A o ne o itse . . . ? Gantsi India e dira difilimi tse di fetang sekete ka ngwaga—difilimi di le dintsi go feta naga epe e nngwe.

Se o tshwanetseng go se tila. Difilimi di le dintsi di rotloetsa mekgwa e e sa dumalaneng le melao ya Baebele. Dingwe di bontsha tlhakanelodikobo le thubakanyo jaaka di ntse, fa tse dingwe tsone di bontsha maatla a a fetang a tlholego. Mme Baebele ya re: “Di tloseng tsotlhe mo go lona, tšhakgalo, bogale, bosula, puo ya go kgoba, le puo e e ferosang sebete.” (Bakolosa 3:8) Mo godimo ga moo, Modimo o kgala ditiro dipe fela tse di amanang le tirisabadimo.—Duteronome 18:10-13.

Kafa o ka tlhophang ka gone. “Fa papatso ya filimi e lebega e sa siama, nka se lebelele filimi eo.”—Jerrine. *

“Ga nke ke amogela dikakantsho tsa motho yo mongwe kwantle ga fa ke itse gore motho yoo o tshela ka melao e e tshwanang le ya me.”—Caitlyn.

“Fa ke lebeletse filimi kwa lefelong la go bogela difilimi mme ke bo ke simolola go ikutlwa ke sa gololesega ka se se bontshiwang, ke tswa ke tsamaya.”—Marina.

“Go nthusa go bona gore filimi e tla bo e na le eng, ke dirisa lefelo la Internet le le tla nnayang tshedimosetso ya gore a e tla bo e na le tlhakanelodikobo, thubakanyo le matlhapa.”—Natasha.

Ntlha e o ka e dirisang: Batla difilimi tse go ka se diregeng gore di nne le dilo tse di sa siamang. Mosha mongwe yo o bidiwang Masami, a re: “Ke itumelela thata difilimi tse di buang ka metlha ya bogologolo—difilimi tse di theilweng mo dibukeng tse di molemo.”

A o ne o itse . . . ? Go gatisiwa dibuka tse di fetang sekete beke nngwe le nngwe kwa United States fela.

Se o tshwanetseng go se tila. Fela jaaka go ntse ka difilimi, dibuka di le dintsi di rotloetsa mekgwa e e sa dumalaneng le melao ya Baebele. Ka sekai, dingwe di bua ka tlhakanelodikobo fela jaaka e ntse kgotsa di bua ka tirisabadimo. Mme Baebele ya re: “A kgokafalo le boitshekologo jwa mofuta mongwe le mongwe kgotsa bogagaru di se ka tsa ba tsa umakwa mo go lona.” (Baefeso 5:3) Gape ya re ditiro tsa tirisabadimo di “bosula mo matlhong a ga Jehofa.”—2 Dikgosi 17:17.

Kafa o ka tlhophang ka gone. “Fa ke batla buka e e molemo, ke bala tsebe e e ka fa morago le go leba ditlhogo tsa yone. Fa ke bona sengwe se se sa siamang, ga ke e reke.”—Marie.

“Fa ke ntse ke gola mme ke simolola go itirela ditshwetso, ke ne ka lemoga botlhokwa jwa go reetsa segakolodi sa me. Fa ke ne ke lemoga gore buka ga e a siama, ke ne ke tlogela go e bala. Ke ne ke lemoga gore ga e tsamaisane le tsela e Modimo a akanyang ka yone.”—Corinne.

Ntlha e o ka e dirisang: Bala dibuka tse di farologaneng. “Ke lemogile gore ke kgona go tlhoma mogopolo thata mo dibukeng tse di molemo go na le ditlhamane tsa segompieno. Dibuka tseno di kwadilwe ka tsela e e molemo e bile di botoka go na le ditlhamane tsa segompieno.”—Lara, 17.

A o ne o itse . . . ? Dikhampani di le nnè tse dikgolo tse di rekotang mmino, fa di kopantswe di golola dialebamo tse di ka nnang 30 000 ka ngwaga.

Se o tshwanetseng go se tila. Fela jaaka go ntse ka difilimi le dibuka, bontsi jwa mmino wa gompieno o na le boitsholo jo bo sa siamang. Dipina tse di nang le mafoko a a tlhalosang tlhakanelodikobo fela jaaka e ntse le dibidio tsa mmino tse di bontshang tlhakanelodikobo jaaka e ntse di ka dira gore go nne thata le go feta gore o laole dikeletso tsa gago tsa tlhakanelodikobo. (1 Bakorintha 6:18) Leigh wa dingwaga di le 21 a re: “Bontsi jwa mmino wa gompieno o rotloetsa boitsholo jo bo sa dumalaneng le melao ya Baebele mme moribo wa one o dira gore batho ba batle go bina ka tsela e e hepisang.”

Kafa o ka tlhophang ka gone. “Ke ipotsa go re, ‘Fa ke ne ke ka tshwanelwa ke go letla Mokeresete yo o godileng go lebelela lenaane la mmino wa me, a ke ne ke tla tlhabiwa ke ditlhong ka ntlha ya se a tla se bonang?’ Seno se nthusa go bona gore ke tshwanetse go reetsa mmino o o ntseng jang.”—Leanne.

Ntlha e o ka e dirisang. Iketleeletse go reetsa mefuta e e farologaneng ya mmino. Mosha mongwe yo o bidiwang Roberto a re: “Rre o rata mmino wa tlelasiki, ka jalo, ke ne ke o reetsa thata fa ke ntse ke gola. Go ithuta ka mmino wa tlelasiki—gape ke ntse ke ithuta go tshameka piano—go ile ga nthuta dilo tse disha!”