Ditiragalo Tsa Lefatshe

Kwa Jeremane, masea a le 7 mo go a le 10 a setse a na le tshedimosetso ya bone mo Internet. Batsadi ba tsenya tshedimosetso ya masea a bone mo Internet le go a direla diaterese tsa e-mail kgotsa go tsenya ditshwantsho tsa one le ditshwantsho tsa ultrasound mo Internet. Le fa go ntse jalo, baitse ba gakolola batsadi go nna kelotlhoko ka gonne ditshwantsho tse di tsentsweng mo Internet di tla ama ngwana botshelo jwa gagwe jotlhe.—BABY UND FAMILIE, JEREMANE.

Go ya ka dipalopalo tsa puso, ngwaga le ngwaga kwa Russia basadi ba le 14 000 ba swa ka ntlha ya tirisodikgoka mo lelapeng.—RIA NOVOSTI, RUSSIA.

Kapoko e e wang kwa Mount Everest kwa bogodimong jwa dimetara di le 6 858 go ya go di le 7 752 e na le selekanyo sa botlhole jwa arsenic le metale wa cadmium tse go tsewang di le kotsi mo metsing a a nowang. Go akanngwa gore dilo tse di kgotlelang tse di dirwang ke batho ke tsone tse di bakang seno.—SOIL SURVEY HORIZONS, U.S.A.

Khampani e e leng yone fela e e letleletsweng go gatisa Dibaebele kwa China e sa tswa go gatisa khopi ya yone ya milione wa bo80. Khampani eno e gatisa Dibaebele di le milione kgwedi le kgwedi—kwatara ya Dibaebele tsotlhe tse di gatisiwang gone jaanong mo lefatsheng lotlhe.—XINHUA, CHINA.

“Diperesente tse di fetang lesome go sekae tsa bagolo ba kwa Amerika (diperesente di le 10,1) ba tlogetse kereke ya Katoliki morago ga gore ba godisiwe e le Bakatoliki.”—NATIONAL CATHOLIC REPORTER, U.S.A.

Masetlapelo a Tlholego a 2010

Khampani nngwe ya diinshorense e e di gogang kwa pele e begile masetlapelo a tlholego a le 950 mo lefatsheng lotlhe ka 2010 mme a feta palogotlhe ya masetlapelo a le 785 a ngwaga le ngwaga mo dingwageng di le lesome tse di fetileng. Masetlapelo a a maswe le go feta e ne e le dithoromo tsa lefatshe tsa kwa Chile, China le Haiti; merwalela e e neng ya khurumetsa Pakistan; le mogote o o boitshegang kwa Russia, kwa batho ba le bantsi ba ileng ba swa ka ntlha ya mogote le go kgotlelwa ga moya. Go ralala bokone jwa Yuropa, molora o o tswang kwa lekgwamolelong lengwe la kwa Iceland ga wa ka wa senya ka tlhamalalo mme o batlile o dira gore difofane di se ka tsa tlhola di fofa. Kwa Australia dipula tse pedi tse di maatla tsa sefako di ile tsa baka tshenyo e e fetang madi a a kana ka R13 701 953 000. Lokwalodikgang lwa The Telegraph lwa kwa Lontone lwa re: “Palogotlhe ya madi a a senyegileng, go akaretsa le ditshenyegelo tse di sa duelelwang ke inshorense, e ile ya tlhatloga go nna diranta di le dibilione di le 891,3, go tswa go diranta di le dibilione di le 343,1 tsa ngogola.”

A Ba-Neanderthal Ba ne Ba Tshwana le Rona?

Makasine wa New Scientist wa re: “Kgopolo e e sa bolong go nna teng ya gore Ba-Neanderthal ba ne ba le kwa tlase ga batho e a fetoga e re ka go ile ga lemogiwa gore bokgoni bongwe le bongwe jo go neng go akanngwa gore ke rona fela re nang le jone le bone ba ne ba na le jone.” Dilo tse di ribolotsweng bosheng di bontsha gore Ba-Neanderthal ba ne ba aga manno le maiso, ba ne ba laola molelo, ba apara diaparo, ba apaya dijo, ba dira dithulusu e bile ba dira sekgomaretsi gore ba kgomaretse metswi mo marumong a bone. Gape go na le bosupi jwa gore ba ne ba tlhokomela batho ba ba lwalang, ba apara mekgabisa e e tshwantshetsang sengwe e bile ba fitlha baswi ba bone. Go ya ka Erik Trinkaus yo e leng porofesa wa thutomotho kwa Washington University, St. Louis, Missouri, U.S.A., “Ba-Neanderthal e ne e le batho e bile gongwe ba ne ba kgona go akanya fela jaaka rona.”