Fa e le gore o batla molekane wa lenyalo, ga go na sepe se se phoso ka go lebelela dilo tse di umakilweng mo tsebeng e e fetileng. Tota e bile o ka nna wa kopana le motho yo o nang le dilo tseno tsotlhe. Boammaaruri ke gore fa nako e ntse e tsamaya, batho ba a fetoga—le maemo a a fetoga.

Sa botlhokwa: Go dira gore lenyalo le atlege, o tshwanetse go lebelela gore go tla direga dilo tse o neng o sa di lebelela.

Dikgang tse di molemo. Dilo dingwe tse o neng o sa di lebelela mo lenyalong e ka nna dilo tse di molemo.

“E re ka gone jaanong re nyalane, ke anaanela thata tsela e Maria * a sa tseyeng dilo masisi ka yone go feta ka nako ya fa re ne re sa ntse re intsha mmogo. Go bo re iteba ka tsela e e tshwanetseng, go ile ga dira gore mathata a re ileng ra kopana le one a se ka a lebega a le masisi thata.”—Mark.

Dikgang tse di seng monate. Dilo dingwe tse o neng o sa di akanya ka lenyalo di ka tswa di sa itumedise. Akanya ka sekai seno.

A re re wena le motho yo e tla nnang molekane wa gago lo ipeetse mokgele wa go nna barongwa kwa nageng e sele. Mme go tla diragala eng fa e re morago ga lenyalo molekane wa gago a bo a tshwarwa ke bolwetse bongwe jo bo masisi jo bo dirang gore lo se tlhole lo kgona go fitlhelela mokgele wa lona? Boammaaruri ke gore go a kgonega e re ka Baebele e re, “dilo tse di bosula di diragalela batho botlhe!” (Moreri 9:11, Holy Bible—Easy-to-Read Version) Ga go na pelaelo gore o tla ngomolwa pelo ke seemo sa molekane wa gago—le go kgobiwa marapo ke go bo o sa fitlhelela mokgele wa gago. Mme fa maemo a a ntseng jalo a a neng a sa lebelelwa a ka nna teng, o tla tshwanelwa ke go amogela se se diragetseng le go dira diphetogo. Boammaaruri ke gore o nyetse motho, e seng mokgele.

Sa botlhokwa: Fela jaaka Baebele e bolela, batho ba ba tsenang mo lenyalong ba tla nna le “pitlagano” nngwe. (1 Bakorintha 7:28) Ka dinako dingwe pitlagano eo e tswa mo maemong a a neng a sa akanngwa.

O ka ipaakanyetsa dilo tse o neng o sa di akanya jang? Fa o tsena mo lenyalong o tla tlhoka go nna le dilo tse pedi.

Le fa lo ka tshwanelana jang le motho yo o tlileng go nyalana le ene, o tshwanetse go lebelela gore

• ga se ka metlha lo tla dumalanang ka sengwe le sengwe.
• ga se ka metlha lo tla lebang dilo tse di botlhokwa thata ka tsela e e tshwanang.
• ga se ka metlha lo tla itumelelang go dira dilo dingwe tse di tshwanang.
• ga se ka metlha o tla ikutlwang o rata motho yo o nyalaneng le ene ka tsela e o neng o mo rata ka yone fa lo ne lo simolola go intsha.

Maemo a a bontshitsweng fa godimo a tlwaelegile. Mme a ka se thube lenyalo la gago ntle le fa o a letla! Gakologelwa gore Baebele ya re lorato “lo itshokela dilo tsotlhe” e bile “ga lo ke lo fela.”—1 Bakorintha 13:4, 7, 8.

Boammaaruri ke gore: Kwa bofelong, selo se se tla dirang gore lenyalo la gago le atlege kgotsa le thubege ga se mathata a o lebanang le one mme ke kafa o a rarabololang ka teng.—Bakolosa 3:13.

Fa wena le molekane wa gago lo ikemiseditse go nna lo le mmogo le fa go ka direga eng, lo tla kgona go rarabolola mathata a lo neng lo sa a lebelela.—Mathaio 19:6.

Batho bangwe ba re go ikanyega mo molekaneng go dira gore lenyalo e nne mokgweleo. Mme gone go dira se se farologaneng le seo! Go ikanyega go dira gore kamano ya lona e nonofe. Fa dilo tse lo neng lo sa di akanya di direga, wena le molekane wa gago lo tla batla ditharabololo, e seng tsela ya go tswa mo lenyalong.

E le gore o nne le moya wa go ikanyega, o tlhoka go tsaya lenyalo la gago jaaka le ntse, e seng go ijesa dijo tsa ditoro. Go bontsha kafa seno se farologanang ka gone, leka ikatiso e e latelang.

1. Akanya o na le thekete ya mahala ya sefofane ya go ya gongwe le gongwe fela kwa o batlang go ya gone mo lefatsheng. O ka tlhopha go ya kae mme ka ntlha yang?

Lefelo:

Lebaka:

• tsela e le lebegang ka yone
• setso
• tlelaemete
• boitlosobodutu
• tse dingwe

2. Akanya thekete ya gago ya sefofane e le ya loeto lwa go ya fela mme e le gore o tla nnela ruri kwa lefelong leo.

Jaanong o ne o tla tlhopha lefelo lefe, fa e le gore le gone?

• Lefelo:
• kgotsa ke ne nka tlhopha go nna mo ke leng teng.

Mo ikatisong e e fa godimo, gongwe lefelo le o le tlhophileng la ntlha ga le tshwane le la bobedi. Le fa a tshwana, gongwe o ile wa tshwanelwa ke go akanya ka tsela e e farologaneng ka tlhopho ya gago ya bobedi. Go na le gore o akanye o le motho yo o tsereng loeto lwa boikhutso yo o iketlileng mo lewatleng kgotsa o tsamaya go itlhabisa phefo mo dithabeng, o tshwanetse go akanya o le moagi wa koo yo o lebanang le melemo le dikgwetlho tsa letsatsi le letsatsi.

Ke yone tsela e o tshwanetseng go leba lenyalo ka yone. Tota e bile fa nako e ntse e tsamaya maemo a ka fetoga. Ga go na pelaelo gore wena le molekane wa gago lo tla fetoga. Gore o atlege o tshwanetse wa kgona go ipaakanyetsa maemo a o neng o sa a lebelela le go dira se se siameng fa maemo ano a tlhaga.

Se o ka akanyang ka sone: Gone jaanong o ise o tsene mo lenyalong, o lebana jang le dilo tse o neng o sa di lebelela mo botshelong?