Mpho ya Mmino

O AKANYA gore botshelo bo ka nna jang kwantle ga mmino? Go se na dipina tse di kuruetsang bana. Go se na dipina tsa marato. Go se na dipina tse di tumileng tse di tletseng botshelo. Go se na disimfoni tse di amang maikutlo. E bile go se na mmino o o lapolosang. Batho ba le bantsi ba ka akanya gore botshelo bo ka lapisa pelo kwantle ga mmino.

Ee, mmino o ka ama maikutlo a rona ka ditsela tse di farologaneng. Mmino o a re ritibatsa le go re itumedisa, o a re lapolosa le go re tlhotlheletsa. O dira gore re itumele thata e bile o dira gore re lele. Mo godimo ga moo, e re ka mmino o ka ama maikutlo a rona, o maatla. Ke eng fa mmino o re tlhotlheletsa jalo? Karabo e motlhofo tota: Mmino ke mpho e ntle e e tswang kwa Modimong. (Jakobe 1:17) E re ka e le mpho e e tswang kwa Modimong, o tshwanetse go anaanelwa, o tshwanetse go aga e bile o tshwanetse go fitlhelelwa ke batho botlhe—basha le bagolo.

Mmino ga o bolo go nna teng. Ka sekai, bosupi jo bo bonweng ke baithutamarope bo bontsha gore makgolokgolo a dingwaga pele ga Motlha wa Rona, merafe ya Baafrika e ne e tshameka meropa, e letsa manaka le ditleloko. Ba-China ba bogologolo ba ne ba tshameka mofuta mongwe wa seletswa sa molomo (harmonica) le di-panpipe. Batho ba kwa Egepeto, India, Iseraele le Mesopotamia ba ne ba tshameka harepa. Gongwe lekgetlho le mmino o ileng wa umakiwa ka tlhamalalo ka lone mo hisitoring ke mo Baebeleng mo go Genesise 4:21. Foo, re utlwa gore monna mongwe yo o bidiwang Jubale e ne e le “mosimolodi wa botlhe ba ba tsholang harepa le lotlhaka.” Makgolokgolo a dingwaga moragonyana, Kgosi Solomone wa Iseraele o ne a kgatlhegela mmino thata mme a bona logong lo lo molemo go gaisa gore go dirwe diharepa le diletswa tse dingwe tsa megala.—1 Dikgosi 10:11, 12.

Gone mme, gore o itumelele mmino wa diletswa mo metlheng eo, o ne o tshwanetse go itse go tshameka seletswa sa mmino kgotsa go reetsa mongwe yo o itseng go se tshameka. Le fa go ntse jalo, mo motlheng wa rona, batho ba le dimilione ba kgona go reetsa mmino ka go tobetsa fela konopo ya khomputara. Eleruri, mefuta yotlhe ya mmino e ka rekotiwa kgotsa ya tsewa go tswa mo Internet e bo e tshamekiwa ka didirisiwa tse di kgonang go tsena mo potleng ya gago. Patlisiso nngwe e e dirilweng ka 2009 kwa nageng nngwe ya Bophirima e fitlhetse gore bana ba dingwaga tse di fa gare ga 8 le 18 ba fetsa diura tse di fetang di le pedi ka letsatsi ba reeditse mmino le dilo tse dingwe tse di rekotilweng.

Mokgwa ono o o tlwaelegileng o re thusa go tlhaloganya lebaka la go bo mmino le didirisiwa tse dingwe tsa one e le dilo tse di rekwang thata. Ee ruri, mmino ke kgwebo e kgolo. Mme a o kile wa ipotsa gore ke eng se se dirang gore pina e tume?

[Lebokoso/Setshwantsho mo go tsebe  3]

Mmino mo Internet

GO TSAYA MMINO MO INTERNET: Gantsi batho ba duelela sengwe le sengwe se ba se tsayang mo Internet mme e bo e nna sa bone. Ba bangwe ba dira dipeeletso—gantsi ka dikonteraka tsa founo kgotsa dilo dingwe tse ba di rekileng—tse ba ka kgonang go tsaya mmino mo Internet ka tsone le go o tshameka fela ka nako e ba sa ntseng ba na le konteraka ka yone.

GO REETSA MMINO MO INTERNET: Mmino o o anamisiwang ka khomputara o bareetsi ba kgonang go o tshameka ka yone nako eo kwantle ga gore ba ipolokele difaele tsa one. Bontsi jwa mmino o o reediwang mo Internet ga o duelelwe, le fa gone mongwe wa one o ka bonwa fela ka peeletso.

[Tšhate/Ditshwantsho mo go tsebe 3]

(Go bona mokwalo o o feletseng, leba kgatiso)

Dilo Tse di Kgatlhang ka Metswedi ya Tshedimosetso ya go Rekota

Bo1880

Rekoto ya fonokerafa

Bo1890

Segatisa modumo sa megala

Bo1940

Theipe

Bo1960

Khasete

Bo1980

Compact disc (CD)

Bo1990

Difaele tsa ileketeroniki (MP3, AAC, WAV, jalo le jalo.)