ntse ke tswelela go e bala, tshedimosetso e e mo bukeng eno e ne ya nkama le go feta. Ke ne ka kgatlhiwa ke se se builweng ke basha ba le bantsi, mmogo le mabokoso a a nang le setlhogo se se reng ‘A o Ne o Itse?’ le a a reng ‘Kakantsho.’ Buka eno e dira gore ke tlhatswege pelo gore Setlhopha se se Laolang sa Basupi ba ga Jehofa se kgatlhegela basha!”—Hui-won, Korea Borwa.

 “Mo dibukeng tsotlhe tse di gatisitsweng ke Basupi ba ga Jehofa, buka eno ke yone e ke ratang go e bala thata. Lo itse sentle gore basha ba akanya ka eng le gore ba lebana le mathata a a ntseng jang mo lelapeng, kwa sekolong le mathata a ba nang le one le ditsala tsa bone.”—Shana, Canada.

“Nako le nako fa batsadi ba me ba omana, ke ne ke ya kwa phaposing ya me ke bo ke lela. Mme fa ke sena go bala kgaolo 24 ya setlhogo se se reng, ‘Ke Direng fa Batsadi Ba me Ba Omana?,’ ke ne ka kgona go bua le batsadi ba me ka gone. Ba ne ba gakgamala go lemoga gore dikomano tsa bone di ne di nkama fela thata. Le bone ba ne ba bala kgaolo eno. Gone jaanong, ba tlhaloganya botoka kafa ke ikutlwang ka teng mme ga ba tlhole ba omana thata.”—Mariana, Czech Republic.

“Ditsebe tse di nang le setlhogo se se reng ‘Sekao se se Molemo’ di ile tsa nkama thata mme di nthusitse gore ke tokafatse makoa a me. Ka sekai, go thata mo go nna go tlwaelana le batho ba ke sa ba itseng sentle mo phuthegong ya Bokeresete. Mme tsebe 97 e tlhalosa kafa Lidia a ileng a kgona go itse Paulo le ditsala tsa gagwe botoka ka teng ka go ba laletsa kwa legaeng la gagwe. Gone jaanong ke leka go etsa sekao sa gagwe.”—Mónika, Hungary.

[Ntlha e e kwa tlase]

[Lebokoso/Setshwantsho mo go tsebe  25]

“GO TLHAKANELA DIKOBO PELE GA LENYALO—LEBAKA LA GO BO GO LE PHOSO”

Katrina, mosetsana mongwe wa dingwaga di le 16 wa kwa United States, o ne a filwe kabelo ya go neela puo mo tlelaseng ka setlhogo se ene a se itlhophetseng. Ka go dirisa buka ya Dipotso Tse Basha ba di Botsang—Dikarabo Tse di Nang le Tharabololo, Bolumo 2, ka tsela e e molemo, o ne a tlhopha setlhogo se se reng “Go Tlhakanela Dikobo Pele ga Lenyalo—Lebaka La go Bo go Le Phoso.” Batsadi ba gagwe ba tlhalosa jaana: “Mo puong ya gagwe, Katrina o ne a tlhalosa lefoko ‘boikgapo,’ a tlhalosa dikotsi tsa go tlhakanela dikobo pele ga lenyalo a bo a tlhalosa le ditlamorago tse di utlwisang botlhoko tsa go tlola melao ya Modimo ya boitsholo. Gape Katrina o ne a bala mafoko mangwe a a builweng ke basha bangwe, a a bontshang kafa ba ileng ba ikutlwa ka teng fa ba sena go tlola melao ya Modimo. Morago ga foo, o ne a kopa bana ba ba mo tlelaseng le ene gore ba botse dipotso mme o ne a kgona go di araba. Morago ga puisano ya gagwe, morutabana wa ga Katrina o ne a mo naya lekwalonyana le bontlhanngwe jwa lone le neng le balega jaana: ‘Ke a go leboga go bo o buile boammaaruri le go bo o tlisitse lesedi mo lefatsheng le le lefifi leno. Nna o nonofile mo tumelong.’”