1, 2. (a) Re itse jang gore batho ba kgona go nna ditsala tsa Modimo? (b) Re tla sekaseka eng mo setlhogong seno?

GO TLOGA ka nako e re tsholwang ka yone go fitlha ka nako e re tlhokafalang ka yone, re tlhoka go ratwa. Le fa re ka tswa re na le motho yo re mo ratang, re sa ntse re tlhoka go nna le ditsala tse re ntshang seinong le tsone. Mme sa botlhokwa le go feta, re tlhoka go ratwa ke Jehofa. Batho ba le bantsi ba akanya gore ga go kgonege gore re nne ditsala tse di atamalaneng thata le Modimo ka gonne ba re ga re kgone go mmona le gore ke Mothatayotlhe. Mme re a itse gore seo ga se boammaaruri!

² Re a itse gore Baebele e na le dikai tsa batho ba ba ileng ba nna ditsala tsa Modimo. Re tshwanetse go ithuta mo go bone. Ka ntlha yang? Ka gonne go nna tsala ya Modimo go botlhokwa thata go gaisa sepe fela. Ka jalo, a re sekasekeng sekao sa ga Aborahame. (Bala Jakobe 2:23.) Go tlile jang gore Aborahame a nne tsala ya Modimo? Botsala jwa gagwe le Modimo  bo ne bo ikaegile ka tumelo e a neng a na le yone, ke gone ka moo a neng a bidiwa “rre wa botlhe ba ba nang le tumelo.” (Baroma 4:11) Fa o ntse o sekaseka sekao sa gagwe, ipotse jaana: ‘Nka etsa jang tumelo ya ga Aborahame le go nonotsha botsala jwa me le Jehofa?’

3, 4. (a) Tlhalosa kafa tumelo ya ga Aborahame e neng ya lekwa ka gone. (b) Ke eng fa Aborahame a ne a ikemiseditse go ntsha Isake setlhabelo?

³ Akanya ka Aborahame a na le dingwaga di ka nna 125, a tlhatloga ka iketlo a ya kwa thabeng. ^[1] (Bona ntlha e e kwa bofelong jwa setlhogo.) O setswe morago ke morwawe Isake yo o neng a na le dingwaga di ka nna 25. Isake o tshotse dikgong, Aborahame ene o tshotse thipa le dilo tse di gotsang molelo. Loo e ne e le loeto lo Aborahame a neng a se kitla a le lebala. E seng ka gonne a ne a tsofetse. O ne a sa ntse a na le maatla. Go na le moo, ka gonne Jehofa a ne a mo kopile gore a ntshe morwawe setlhabelo!—Genesise 22:1-8.

⁴ Go bonala eo e ne e le teko e e di gaisang tsotlhe e Aborahame a ileng a lebana le yone. Batho bangwe ba re Modimo o ne a le setlhogo tota go bo a ile a kopa Aborahame gore a ntshe morwawe setlhabelo. Ba bangwe ba re Aborahame o ne a ikemiseditse go dira seo ka gonne a ne a sa rate morwawe. Batho bano ba buisiwa ke go tlhoka tumelo le go sa tlhaloganye gore tumelo ya mmatota ke eng kgotsa gore e dira jang. (1 Bakorintha 2:14-16) Aborahame e ne e se madumelagotlhe. O ne a ikobela Modimo ka gonne o ne a na le tumelo ya mmatota. O ne a itse gore Jehofa ga a kitla a tsamaya a mo kopa go dira selo se se tla mmakelang kutlobotlhoko e e sa feleng. O ne a itse gore fa a ikoba, Jehofa o tla mo segofatsa a bo a segofatsa le morwawe yo a neng a mo rata thata. Ke eng se se dirileng gore Aborahame a nne le tumelo e e nonofileng thata jaana? O ne a na le kitso le maitemogelo.

5. Go tlile jang gore Aborahame a ithute ka Jehofa, mme kitso eo e ile ya dira gore a ikutlwe jang?

⁵ Kitso. Aborahame o goletswe kwa motseng wa Ure. Batho ba motse oo ba ne ba obamela medingwana e bile le rraagwe Aborahame o ne a e obamela. (Joshua  24:2) Ka jalo, go tlile jang gore Aborahame a ithute ka Jehofa? Baebele e bontsha gore morwa Noa e bong Sheme e ne e le losika lwa ga Aborahame. Sheme o ile a tshela go fitlha Aborahame a le dingwaga di ka nna 150. Sheme o ne a na le tumelo e bile a ka tswa a ile a bua le ba losika lwa gaabo ka Jehofa. Ga re a tlhomamisega mme gone, go ka direga gore ke ene a ileng a ruta Aborahame ka Jehofa. Se Aborahame a se ithutileng ka Jehofa se ne sa dira gore a mo rate mme kitso eo e ne ya mo thusa gore a nne le tumelo.

6, 7. Dilo tse di ileng tsa diragalela Aborahame di ile tsa nonotsha tumelo ya gagwe jang?

⁶ Maitemogelo. Se se diragaletseng Aborahame se mo thusitse jang gore a nne le tumelo e e nonofileng? Ga twe dikakanyo di tsala maikutlo mme maikutlo a latelwa ke ditiro. Pelo ya ga Aborahame e ne ya tlhotlhelediwa ke se a neng a se ithutile ka Modimo mme seo sa dira gore a tlotle “Jehofa Modimo Mogodimodimo, Modiri wa legodimo le lefatshe.” (Genesise 14:22) Baebele e bitsa tlotlo eo e e boteng e re ke “poifo ya . . . bomodimo.” (Bahebera 5:7) Fa re batla go nna ditsala tsa Modimo, re tshwanetse go nna le poifo ya bomodimo. (Pesalema 25:14) Ke yone e e dirileng gore Aborahame a ikobele Jehofa.

⁷ Modimo o ne a laela Aborahame le Sara gore ba tswe mo motseng wa Ure ba ye go tshela kwa nageng e sele. Ba ne ba setse ba tsofetse e bile ba ne ba tla tshwanelwa ke go nna mo ditenteng. Le fa Aborahame a ne a itse gore o tla lebana le dikotsi di le dintsi, o ne a ikemiseditse gore o tla ikobela Jehofa. Modimo o ne a mo segofatsa le go mo sireletsa. Ka sekai, fa mosadi wa gagwe wa marata go lejwa e bong Sara, a ne a gapilwe e bile Aborahame a le mo kotsing ya go bolawa, Jehofa o ne a ba sireletsa ka tsela ya kgakgamatso makgetlo a le mmalwa. (Genesise 12:10-20; 20:2-7, 10-12, 17, 18) Ditiragalo tseo di ile tsa nonotsha tumelo ya ga Aborahame.

8. Re ka nna jang le kitso le maitemogelo a a tla nonotshang botsala jwa rona le Jehofa?

⁸ A re ka kgona go nna ditsala tsa ga Jehofa? Ee, re ka kgona! Fela jaaka Aborahame, re tshwanetse go ithuta ka Jehofa. Le rona re ka nna le kitso le maitemogelo a re a tlhokang. Re na le dilo tse Aborahame a neng a se na tsone ka nako ya gagwe. (Daniele 12:4; Baroma 11:33) Baebele e na le kitso e ntsi ka “Modiri wa legodimo le lefatshe.” Se re se ithutang se dira gore re rate Jehofa e bile se re thusa gore re mo tlotle fela thata. Fa re mo rata e bile re mo tlotla, re tla tlhotlheletsega go mo  ikobela. Fa re dira jalo, o a re sireletsa le go re segofatsa e bile seo se dira gore re nne le maitemogelo a a nonotshang tumelo ya rona. Fa re direla Jehofa ka pelo yotlhe, re tla kgotsofala, re tla nna le kagiso e bile re tla itumela. (Pesalema 34:8; Diane 10:22) Fa re ntse re tsweletse re ithuta ka ene e bile re nna le maitemogelo, botsala jwa rona le ene bo a nonofa.

9, 10. (a) Ke eng se se dirang gore botsala bo nonofe? (b) Ke eng se se bontshang gore Aborahame o ne a tsaya botsala jwa gagwe le Jehofa bo le botlhokwa?

⁹ Botsala bo tshwana le letlotlo le le botlhokwa thata. (Bala Diane 17:17.) Ga bo tshwane le nkgo e e kgabisitseng. Bo tshwana le lelomo le le tlhokang metsi le go tlhokomelwa gore le kgone go gola sentle. Aborahame o ne a tsaya botsala jwa gagwe le Jehofa bo le botlhokwa thata e bile o ne a bo sireletsa. O ne a dira seo jang?

¹⁰ Aborahame o ile a tswelela a boifa Modimo le go mo ikobela. Ka sekai, fa a ne a tsamaya le ba lelapa la gagwe mmogo le batlhanka ba gagwe go ya kwa Kanana, o ne a latela kaelo ya ga Jehofa fa a dira ditshwetso tse dinnye le tse dikgolo. Pele Isake a tsholwa, Jehofa o ne a laela Aborahame gore a rupise banna botlhe ba ntlo ya gagwe le fa gone Aborahame a ne a na le dingwaga di le 99. A Aborahame o ne a belaela kgotsa a batlana le seipato sa go sa dire se a se laetsweng? Nnyaa, o ne a ikanya Jehofa e bile a dira se a neng a se laetswe ‘mo letsatsing lone leo.’—Genesise 17:10-14, 23.

11. Ke eng fa Aborahame a ne a tshwenyegile ka Sodoma le Gomora, mme Jehofa o ne a mo thusa jang?

¹¹ E re ka Aborahame a ne a ikobela Jehofa ka dinako tsotlhe, botsala jwa bone bo ne jwa nonofa le go feta. O ne a kgona go bua le Jehofa ka sengwe le sengwe, le e leng go mmotsa dipotso fa go na le sengwe se a sa se tlhaloganyeng. Ka sekai, Aborahame o ne a tshwenyegile tota fa Jehofa a mmolelela gore o ikaeletse go senya motse wa Sodoma le Gomora. Ka ntlha yang? O ne a tshwenngwa ke gore batho ba ba siameng ba tla senngwa mmogo le batho ba ba bosula. Gongwe o ne a tshwenyegile ka setlogolo sa gagwe e bong Lote le ba lelapa la gagwe ba ba neng ba nna kwa motseng wa Sodoma. Aborahame o ne a tshepa Jehofa “Moatlhodi wa lefatshe lotlhe,” ke ka moo a neng a bua ka boikokobetso le Jehofa a mmolelela ka dilo tse di mo tshwenyang. Jehofa o ne a le pelotelele le ene e bile o ne a mmotsha kutlwelobotlhoko. Jehofa o ne a mo tlhalosetsa gore le fa gone a tlile go senya batho ba ba bosula, o tla batla batho ba ba siameng le go ba boloka.—Genesise 18:22-33.

12, 13. (a) Aborahame o ne a thusiwa jang ke kitso le maitemogelo a a neng a na le one? (b) Ke eng se se bontshang gore Aborahame o ne a ikanya Jehofa?

¹² Go bonala sentle gore kitso le maitemogelo a Aborahame a neng a na le one, a ile a mo thusa go nonotsha botsala jwa gagwe  le Jehofa. Ka jalo, fa Jehofa a ne a mo kopa gore a ntshe morwawe setlhabelo, Aborahame o ne a itse gore Jehofa ke Modimo yo o pelotelele, yo o kutlwelobotlhoko, yo o ikanyegang le yo o kgonang go sireletsa batho ba gagwe. O ne a itse gore Jehofa a ka se fetoge fela ka ponyo ya leitlho a bo a nna setlhogo kgotsa a nna peloethata. Ke eng fa re rialo?

¹³ Pele Aborahame a tsamaya, o ne a raya batlhanka ba gagwe a re: “Lona salang fano le esele, mme nna le mosimane re batla go ya fale go ya go obama re bo re boela mo go lona.” (Genesise 22:5) Aborahame o ne a raya jang? A o ne a bua maaka fa a re o tla boa le Isake, a ntse a itse gore o ile go mo ntsha setlhabelo? Nnyaa. Baebele ya re Aborahame o ne a itse gore Jehofa o kgona go tsosa Isake mo baswing. (Bala Bahebera 11:19.) Aborahame o ne a itse gore Jehofa ke ene a dirileng gore ba kgone go nna le ngwana tota le fa ene le Sara ba ne ba setse ba tsofetse. (Bahebera 11:11, 12, 18) O ne a lemogile gore Jehofa ga a palelwe ke sepe. O ne a sa itse gore go tla direga eng mo letsatsing leo. Mme o ne a na le tumelo ya gore fa go tlhokega, Jehofa o ne a tla tsosa morwawe mo baswing gore ditsholofetso tsa Modimo di kgone go diragadiwa. Ke ka lebaka leo Aborahame a bidiwang “rre wa botlhe ba ba nang le tumelo.”

14. Ke dikgwetlho dife tse o lebanang le tsone fa o ntse o direla Jehofa, mme sekao sa ga Aborahame se ka go thusa jang?

¹⁴ Jehofa ga a re kope gore re ntshe bana ba rona ditlhabelo mme gone o re kopa gore re ikobele ditaelo tsa gagwe. Ka dinako tse dingwe, re ka tswa re sa tlhaloganye lebaka la go bo re tshwanetse go ikobela ditaelo tseno kgotsa go le thata go di ikobela. A o ikutlwa jalo? Bangwe ba rona ba bona go le thata gore ba rere. Gongwe ba ditlhong e bile ga ba kgone go bua le batho ba ba sa ba itseng. Bangwe ba tshaba go emela se ba se dumelang kwa tirong kgotsa kwa sekolong. (Ekesodo 23:2; 1 Bathesalonika 2:2) Fa Jehofa a go kopa go dira sengwe se o akanyang gore se thata, tlhatlhanya ka sekao sa ga Aborahame sa tumelo le bopelokgale. Fa re tlhatlhanya ka dikao tsa banna le basadi ba ba ileng ba ikanyega mo go Jehofa, re tla tlhotlheletsega go etsa sekao sa bone le go atamalana le Tsala ya rona e bong Jehofa.—Bahebera 12:1, 2.

15. Ke eng se se re tlhomamisetsang gore le ka motlha Aborahame ga a ise a ikwatlhaele go bo a ile a ikanyega le go ikobela Jehofa?

¹⁵ A Aborahame o ne a ikwatlhaela go bo a ile a ikobela ditaelo tsa ga Jehofa? Baebele ya re Aborahame o sule a “tsofetse thata, a godile e bile a kgotsofetse.” (Genesise 25:8) Fa Aborahame a ne a na le dingwaga di le 175, o ne a ikutlwa a kgotsofetse fa a akanya ka botshelo jo a bo tshetseng. Ka ntlha yang? Ka gonne  botsala jwa gagwe le Jehofa e ne e le sengwe se se botlhokwa thata go gaisa sepe fela. Le fa go ntse jalo, fa Baebele e re Aborahame o ne a “godile e bile a kgotsofetse,” seno ga se reye gore o ne a sa eletse go tshela mo paradaiseng e e tlang.

16. Ke dilo dife tse di itumedisang tse Aborahame a tla di ithutang kwa lefatsheng la Paradaise?

¹⁶ Baebele ya re Aborahame o “letetse motse o o nang le metheo ya mmatota, motse o moagi le modiri wa one e leng Modimo.” (Bahebera 11:10) Aborahame o ne a dumela gore letsatsi lengwe o tla bona motse oo kgotsa Bogosi joo jwa Modimo, bo busa lefatshe lotlhe. Mme tsholofelo ga e tlhabise ditlhong, o tla o bona! Akanya fela kafa Aborahame a tla itumelang ka gone kwa lefatsheng la paradaise fa a tla bo a kgona go tswelela a nonotsha botsala jwa gagwe le Modimo. O tla itumelela go utlwa gore sekao sa gagwe se ile sa thusa batlhanka ba Modimo. O tla ithuta gore setlhabelo sa kwa Thabeng ya Moria se ne se emela sengwe se segolo. (Bahebera 11:19) Gape o tla ithuta gore kutlobotlhoko e a neng a e utlwa fa a ne a ya go ntsha morwawe Isake setlhabelo, e ile ya thusa batho ba ba ikanyegang gore ba tlhaloganye kutlobotlhoko e Jehofa a ileng a e utlwa, fa a ne a ntsha Morwawe e bong Jesu Keresete gore e nne thekololo ya batho botlhe. (Johane 3:16) Sekao sa ga Aborahame se re thusa gore re leboge Jehofa fela thata ka se a re diretseng sone ka go re naya thekololo. Eo e ne e le tsela e e di gaisang tsotlhe e Jehofa a re bontshitseng ka yone gore o a re rata.

17. O ikemiseditse go dira eng, mme re tla sekaseka eng mo setlhogong se se latelang?

¹⁷ E kete mongwe le mongwe wa rona a ka ititaya sehuba gore o tla etsa tumelo ya ga Aborahame. Le rona re tlhoka kitso le maitemogelo. Fa re ntse re tsweletse re ithuta ka Jehofa le go mo ikobela, o tla re segofatsa le go re sireletsa. (Bala Bahebera 6:10-12.) E kete Jehofa a ka nna tsala ya rona ya bosakhutleng! Mo setlhogong se se latelang, re tla sekaseka dikao tse dingwe tse tharo tsa batlhanka ba ba ikanyegang ba ba neng ba nna ditsala tsa Modimo.