ITALY ke naga e e nang le dilo tse di farologaneng—dintshi tsa mawatle tse ditelele le mafelo a a dithaba; dipaka tse di mogote thata kwa borwa le dipaka tsa mariga a a tsididi thata kwa bokone. Gape ke naga e e tletseng makgwamolelo mme ke a se kae fela a a sa ntseng a tle a kgwe molelo—jaaka la Stromboli le Thaba ya Etna.

Italy ke nngwe ya dinaga tse di nang le batho ba le bantsi thata kwa Yuropa. Ditšhaba di le dintsi di kile tsa ralala naga eno, go akaretsa Baarabia, Ba-Byzantine, Bagerika, Ba-Norman le Bafonekia.

Naga eno e na le matlotlo a mantsi a dilo tsa hisitori le tsa botaki. Marope a bogologolo a Gerika le Roma kgotsa dikago tsa motlha wa Baroque le wa Renaissance di eme bontle mo ditoropong tse dintsi tsa kwa Italy. Ditshwantsho tse di pentilweng, difikantswe tsa mmabole le metswedi e e ikagetsweng e bontsha bokgoni jwa ditswerere tse di jaaka Bernini, Michelangelo le Raphael.

Dijo ke karolo e kgolo ya botshelo jwa letsatsi le letsatsi, mme meetlo e mentsi e amana le dijo tse di farologaneng tsa lefelo leno. Gantsi go jewa pasta pele, mme go latele nama kgotsa tlhapi le merogo. Oli ya motlhware e dirisiwa thata e re ka e dirwa ka bontsi mo nageng eno. Pizza le risotto ke dijo tse di itsegeng thata tsa kwa Italy.

 Bantadiana ba itsege e le batho ba ba botsalano ba ba amogelang baeng e bile ba rata batho. Ba rata go tlotla, ka jalo go tlwaelegile go bona batho ba tlotla mo dipatlelong tsa motse kgotsa ba tlotla fa ba ntse ba tsamaya ba iketlile mo mmileng.

Bontsi jwa baagi ba kwa Italy ba bolela fa e le ba bodumedi jwa Roma Katoliki, mme ke ba le mmalwa fela ba ba yang kerekeng ka metlha. Go bolelwa gore mo dingwageng tsa bosheng batho ga ba tlhole ba dira se kereke e se laelang, ka gonne ba itlhokomolosa melao e e sa bolong go tlhomiwa malebana le go senya mpa le tlhalo.

Palo ya Basupi ba ga Jehofa e gola sentle kwa Italy. Ba itsege thata ka go ruta Baebele mo bodireding jwa bone jwa phatlalatsa le ka go tshela ka melao ya yone. Go na le diphuthego tsa Basupi ba ga Jehofa di feta 3 000 mo nageng eno yotlhe mme bontsi jwa diphuthego tseno di leka go fitlhelela batho ba ba buang dipuo tse dingwe kwantle ga Sentadiana. Go bonala go na le tlhokego ya go ruta batho Baebele ka dipuo tsa kwa dinageng di sele ka gonne bosheng jaana palo ya batswakwa kwa Italy e oketsegile go menagane gararo mo dingwageng di le lesome.