1. Goreng re tlhoka kaelo ya ga Jehofa? Dira sekai.

 A RE re o mo sekgweng mme o latlhegile. O tshogile ka gonne go na le diphologolo tse di bogale tsa naga le ditshenekegi tse di nang le botlhole e bile o ka nna wa wela mo dikhuting. Go ne go ka nna botoka thata fa o ne o tsamaya le mongwe yo o itseng lefelo leo ka gonne o ne a tla go kaela gore o ye kae gore o se ka wa tlhagelwa ke kotsi. Lefatshe leno le tshwana le sekgwa. Le na le dilo di le dintsi tse di ka senyang botsala jwa rona le Jehofa. Se se itumedisang ke gore Jehofa o a re kaela gore re se ka ra wela mo dikotsing tseo, e bile o tla re thusa gore re tshelele ruri kwa lefatsheng le lesha.

2. Jehofa o re kaela jang?

² Jehofa o dirisa Baebele le batho go re kaela. Ka sekai, o dirisa “motlhanka yo o boikanyego le yo o botlhale” go re ruta, mme dithuto tseo di re thusa go dira ditshwetso tse di siameng. (Math. 24:45) Gape Jehofa o dirisa balebedi ba potologo le bagolwane go re kgothatsa le go re naya kaelo e e re thusang go itshoka fa re na le mathata. Eleruri re lebogela go bo Jehofa a re kaela mo malatsing ano a bofelo a a tletseng mathata. Kaelo ya gagwe e re thusa gore re tswelele re atamalane le ene, le gore re tswelele re le mo tseleng e e isang botshelong jo bo sa khutleng.

3. Re tlile go tlotla ka eng mo setlhogong seno?

³ Go ka nna thata go ikobela kaelo ya ga Jehofa, segolobogolo fa re e newa ke batho ba ba dirang diphoso. Goreng? Ka gonne ba ka nna ba re kopa gore re dire sengwe se re sa batleng  go se dira. Kgotsa ba ka re naya kaelo e re tsayang gore ga e utlwale, re bo re ipolelela gore ga e tswe kwa go Jehofa. Fa seno se direga, re tshwanetse go nna re gopotse gore Jehofa ke ene a kaelang batho ba gagwe, le gore go ikobela kaelo ya gagwe go re tswela mosola ka metlha. Setlhogo seno se tla re thusa go bona gore (1) Jehofa o ne a kaela batho ba gagwe jang mo nakong e e fetileng, (2) o re kaela jang gompieno le gore (3) go ikobela kaelo ya gagwe go re tswela mosola jang.

JEHOFA O NE A KAELA BAISERAELE JANG?

4-5. Jehofa o ile a bontsha jang gore o dirisa Moshe go kaela Baiseraele? (Bona setshwantsho.)

⁴ Jehofa o ile a tlhoma Moshe gore a kaele Baiseraele fa ba ne ba tswa kwa Egepeto. O ile a dira gore go bonale gore o dirisa Moshe go ba kaela. Ka sekai, fa go le motshegare o ne a dirisa pilara ya leru, mme fa go le bosigo o ne a dirisa ya molelo. (Ekes. 13:21) Moshe o ne a latela pilara eo gongwe le gongwe kwa e yang gone, mme e ile ya ba isa kwa Lewatleng le Lehibidu. Baiseraele ba ne ba tshogile ba akanya gore Baegepeto ba tlile go ba bolaya. Ka jalo ba ile ba re Moshe o ne a dirile phoso go ba isa koo. Mme go ne go sa nna jalo. Jehofa ke ene a neng a dirisitse Moshe go ba kaela gore ba ye kwa Lewatleng le Lehibidu. (Ekes. 14:2) Ka jalo o ile a ba sireletsa ka tsela e e gakgamatsang.​—Ekes. 14:26-28.

⁵ Go ne ga feta dingwaga di le 40 Moshe a latela pilara eo ka gonne o ne a itse gore Jehofa o e dirisa go kaela batho ba gagwe. a Nako nngwe Jehofa o ile a e baya mo godimo ga tente ya ga Moshe, mo Baiseraele botlhe ba neng ba kgona go e bona teng. (Ekes. 33:7, 9, 10) Jehofa o ne a bua le Moshe go tswa mo pilareng eo, mme Moshe o ne a fetisetsa ditaelo tsa ga Jehofa mo Baiseraeleng. (Pes. 99:7) Go ne go le mo pepeneneng gore Jehofa o dirisa Moshe go kaela Baiseraele.

6. Baiseraele ba ile ba dira eng fa Jehofa a ba kaela? (Dipalo 14:2, 10, 11)

⁶ Se se utlwisang botlhoko ke gore Baiseraele ba le bantsi ba ile ba gana go amogela gore Jehofa o dirisa Moshe go ba kaela. (Bala Dipalo 14:2, 10, 11.) Ka jalo Jehofa ga a ka a ba letla go tsena kwa Lefatsheng le le Solofeditsweng.​—Dipa. 14:30.

7. Ke bomang ba ba ileng ba ikobela kaelo ya ga Jehofa? (Dipalo 14:24) (Bona le setshwantsho.)

⁷ Mme gone, Baiseraele bangwe ba ne ba ikobela kaelo ya ga Jehofa. Ka sekai, Jehofa o ne a re: “Kalebe . . . [o ne] a nna a ntshala morago ka pelo yotlhe.” (Bala Dipalo 14:24.) Jehofa o ile a segofatsa Kalebe, e bile o ile a mo letla gore a itlhophele gore o batla go nna kae kwa Lefatsheng le le Solofeditsweng. (Josh. 14:12-14) Baiseraele ba ba ileng ba letlelelwa go tsena mo Lefatsheng le le Solofeditsweng le bone ba ne ba ikobela kaelo ya ga Jehofa. Fa Moshe a sena go swa, Joshua ke ene a neng a ba etelela pele, “mme ba ne ba mo tlotla thata malatsi otlhe a botshelo jwa gagwe.” (Josh. 4:14) Ka jalo Jehofa o ile a ba segofatsa ka go ba tsenya mo lefatsheng le a neng a ba solofeditse lone.​—Josh. 21:43, 44.

8. Jehofa o ne a kaela batho ba gagwe jang ka motlha wa dikgosi? (Bona le setshwantsho.)

⁸ Dingwaga moragonyana, Jehofa o ile a tlhoma baatlhodi gore ba kaele batho ba gagwe, mme ka motlha wa dikgosi o ile a tlhoma  baporofeti. Dikgosi tse di ikanyegang di ne di reetsa kgakololo ya baporofeti bao. Ka sekai, fa moporofeti Nathane a ne a kgalemela Dafide, Dafide o ile a ikokobetsa a bo a amogela kgalemelo eo. (2 Sam. 12:7, 13; 1 Ditir. 17:3, 4) Kgosi Jehoshafate o ile a reetsa kgakololo ya ga moporofeti Jahasiele e bile o ile a laela batho ba Juda gore ba ‘nne le tumelo mo baporofeting ba Modimo.’ (2 Ditir. 20:14, 15, 20) Kgosi Hesekia ene o ile a kopa moporofeti Isaia gore a mo thuse fa a ne a tlaletswe. (Isa. 37:1-6) Nako le nako fa dikgosi di ne di ikobela kaelo ya ga Jehofa, o ne a di segofatsa a bo a sireletsa batho ba gagwe. (2 Ditir. 20:29, 30; 32:22) Ruri go ne go bonala gore Jehofa o dirisa baporofeti go kaela batho ba gagwe! Le fa go ntse jalo, Baiseraele ba le bantsi le dikgosi ba ne ba gana go ba reetsa.​—Jer. 35:12-15.

JEHOFA O NE A KAELA BAKERESETE BA BOGOLOGOLO JANG?

9. Jehofa o ne a dirisa mang go kaela Bakeresete ba bogologolo? (Bona le setshwantsho.)

⁹ Fa Jesu a sena go tsosiwa, Jehofa o ile a tlhoma phuthego ya Bakeresete. O ne a ba kaela jang? O ile a tlhoma Jesu gore e nne tlhogo ya phuthego. (Baef. 5:23) Mme Jesu ene o ne a dirisa baaposetoloi le bagolwane ba kwa Jerusalema gore ba etelele pele. (Dit. 15:1, 2) Mo godimo ga moo, go ne ga tlhomiwa bagolwane mo phuthegong nngwe le nngwe gore ba etelele pele.​—1 Bathes. 5:12; Tito 1:5.

10. (a) Bakeresete ba le bantsi ba bogologolo ba ne ba dira eng fa ba newa kaelo? (Ditiro 15:30, 31) (b) Goreng bangwe ba ne ba gana go reetsa batho ba Jehofa a neng a ba tlhomile? (Bona lebokoso le le reng, “ Goreng Bangwe Ba ne Ba Gana go Reetsa?”)

¹⁰ Se se itumedisang ke gore Bakeresete ba le bantsi ba bogologolo ba ne ba itumelela kaelo e ba neng ba e newa e bile ba ne ba e dirisa. Baebele e a re: ‘Ba ne ba itumelela mafoko a a kgothatsang’ a ba neng ba a newa. (Bala Ditiro 15:30, 31.) Mme gone, Jehofa o ntse a kaela batho ba gagwe jang mo motlheng ono wa rona?

JEHOFA O RE KAELA JANG GOMPIENO?

11. Naya sekai se se bontshang gore Jehofa o ntse a kaela batho ba gagwe le mo motlheng ono wa rona.

¹¹ Jehofa o sa ntse a kaela batho ba gagwe le gompieno. O dirisa Baebele le Morwawe, e  leng tlhogo ya phuthego. Gape go na le bosupi jo bo bontshang gore Jehofa o dirisa batho go re kaela. Ka sekai, akanya ka se se ileng sa direga morago ga ngwaga wa 1870. Fa Charles Taze Russell le ditsala tsa gagwe ba ntse ba dira dipatlisiso, ba ile ba lemoga gore Bogosi Jwa Modimo bo ne bo tla tlhomiwa ka 1914. (Dan. 4:25, 26) Ga go pelaelo gore Jehofa o ne a ba kaela. Se se ileng sa direga ka ngwaga oo se ne se bontsha gore Bogosi Jwa Modimo bo setse bo simolotse go busa. Go ile ga runya Ntwa ya Ntlha ya Lefatshe, mme morago ga moo go ile ga nna le malwetse a leroborobo, dithoromo tsa lefatshe le ditlhaelo tsa dijo. (Luke 21:10, 11) Eleruri Jehofa o ne a dirisa banna bano ba ba ikanyegang go kaela batho ba gagwe.

12-13. Bakaulengwe ba ba neng ba eteletse pele ba ile ba dira eng ka nako ya Ntwa ya Bobedi ya Lefatshe gore tiro ya go rera e oketsege?

¹² Gape akanya ka se se ileng sa direga ka nako ya Ntwa ya Bobedi ya Lefatshe. Bakaulengwe ba ba neng ba eteletse pele ba ile ba dira dipatlisiso, mme ba ile ba lemoga gore go ya ka Tshenolo 17:8, Ntwa ya Bobedi ya Lefatshe e ne e ka se felele ka Aramagedona. Gape ba ile ba lemoga gore go ne go tla nna le nako ya kagiso, mme seo se ne se tla thusa Basupi gore ba kgone go rerela batho ba le bantsi. Ka jalo ba ile ba tlhoma Sekolo sa Baebele sa Gileade, le fa ka nako eo go ne go lebega go sa utlwale go dira jalo. Sekolo seo se ne se katisa barongwa gore ba ye go rera kwa dinageng tse di farologaneng. Tota le ka nako eo ya ntwa, barongwa ba ne ba ntse ba romelwa go ya go rera. Mo godimo ga moo, go ile ga nna le Khoso ya Bodiredi Jwa Puso ya Modimo b e e neng e katisa baboledi mo diphuthegong gore ba tokafatse tsela e ba rerang le e ba rutang ka yone. Modimo ne a baakanyetsa batho ba gagwe tiro ya go rera e e neng e larile kwa pele.

¹³ Tota go a bonala gore Jehofa o ne a kaela batho ba gagwe mo nakong eo e e thata. Fa e sa le go tloga ka nako ya Ntwa ya Bobedi ya Lefatshe, batho ba ga Jehofa ba ntse ba rera ka kgololesego mo dinageng di le dintsi mme seo se thusitse batho ba le bantsi gore ba itse Jehofa.

14. Goreng re tshwanetse go dirisa kaelo e re e newang ke motlhanka yo o boikanyego le yo o botlhale le e re e newang ke bagolwane? (Tshenolo 2:1) (Bona le setshwantsho.)

 ¹⁴ Bakaulengwe ba Setlhopha se se Laolang ba ikobela kaelo ya ga Jesu. Ba batla gore go bonale gore ditaelo tse ba di nayang bakaulengwe le bokgaitsadi di tswa kwa go Jehofa le Jesu. Ba dirisa balebedi ba potologo le bagolwane go kaela diphuthego. c Tota e bile, Baebele e a re bagolwane ba mo seatleng sa ga Jesu sa moja. (Bala Tshenolo 2:1.) Gone ke nnete gore bagolwane ba dira diphoso fela jaaka Moshe, Joshua le baaposetoloi le bone ba ne ba di dira. (Dipa. 20:12; Josh. 9:14, 15; Bar. 3:23) Le fa go ntse jalo, re tshwanetse go nna re gopotse gore Jesu o kaela motlhanka yo o boikanyego le yo o botlhale le bagolwane, e bile o tla tswelela a dira jalo “malatsi otlhe go fitlha kwa bokhutlong jwa lefatshe leno.” (Math. 28:20) Ka jalo re tshwanetse go ikobela kaelo e a re nayang yone a dirisa banna bano.

GO IKOBELA KAELO YA GA JEHOFA GO RE TSWELA MOSOLA

15-16. O ithuta eng mo go bangwe ba ba ileng ba ikobela kaelo ya ga Jehofa?

¹⁵ Go ikobela kaelo ya ga Jehofa go dira gore a re segofatse. Ka sekai, Andy le Robyn ba ile ba ikobela kaelo e motlhanka yo o boikanyego le yo o botlhale a re nayang yone ya gore re tshele botshelo jo bo sa raraanang. (Baheb. 13:5) Seno se ile sa ba thusa gore ba kgone go ithaopa mo diporojekeng tsa go aga Diholo Tsa Bogosi le dikago tse dingwe tsa Basupi. Robyn a re: “Re ile ra nna mo mafelong a mannye, a go le gantsi a neng a se na khitšhine. Gape ke ile ka rekisa dilo tse ke neng ke di dirisa go tsaya dinepe. Ke ne ke utlwile botlhoko thata ka gonne ke rata go tsaya dinepe. Mme fela jaaka mosadi wa ga Aborahame e bong Sara, ke ne ke ipoleletse gore ga nkitla ke leba kwa morago.” (Baheb. 11:15) A tshwetso e Andy le Robyn ba ileng ba e dira e ile ya ba tswela mosola? Robyn a re: “Re itumetse ka gonne re a itse gore re direla Jehofa ka bojotlhe. Fa re thusa mo diporojekeng tsa go aga, re kgona go bona lemmenyana la gore go tla bo go ntse jang kwa lefatsheng le lesha.” Andy ene a re: “Re itumetse ka gonne re dirisa nako le maatla a rona go direla Jehofa.”

 ¹⁶ Go ikobela kaelo ya ga Jehofa go re tswela mosola jang gape? Akanya ka se Marcia a ileng a se dira. Fa a fetsa sekolo o ne a batla go nna mmulatsela. (Math. 6:33; Bar. 12:11) A re: “Ke ile ka newa basari ya gore ke ye yunibesithing dingwaga di le nnê, mme nna ke ne ke batla go direla Jehofa mo go oketsegileng. Ka jalo, ke ile ka ya kholetšheng gore ke ye go ithuta bokgoni bongwe jo bo neng bo tla nthusa go nna le lotseno fa ke ntse ke le mmulatsela. Ga ke ikwatlhaele tshwetso e ke ileng ka e dira. Gone jaanong ke itumelela go nna mmulatsela, tiro e ke e dirang e ntetla gore ke kgone go thusa kwa Bethele e bile ke kgona go dira ditiro tse dingwe tse dintsi mo phuthegong ya ga Jehofa.”

17. Go ikobela kaelo ya ga Jehofa go re tswela mosola jang gape? (Isaia 48:17, 18)

¹⁷ Ka dinako tse dingwe phuthego ya ga Jehofa e re naya kgakololo e e re sireletsang. Ka sekai, re gakololwa gore re se ka ra rata madi le gore re se ka ra dira dilo tse di ka senyang botsala jwa rona le Jehofa. Go latela kaelo eno le gone go re tswela mosola. Go re thusa gore re nne le segakolodi se se siameng le gore re se ka ra ipiletsa mathata a le kgakala. (1 Tim. 6:9, 10) Seno se re thusa gore re direle Jehofa ka pelo yotlhe, mme ga go na sepe se se itumedisang go feta seno.​—Bala Isaia 48:17, 18.

18. Goreng o ikemiseditse go tswelela o ikobela kaelo ya ga Jehofa?

¹⁸ Ga go pelaelo gore Jehofa o tla tswelela a dirisa batho go re kaela ka nako ya pitlagano e kgolo le ka Puso ya Dingwaga Tse di Sekete. (Pes. 45:16) A o tla tswelela o ikobela kaelo ya ga Jehofa le fa o kopiwa gore o dire sengwe se o sa batleng go se dira? Fa re ikobela kaelo ya ga Jehofa gone jaanong, go tla nna motlhofo gore re dire jalo le mo nakong e e tlang. Ka jalo a re ikemisetseng go tswelela re ikobela kaelo ya ga Jehofa, go akaretsa le e re e newang ke bagolwane. (Isa. 32:1, 2; Baheb. 13:17) Re ka ikobela kaelo ya ga Jehofa re tlhatswegile pelo gore o tla re thusa gore re se ka ra wela mo dikotsing tse di ka senyang botsala jwa rona le ene, le gore o tla re thusa gore re tshelele ruri kwa lefatsheng le lesha.