Tlhokomela Botsogo Jwa Gago
Go tlhokomela botsogo jwa gago go ka dira gore o dire botoka kwa sekolong—e bile go ka dira gore o tshele botoka.
GO A utlwala gore o tlhokomele mmele o Modimo a go o neileng. (Pesalema 139:14) Ka sekai: Akanya o na le koloi mme o sa nke o ipha nako ya go e tlhokomela. E ka bereka lobaka lo lo rileng fela e bo e robega. Go ka direga se se tshwanang le ka mmele wa gago. O tlhoka “tlhokomelo” ya mofuta mang?
Go ikhutsa.
Go sa robale mo go lekaneng go ka dira gore o lebege o na le letsapa e bile go ka dira gore o ikutlwe o se na maatla, o tlhakane tlhogo le eleng go tshwenyega thata mo maikutlong. Go farologana le seo, go ikhutsa mo go lekaneng go tla dira gore o nne le maatla a a oketsegileng. Gape go tla dira gore mmele wa gago o gole ka bonako, ga tokafatsa tsela e boboko jwa gago bo dirang ka yone, ga nonotsha masole a gago a mmele le go tokafatsa maikutlo a gago. Ruri ano ke matswela a a molemo a sengwe se se sa tlhokeng matsapa ape a a kalo!
Ntlha e o ka e dirisang: Fa go kgonega, leka go robala ka nako e e tshwanang bosigo bongwe le bongwe.
Dijo.
Basha ba ba mo dingwageng tsa bolesome ba gola ka bonako. Ka sekai, basimane ba bantsi ba dingwaga tse di fa gare ga 10 le 17 ba oketsa boima jwa bone jwa mmele [e seng mafura] go menagane gabedi. Basetsana le bone ba na le nako e ba golang ka bonako thata ka yone. Mebele e e golang e tlhoka dikotla tse dintsi le maatla. Tlhomamisa gore o naya mmele wa gago dikotla tse o di tlhokang.
Ntlha e o ka e dirisang: O se ka wa tlodisa go ja sefitlholo. Go ja pele o ya sekolong go ka go thusa gore o tokafatse tsela e o tlhomang mogopolo ka yone mme ga dira gore o se ka wa lebala ka bonako.
Go ikatisa.
Baebele e bolela gore “go itshikinya mmele go molemo.” (1 Timotheo 4:8, Baebele e e Boitshepo) Go ka nonotsha mesifa le marapo a gago, ga oketsa maatla a gago, ga laola boima jwa gago jwa mmele, ga tokafatsa bokgoni jwa gago jwa go akanya, ga nonotsha masole a gago a mmele, ga fokotsa kgatelelo ya maikutlo ga ba ga dira gore o itumele. Gone ke boammaaruri gore go ikatisa go ka itumedisa, e re ka go ka akaretsa dilo tse o itumelelang go di dira!
Selo sa botlhokwa: Go robala mo go lekaneng, go ja dijo tse di nang le dikotla le go itshidila mmele ka tsela e e tekatekano go tla thusa gore mmele wa gago o nne o dira sentle. Mme seo se tla go thusa go tokafatsa tsela e o dirang ka yone kwa sekolong. *
Ke eng fa o sa simolole? Simolola thulaganyo ya ka metlha e e tekatekano ya go itshidila mmele. Mo lobakeng lwa kgwedi ela tlhoko dinako tse o tlwaetseng go robala ka tsone le tsela e o jang ka yone, mme o bone gore a o tlhoka go dira diphetogo dingwe.
“Fa ke tsamaya fela go iphutholola maoto, go lebega ke nna le maatla a a oketsegileng—tota le fa ke ne ke lapile fa ke ne ke simolola.”—Jason, New Zealand.
“Ke akanya gore Modimo o dirile dijo gore di neye mebele ya rona maatla, mme ke batla go naya mmele wa me maatla ka dijo tse di tshwanetseng!”—Jill, United States.
“Ke taboga gararo mo bekeng mme gabedi mo bekeng ke palama baesekele kgotsa ke iphutholola maoto ka go tsamaya. Go itshidila mmele go dira gore ke nne le maatla a a oketsegileng mme go fokotsa kgatelelo ya maikutlo.”—Grace, Australia.
^ ser. 9 Go bona tshedimosetso e e oketsegileng malebana le botsogo jwa gago, bona kgaolo 10 ya buka ya Dipotso Tse Basha ba di Botsang—Dikarabo Tse di Nang le Tharabololo, Bolumo 1, e e gatisitsweng ke Basupi ba ga Jehofa.
