1. Ke eng se se neng se direga fa Jesu a ne a dira kgakgamatso ya gagwe ya ntlha?

 FA Jesu a simolola bodiredi jwa gagwe kwa bowelong jwa ngwaga wa 29 C.E., ene le mmaagwe le barutwa bangwe ba gagwe ba ne ba lalediwa lenyalong kwa motsaneng mongwe o o gaufi le Nasaretha o o bidiwang Kana. Marea o ne a tlwaelane le ba malapa a batho ba ba neng ba nyalana e bile go lebega a ne a thusa ka go tlhokomela batho ba ba tlileng lenyalong. Fa lenyalo le ntse le tsweletse, beine e ne ya fela, gongwe e le ka gonne batho ba ba neng ba tlile lenyalong ba ne ba le bantsi thata. Seo se ne se ka tsenya banyalani mmogo le ba malapa a bone matlho. b Marea o ne a raya Jesu a re: “Ga ba na beine.” (Joh. 2:1-3) Jesu o ile a dira eng? O ile a dira sengwe se se gakgamatsang. O ne a fetola metsi gore e nne “beine e e monate.”—Joh. 2:9, 10.

2-3. (a) Jesu o ne a dira dikgakgamatso dife? (b) Go ithuta ka dikgakgamatso tsa ga Jesu go tla re tswela mosola jang?

² Fa Jesu a ne a le mo lefatsheng, o ne a dira dikgakgamatso tse dingwe gape tse dintsi. c O ne a dirisa maatla a gagwe go thusa batho ba le bantsintsi. Ka sekai, nako nngwe o ile a fepa banna ba le 5 000 mme moragonyana ba le 4 000. Go ka  direga gore o ile a fepa batho ba le 27 000 fa re balela basadi le bana ba ba neng ba le gone ka nako eo. (Math. 14:15-21; 15:32-38) Mo makgetlong ao a mabedi, o ne a fodisa le batho ba le bantsi ba ba neng ba lwala. (Math. 14:14; 15:30, 31) Akanya fela gore batho bao ba ne ba gakgametse jang fa Jesu a ba fodisa a bo a ba fa dijo!

³ Re ka ithuta dilo di le dintsi mo dikgakgamatsong tse Jesu a ileng a di dira. Mo setlhogong seno, re tlile go tlotla ka dithuto tse di kgothatsang tse re ka di ithutang mo dikgakgamatsong tseo. Go tswa foo, re tla bona gore re ka etsa jang tsela e Jesu a neng a le boikokobetso le e a neng a le pelotlhomogi ka yone.

4. Dikgakgamatso tse Jesu a ileng a di dira di re ruta ka mang?

⁴ Dikgakgamatso tse Jesu a ileng a di dira, di re ruta dithuto tse di kgothatsang ka ene le Rraagwe. Jehofa ke ene a neileng Jesu maatla a gore a kgone go dira dikgakgamatso tseo. Ditiro 10:38 e a re ‘Modimo o ne a tlotsa Jesu ka moya o o boitshepo a bo a mo naya maatla. O ne a tsamaya mo nageng eo yotlhe a dira dilo tse di molemo e bile a fodisa botlhe ba ba neng ba gateletswe ke Diabolo, ka gonne Modimo o ne a na le ene.’ Sengwe le sengwe se Jesu a neng a se bua le se a neng a se dira, go akaretsa le dikgakgamatso tsotlhe tse a di dirileng, di ne di bontsha tsela e Rraagwe a akanyang ka yone le e a ikutlwang ka yone. (Joh. 14:9) A re tlotleng ka dilo di le tharo tse re ka di ithutang mo dikgakgamatsong tse Jesu a ileng a di dira.

5. Ke eng se se neng se dira gore Jesu a dire dikgakgamatso? (Mathaio 20:30-34)

⁵ Sa ntlha, Jesu le Rraagwe ba re rata thata. Fa Jesu a ne a le mo lefatsheng, o ne a bontsha gore o rata batho ka go dirisa maatla a gagwe go thusa ba ba neng ba boga. Nako nngwe banna ba ba foufetseng ba ne ba mo kopa gore a ba fodise. (Bala Mathaio 20:30-34.) Ela tlhoko gore Jesu “o ne a ba tlhomogela pelo” a bo a ba fodisa. Lefoko la Segerika le le ranotsweng e le “o ne a ba tlhomogela pelo,” le kaya kutlwelobotlhoko e e tseneletseng. Kutlwelobotlhoko eo e ne e bontsha gore Jesu o rata batho, e bile e ne ya mo tlhotlheletsa gore a fepe ba ba tshwerweng ke tlala a bo a fodise motho yo o nang le lepero. (Math. 15:32; Mar. 1:41) Re ka tlhatswega pelo gore Jehofa, Modimo yo o “pelotlhomogi thata,” le Morwawe ba re rata thata e bile ba utlwa botlhoko fa re boga. (Luke 1:78; 1 Pet. 5:7) Ba swegaswega pelo go fedisa dilo tsotlhe tse di utlwisang batho botlhoko.

6. Modimo o neile Jesu maatla a go dira eng?

⁶ Sa bobedi, Modimo o neile Jesu maatla a go rarabolola mathata otlhe a batho. Fa Jesu a ne a dira dikgakgamatso, o ne a bontsha gore o na le maatla a go rarabolola mathata a re neng re ka se kgone go a rarabolola. Ka sekai, o na le maatla a go tlosa boleo jo re bo tsereng mo go Adame jo bo dirang gore re lwale re bo re swe. (Math. 9:1-6; Bar. 5:12, 18, 19) Dikgakgamatso tse a neng a di dira, di ne di bontsha gore a ka kgona go fodisa bolwetse jwa “mofuta mongwe le mongwe” le gore a ka kgona go tsosa baswi. (Math. 4:23; Joh. 11:43, 44) Gape o na le maatla a go didimatsa diphefo tsa matsubutsubu le go golola batho mo madimoneng. (Mar. 4:37-39; Luke 8:2) Ruri go a kgothatsa go itse gore Jehofa o neile Morwawe maatla a go dira dilo tseno!

7-8. (a) Dikgakgamatso tse Jesu a ileng a di dira di re netefaletsa eng? (b) Wena o ka itumelela go bona kgakgamatso efe kwa lefatsheng le lesha?

⁷ Sa boraro, ga re belaele gore dilo tse dintle tse Modimo a solofetsang gore o tla re direla  tsone ka Bogosi jwa gagwe di tla direga. Dikgakgamatso tse Jesu a neng a di dira, di bontsha se a tlileng go se direla batho botlhe fa a busa lefatshe e le Kgosi ya Bogosi Jwa Modimo. Leka go akanya gore botshelo bo tla bo bo ntse jang fa Jesu a tla bo a busa. Re tla bo re tshela monate ka gonne o tla bo a fedisitse malwetse le makoa otlhe a a bogisang batho. (Isa. 33:24; 35:5, 6; Tshen. 21:3, 4) Ga re kitla re bolawa ke tlala e bile go tla bo go sa tlhole go na le masetlapelo a tlholego. (Isa. 25:6; Mar. 4:41) Re tla itumelela go amogela batho ba re ba ratang ba ba tla bong ba tsositswe. (Joh. 5:28, 29) Wena o ka itumelela go bona kgakgamatso efe kwa lefatsheng le lesha?

⁸ Fa Jesu a ne a dira dikgakgamatso, o ne a bontsha gore o boikokobetso le gore o pelotlhomogi. Re tshwanetse go leka ka natla go nna le dinonofo tseno. A re tlotleng ka dikgakgamatso tse pedi tse Jesu a ileng a di dira tse di neng di bontsha gore o boikokobetso le gore o pelotlhomogi. Re tla simolola ka se se neng sa direga fa a ne a le kwa lenyalong kwa Kana.

9. Goreng Jesu a ile a dira kgakgamatso kwa lenyalong? (Johane 2:6-10)

⁹ Bala Johane 2:6-10. Fa beine e ne e fela kwa lenyalong, a Jesu o ne a patelesega go dira sengwe? Nnyaa. Go ne go se na boporofeti bope jo bo ileng jwa bolelela pele gore Mesia o ne a tla dira beine ka kgakgamatso. Mme akanya fela gore wena o ne o ka ikutlwa  jang fa dinô di ne di ka fela kwa lenyalong la gago. Jesu o ne a utlwela banyalani bao botlhoko e bile o ne a sa batle gore ba tsenwe ke matlho. Ka jalo, o ne a dira kgakgamatso e re buileng ka yone. O ne a dira beine ka dilitara di ka nna 390 tsa metsi. Gongwe o ile a e dira e le ntsi jalo gore ba kgone go e dirisa mo nakong e e tlang kgotsa gore banyalani bao ba e rekise gore ba nne le madinyana. Ntle le pelaelo, banyalani bao ba tshwanetse ba bo ba ne ba lebogela se Jesu a ba diretseng sone.

10. Johane kgaolo 2 e tlhalosa dintlha dife tsa botlhokwa? (Bona le setshwantsho.)

¹⁰ Ela tlhoko dintlha dingwe tsa botlhokwa tse di tlhalosiwang mo go Johane kgaolo 2. A o lemogile gore Jesu ga se ene a ileng a tshela metsi mo dinkgong? Go na le moo, o ile a kopa batlhanka gore e nne bone ba dirang jalo. (Temana 6, 7) Fa a sena go fetola metsi gore e nne beine, ga a ka a isa beine eo kwa morulaganying wa mokete. Go na le moo, o ne a kopa batlhanka gore ba dire jalo. (Temana 8) Jesu ga a ka a tsholetsa kopi e e nang le beine a bo a raya batho a re, ‘Utlwang fela gore ke dirile beine e e monate jang!’

11. Re ka ithuta eng mo kgakgamatsong ya ga Jesu?

¹¹ Re ka ithuta eng mo kgakgamatsong ya ga Jesu ya go fetola metsi gore e nne beine? Re ithuta go nna boikokobetso. Jesu ga a ka a ikgantsha fa a sena go dira kgakgamatso eo, tota e bile, ga a ise a ko a ikgantshe ka dilo tsotlhe tse a di dirileng. Go na le moo, o ne a ikokobetsa e bile gangwe le gape o ne a batla gore go tlotlomadiwe Rraagwe. (Joh. 5:19, 30; 8:28) Fa le rona re le boikokobetso e bile re sa itseele kwa godimo, ga re kitla re ikgantsha fa re na le bokgoni bongwe jo bo rileng. Fa go na le dilo tse re kgonang go di dira mo tirelong ya ga Jehofa, ga re a tshwanela go ikgantsha ka tsone mme re tshwanetse go tlotlomatsa Jehofa. (Jer. 9:23, 24) Boammaaruri ke gore re ka se kgone go dira sepe fa Jehofa a sa re thuse.—1 Bakor. 1:26-31.

12. Re ka bontsha jang gape gore re boikokobetso jaaka Jesu? Dira sekai.

¹² Re ka bontsha jang gape gore re boikokobetso jaaka Jesu? A re re mogolwane mongwe o thusa motlhanka wa bodiredi yo mosha go baakanyetsa puo ya gagwe ya ntlha ya phatlalatsa. Seo se thusa mokaulengwe yoo yo mosha gore a beye puo e e monate ya phatlalatsa e bile bakaulengwe le bokgaitsadi ba e itumelela fela thata. Morago ga dipokano, mongwe o tla kwa mogolwaneng yoo a bo a mo raya a re: ‘Puo ya ga Mokaulengwe Mangmang e ne e le monate tota!’ A mogolwane o tla re: ‘Ee, mme ke nna ke neng ke mo thusa’? Kgotsa a o tla bontsha boikokobetso a bo a re: ‘Ee, e ne e le monate tota, o berekile’? Fa re le boikokobetso, ga re kitla re batla go tlotlomadiwa fa re thusitse ba bangwe. Re itumedisiwa ke go itse gore Jehofa o itumelela se re se dirang e bile o a se lebogela. (Bapisa le Mathaio 6:2-4; Baheb. 13:16) Jehofa o a itumela fa a bona gore re boikokobetso fela jaaka Jesu.—1 Pet. 5:6.

13. Ke eng se Jesu a ileng a se bona fa a tsena mo motseng wa Naine, mme o ne a dira eng? (Luke 7:11-15)

¹³ Bala Luke 7:11-15. Nako nngwe Jesu o ne a ya kwa motseng mongwe wa kwa Galalea o o bidiwang Naine. Motse oo o ne o le gaufi le Shunema, kwa moporofeti Elisha a ileng a tsosa morwa wa mosadi mongwe gone dingwaga di le 900 pele ga foo. (2 Dikg. 4:32-37) Fa Jesu a tsena mo motseng oo, o ne a kopana le batho ba ya mabitleng. Go ne go utlwisa botlhoko tota ka gonne lekawana le le neng le tlhokafetse e ne e le ngwana wa go  tshega le go tlhonama wa mosadi yo e neng e le motlholagadi. Mosadi yoo yo o neng a utlwile botlhoko, o ne a na le batho bangwe ba mo motseng. Jesu o ne a ba emisa a bo a dira sengwe se se gakgamatsang. O ne a tsosa ngwana wa mosadi yoo. Yono ke motho wa ntlha yo Jesu a neng a mo tsosa mo go ba le bararo ba go buiwang ka bone mo dibukeng tse di buang ka botshelo jwa ga Jesu.

14. Go tlhalosiwa dintlha dife tsa botlhokwa mo go Luke kgaolo 7? (Bona le setshwantsho.)

¹⁴ Akanya ka dintlha dingwe tsa botlhokwa tse di tlhalosiwang mo go Luke kgaolo 7. A o lemogile gore Jesu o ne “a bona” mosadi yo o neng a utlwile botlhoko a bo “a mo tlhomogela pelo”? (Temana 13) Gongwe Jesu o ne a mmona a lela fa a ntse a tsamaya fa pele ga setopo sa morwawe, mme o ne a mo tlhomogela pelo. Jesu ga a ka a mo utlwela botlhoko fela, mme o ne a dira sengwe go mmontsha gore o mo utlwela botlhoko. O ne a bua le ene ka bonolo a re: “Tlogela go lela.” Go tswa foo, o ne a tsosa lekawana leo a bo “a mo naya mmaagwe.”—Temana 14, 15.

15. Re ka ithuta eng mo kgakgamatsong e Jesu a ileng a e dira?

¹⁵ Re ka ithuta eng mo kgakgamatsong e Jesu a ileng a e dira ya go tsosa morwa wa motlholagadi? Re ithuta gore fa mongwe a tlhokafaletswe, re tshwanetse go mo tlhomogela pelo. Gone ga re kgone go tsosa baswi jaaka Jesu, le fa go ntse jalo le rona re ka bontsha ba bangwe gore re ba tlhomogela pelo ka go nna kelotlhoko. Re ka dira seo ka go ba gomotsa le go ba thusa ka dilo dingwe tse ba di tlhokang. d (Diane 17:17; 2 Bakor. 1:3, 4; 1 Pet. 3:8) Ba ka gomotsega tota le fa re ba direla dilo tse dinnye.

16. O ithuta eng mo go se se ileng sa diragalela kgaitsadi yo o mo setshwantshong yo o tlhokafaletsweng ke ngwana?

¹⁶ Ka sekai, dingwaga di le mmalwa tse di fetileng fa go ntse go opelwa kwa dipokanong, kgaitsadi mongwe o ne a lemoga gore kgaitsadi yo o bapileng le ene o a lela. Pina e e neng  e opelwa e ne e bua ka tsogo ya baswi, mme kgaitsadi yo o neng a lela, o ne a sa tswa go tlhokafalelwa ke ngwana. Kgaitsadi yoo o ne a mo atamela a bo a mo tshwara ka seatla go fitlha pina e fela. Moragonyana kgaitsadi yo o neng a tlhokafaletswe ke ngwana o ne a re: “Ke ne ka lemoga gore bakaulengwe le bokgaitsadi ba a nthata.” O ne a itumeletse gore o ile a kgona go ya dipokanong. O ne a re: “Fa re le kwa dipokanong, Jehofa o a re thusa.” Re ka tlhatswega pelo gore Jehofa o bona dilo tse dinnye tse re di dirang go gomotsa ba ba tlhokafaletsweng fa ba ‘kgobegile marapo.’—Pes. 34:18.

17. Re ithutile eng mo setlhogong seno?

¹⁷ Go ithuta ka dikgakgamatso tse Jesu a ileng a di dira go ka re kgothatsa. Di re ruta gore Jehofa le Jesu ba re rata fela thata, gore Jesu o na le maatla a go fedisa mathata otlhe a batho le gore re ka tlhatswega pelo gore go ise go ye kae Jehofa o tla dira dilo tsotlhe tse a re solofeditseng tsone. Fa re bala dipego tseno, re tshwanetse go akanyetsa kwa teng ka gore re ka etsa jang dinonofo tsa ga Jesu. Fa o ithuta o le nosi kgotsa lo tshwere Kobamelo ya Lelapa, gongwe lo ka ithuta ka dikgakgamatso tse dingwe tse Jesu a ileng a di dira. Fa o sena go ithuta, tlotlela ba bangwe dilo tse o di ithutileng. Fa o dira jalo, o tla kgona go ba kgothatsa.—Bar. 1:11, 12.

18. Re tlile go tlotla ka eng mo setlhogong se se latelang?

¹⁸ Fa Jesu a tloga a wetsa bodiredi jwa gagwe mo lefatsheng, o ne a tsosa tsala nngwe ya gagwe. Kgakgamatso eno ya ga Jesu, e ne e farologane le tse dingwe ka gonne o ile a dira sengwe se go neng go lebega se ka se kgonege. Re ka ithuta eng mo pegong eno? Mme re ka dira eng gore re tlhatswege pelo le go feta gore baswi ba tlile go tsosiwa? Re tla tlotla ka dipotso tseno mo setlhogong se se latelang.