1. Goreng re araba kwa dipokanong?

 GORENG re ya dipokanong? Gore re ye go baka Jehofa. (Pes. 26:12; 111:1) Gape re ya dipokanong gore re kgone go kgothatsana mo nakong eno e e thata. (1 Bathes. 5:11) Fa re araba, re baka Jehofa e bile re kgothatsa ba bangwe.

2. Re ka araba leng fa re le kwa dipokanong?

² Fa re le kwa dipokanong, re nna le tshono ya go arabela. Ka sekai, ka mafelobeke re kgona go araba mo Thutong ya Tora ya Tebelo. Mme mo gare ga beke, re kgona go araba mo puong ya Go Ribolola Matlotlo mo Dikwalong, mo Thutong ya Baebele ya Phuthego le mo dipuong tse dingwe tsa dipotso le dikarabo.

3. Ke dikgwetlho dife tse re ka lebanang le tsone, mme Bahebera 10:24 le 25 e ka re thusa jang?

³ Fa re le kwa dipokanong, re batla go baka Jehofa le go kgothatsa bakaulengwe le bokgaitsadi. Le fa go ntse jalo, fa re tshwanelwa ke go araba re ka lebana le dikgwetlho dingwe. Re ka nna ra tshoga, kgotsa re ka tswa re batla go araba mme bakaulengwe ba sa re neye tshono ya go araba gantsi jaaka re batla. Ke eng se se ka re thusang? Se moaposetoloi Paulo a  ileng a se kwalela Bahebera se ka re thusa. Fa a ne a tlhalosa gore ke eng fa go le botlhokwa gore re phuthege mmogo, o ne a re re tshwanetse go ‘kgothatsana.’ (Bala Bahebera 10:24, 25.) Fa re gopola gore re ka kgothatsa ba bangwe fa re araba dikarabo tse dikhutshwane e bile di le motlhofo, seo se ka re thusa gore re se ka ra tshoga. Mme fa re sa newe tshono ya go araba gantsi, re itumelela gore ba bangwe mo phuthegong ba tla nna le tshono ya go araba.—1 Pet. 3:8.

4. Re tlile go tlotla ka dintlha dife tse tharo mo setlhogong seno?

⁴ Mo setlhogong seno, re tlile go bona gore re ka kgothatsa ba bangwe jang fa phuthego ya rona e na le baboledi ba le mmalwa, mme go sa arabe batho ba le bantsi. Go tswa foo, re tlile go bona gore re ka kgothatsa ba bangwe jang fa phuthego ya rona e na le baboledi ba le bantsi, mme go araba batho ba le bantsi. Gape re tla bona gore re ka dira eng gore se re se buang fa re araba se kgothatse ba bangwe.

5. Re ka kgothatsana jang fa e le gore ga re bantsi mo phuthegong?

⁵ Fa baboledi ba le mmalwa mo phuthegong, ga go nne le batho ba le bantsi ba ba arabang. Ka dinako dingwe, mokaulengwe yo o tshwereng thuto a ka tshwanelwa ke go ema lobaka lo loleele go se na ope yo o ithaopang go araba. Dipokano di ka tsaya lobaka, e bile seo se ka kgoba marapo. O ka dira eng? Ithaope go araba gantsinyana. Fa o dira jalo, o ka rotloetsa ba bangwe gore le bone ba arabe.

6-7. Re ka dira eng gore re se ka ra tshoga thata fa re tshwanelwa ke go araba?

⁶ O ka dira eng fa e le gore o a tshoga fa o tshwanelwa ke go araba? Ga se wena fela o ikutlwang jalo. Gore o kgone go kgothatsa bakaulengwe le bokgaitsadi, go na le dilo dingwe tse o ka di dirang gore o se ka wa tshoga fa o tshwanelwa ke go araba. Ke dilo dife?

⁷ Dikakantsho tse di tlhagang mo dimakasineng tsa Tora ya Tebelo tsa dingwaga tse di fetileng di ka go thusa. b Ka sekai, leka go baakanyetsa sentle. (Diane 21:5) Fa o baakanyeditse sentle, ga o kitla o tshoga thata fa o tshwanelwa ke go araba. Gape araba ka bokhutshwane. (Diane 15:23; 17:27) O ka se tshoge thata fa karabo ya gago e le khutshwane. Go tla nna motlhofo gore bakaulengwe le bokgaitsadi ba tlhaloganye karabo ya gago fa e le khutshwane e bile e se na dintlha tse dintsi. Fa o araba ka mafoko a gago, o bontsha gore o baakanyeditse sentle le gore o tlhaloganya se go buiwang ka sone.

8. Jehofa o ikutlwa jang ka matsapa a re a tsayang?

⁸ O ka dira eng fa e le gore o dirisitse dikakantsho tseno, mme o sa ntse o tshoga fa o tshwanelwa ke go araba? Itse gore Jehofa o lebogela matsapa a gago le se o kgonang go se dira. (Luke 21:1-4) Jehofa a ka se re kope gore re dire sengwe se re ka se kang ra kgona go se dira. (Bafil. 4:5) Ka jalo, leka go bona gore o ka dira eng, ikemisetse go se dira o bo o kopa Jehofa gore a go thuse go wela makgwafo. O ka simolola ka go araba gangwe fela e bile karabo ya gago e le khutshwane.

9. Goreng go ka nna thata go araba fa phuthego e na le baboledi ba le bantsi?

⁹ Fa go na le baboledi ba le bantsi mo  phuthegong, go araba batho ba bantsi. Gongwe seo se ka dira gore o se ka wa kgona go araba gantsi jaaka o batla. Ka sekai, kgaitsadi Danielle o itumelela go araba kwa dipokanong. c O tsaya go araba e le tsela e a obamelang Jehofa ka yone, e a kgothatsang ba bangwe ka yone le e a dirang gore boammaaruri bo nwelelele mo pelong ya gagwe ka yone. Mme fa a sena go fudugela kwa phuthegong e e nang le baboledi ba le bantsi, o ne a sa newe tshono ya go araba gantsi jaaka a batla, e bile ka dinako dingwe dipokano di ne di tswa a sa nna le tshono ya go araba. A re: “Seo se ne se nkutlwisa botlhoko tota. Ke ne ke ikutlwa e kete ga ke a dira se ke neng ke tshwanetse go se dira. Fa seo se nna se direga, ke ne ka simolola go ipotsa gore a bakaulengwe ba dira ka boomo.”

10. Re ka dira eng gore re kgone go araba?

¹⁰ A o kile wa ikutlwa jaaka Danielle? Fa go le jalo, o ka nna wa akanya gore go botoka gore o se ka wa tsholetsa mme o reetse fela fa o le kwa dipokanong. O se ka wa dira jalo. O ka dira eng? Leka go baakanyetsa dikarabo di le mmalwa, seno se tla go thusa gore fa o sa kgona go araba kwa tshimologong, o nne le tshono ya go araba fa dipokano di tsweletse. Fa o baakanyetsa Thuto ya Tora ya Tebelo, leka go bona gore serapa sengwe le sengwe se tsamaisana jang le setlhogo. Fa o dira jalo, o tla nna le tshono ya go arabela gantsinyana. Mo godimo ga moo, leka go baakanyetsa dirapa tse di buang ka dithuto tsa Baebele tse go seng motlhofo go di tlhaloganya. (1 Bakor. 2:10) Ka ntlha ya eng? Ka gonne go ka arabela batho ba le mmalwa fela mo dirapeng tseo. O ka dira eng fa e le gore o dirisitse dikakantsho tseno mme o sa ntse o sa newe tshono ya go araba? Pele ga dipokano, o ka bua le mokaulengwe yo o tla bong a tshwere thuto, mme o mmolelele gore o ka rata go araba potso efe.

11. Bafilipi 2:4 e re kgothaletsa gore re dire eng?

¹¹ Bala Bafilipi 2:4. Moaposetoloi Paulo o ne a kgothaletsa Bakeresete gore ba se ka ba ikakanyetsa ba le nosi. Re ka dirisa kgakololo eo jang fa re le kwa dipokanong? Re tshwanetse  go gopola gore batho ba bangwe le bone ba batla go araba.

12. Re ka kgothatsa ba bangwe jang fa re le kwa dipokanong? (Bona le setshwantsho.)

¹² A re dire sekai. Fa o tlotla le ditsala tsa gago, a go bua wena fela o sa ba neye tshono ya go bua? Nnyaa ga o dire jalo, o batla gore le bone ba bue. Ka tsela e e tshwanang, fa re le kwa dipokanong, re batla gore ba bangwe ba nne le tshono ya go araba. Tota e bile, fa re naya bakaulengwe le bokgaitsadi tshono ya gore ba arabele, seno se ka ba kgothatsa. (1 Bakor. 10:24) A re boneng gore re ka dira seo jang.

13. Re ka dira eng gore ba bangwe le bone ba kgone go araba?

¹³ Sa ntlha, re ka araba ka bokhutshwane gore ba bangwe le bone ba nne le tshono ya go araba. Bagolwane le baboledi ba e leng lobaka ba le mo phuthegong, ba tshwanetse go leka go dira jalo. Tota le fa o araba ka bokhutshwane, o se ka wa bua dintlha tse dintsi. Fa o araba dintlha tsotlhe mo serapeng, batho ba bangwe ba ka se ka ba kgona go araba. Ka sekai, mo serapeng seno re neilwe dikakantsho tse pedi, gore re arabe ka bokhutshwane le gore re se ka ra bua dintlha tse dintsi. Ka jalo, fa e le gore ke wena wa ntlha yo o arabang mo serapeng seno, bua ka ntlha e le nngwe fela.

14. Re tshwanetse go nna re gopotse eng fa re batla go araba? (Bona le setshwantsho.)

¹⁴ Re tshwanetse go nna re gopotse gore fa re tsholetsa gantsi, mokaulengwe yo o tshwereng thuto a ka nna a ikutlwa a patelesega go re supa, tota le fa batho ba bangwe ba ise ba nne le tshono ya go araba. Seno se ka nna sa dira gore ba bangwe ba se ka ba tsholetsa.—Mor. 3:7.

15. (a) Ga re a tshwanela go dira eng fa re sa newe tshono ya go arabela? (b) Bakaulengwe ba ba tshwereng thuto ba ka dira eng go bontsha gore ba akanyetsa batho botlhe? (Bona lebokoso le le reng, “ Fa o Tshwere Thuto.”)

¹⁵ Fa go tsholetsa baboledi ba le bantsi kwa dipokanong, o ka nna wa se ka wa kgona go  araba gantsi jaaka o batla. Ka dinako dingwe, mokaulengwe yo o tshwereng thuto a ka nna a se ka a kgona go go supa. Seo se ka go kgoba marapo, le fa go ntse jalo o se ka wa kgopisega.—Mor. 7:9.

16. Re ka kgothatsa ba bangwe jang?

¹⁶ Fa go sa kgonege gore o arabe gantsi jaaka o batla, reetsa ka tlhoafalo fa ba bangwe ba araba mme o ba akgole morago ga dipokano. Fa o dira jalo, o kgothatsa bakaulengwe le bokgaitsadi fela jaaka o ne o ka ba kgothatsa fa o ne o neilwe tshono ya go araba. (Diane 10:21) Go akgola ba bangwe ke tsela e nngwe e re ka ba kgothatsang ka yone.

17. (a) Batsadi ba ka thusa bana ba bone jang go baakanyetsa? (b) Go ya ka bidio, ke dilo dife tse re tshwanetseng go di dira fa re baakanyetsa? (Bona le ntlha e e kwa tlase.)

¹⁷ Re ka dira eng gape go kgothatsa ba bangwe fa re le kwa dipokanong? Fa e le gore o motsadi, thusa bana ba gago go baakanyetsa dikarabo go ya ka dingwaga tsa bone. (Math. 21:16) Ka dinako tse dingwe go tlotliwa ka dikgang tse di masisi tse di jaaka mathata a nnang teng mo manyalong le dikgang tsa boitsholo. Le fa go ntse jalo, go ka nna le dirapa tse ngwana a ka kgonang go araba mo go tsone. Gape thusa bana ba gago go itse gore ga  ba kitla ba newa tshono ya go araba nako le nako fa ba tsholetsa. Seo se ka ba thusa gore ba se ka ba ngala fa ba sa newe tshono ya go araba.—1 Tim. 6:18. d

18. Ga re a tshwanela go dira eng fa re araba? (Diane 27:2)

¹⁸ Re ka kgona go baakanyetsa dikarabo tse di tlotlomatsang Jehofa le tse di tla kgothatsang bakaulengwe ba rona. (Diane 25:11) Ka dinako dingwe fa re arabela re ka nna ra bua ka dilo tse di kileng tsa re diragalela, le fa go ntse jalo ga re a tshwanela go bua thata ka rona. (Bala Diane 27:2; 2 Bakor. 10:18) Go na le moo, re tshwanetse go bua thata ka Jehofa, Lefoko la gagwe le ka batho ba gagwe. (Tshen. 4:11) Mme gone, ka dinako dingwe potso e ka re re tlhalose gore re akanya eng, mme re tshwanetse go dira jalo. Re tla bona sekai mo potsong ya serapa se se latelang.

19. (a) Go tla direga eng fa re akanyetsa ba bangwe? (Baroma 1:11, 12) (b) Ke eng se o se ratang ka go araba kwa dipokanong?

¹⁹ Le fa go se na melao e e gagametseng ya gore re arabe jang, re ka leka go kgothatsa ba bangwe. Mo maemong mangwe re ka tlhoka go araba gantsinyana. Mo go a mangwe re ka nna ra se ka ra kgona go arabela gantsi jaaka re batla, mme re ka itumelela gore ba bangwe ba kgonne go araba. Fa re akanyetsa ba bangwe, re ka kgona go ‘kgothatsana.’—Bala Baroma 1:11, 12.