1-2. Re tshwanetse go dira eng fa re ntse re emetse lefatshe le lesha?

 RE ITUMELELA go itse gore Jehofa o tlile go fedisa lefatshe leno le le bosula a bo a le emisetsa ka lefatshe le lesha. (2 Pet. 3:13) Le fa gone re sa itse gore seno se tla direga leng, dilo tse di diregang mo lefatsheng gone jaanong di bontsha gore go setse go le gaufi thata.—Math. 24:32-34, 36; Dit. 1:7.

² Le fa re ka tswa re na le lobaka lo lo kae re le mo boammaaruring, rotlhe re tshwanetse go nna re itlhatswa pelo gore Modimo o tlile go dira se a re solofetsang sone. Ka ntlha ya eng? Ka gonne tumelo ya rona e ka koafala. Moaposetoloi Paulo o ne a re go tlhoka tumelo ke “boleo jo bo re raelang motlhofo.” (Baheb. 12:1) Gore tumelo ya rona e se ka ya koafala, re tshwanetse go nna re akanyetsa kwa teng ka dilo tse di bontshang gore lefatshe le lesha le setse le le gaufi.—Baheb. 11:1.

3. Re tla tlotla ka eng mo setlhogong seno?

³ Mo setlhogong seno, re tla tlotla ka dilo tseno tse tharo tse di tla re thusang go tlhatswega pelo le go feta gore Jehofa o tla dira lefatshe paradaise: (1) go akanyetsa kwa teng ka thekololo, (2) go akanya ka maatla a ga Jehofa le (3) go dira dilo tse di re thusang gore re atamalane le Jehofa. Go tswa foo, re tla bona gore se Jehofa a ileng a se bolelela Habakuke se ka  nonotsha tumelo ya rona jang. A re simololeng pele ka go tlotla ka dilo tse di re diragalelang gone jaanong tse di tlhokang gore re nne le tumelo e e nonofileng ya gore lefatshe e tla nna paradaise.

KE ENG FA RE TLHOKA TUMELO E E NONOFILENG?

4. Ke eng fa re tshwanetse go nna le tumelo e e nonofileng?

⁴ Re tshwanetse go nna le tumelo e e nonofileng ka gonne letsatsi le letsatsi re dira ditshwetso. Ka sekai, re dira ditshwetso tse di amanang le boitlosobodutu, ditsala, sekolo, lenyalo, bana le tiro ya boitshediso. Re tshwanetse go ipotsa go re: ‘A ke dira dilo tse di bontshang gore ke tlhatswegile pelo gore lefatshe le lesha le gaufi? Kgotsa a ke dira dilo tse di dirwang ke batho ba ba sa dumeleng gore re tlile go tshelela ruri?’ (Math. 6:19, 20; Luke 12:16-21) Fa re tlhatswegile pelo gore lefatshe le lesha le gaufi thata, re tla kgona go dira ditshwetso tse di siameng.

5-6. Goreng re tshwanetse go nna le tumelo e e nonofileng fa re na le mathata? Dira sekai.

⁵ Gape re tlhoka tumelo e e nonofileng ka gonne re tlhagelwa ke mathata. Re ka nna ra bogisiwa, ra lwala thata kgotsa ra tlhagelwa ke mathata mangwe a a re kgobang marapo. Fa e le gone mathata a simologang, re ka nna ra kgona go a itshokela. Mme go le gantsi mathata ga a fele ka bonako. Ka jalo, re tlhoka tumelo e e nonofileng gore re kgone go itshoka le gore re tswelele re direla Jehofa re itumetse.—Bar. 12:12; 1 Pet. 1:6, 7.

⁶ Fa re le mo mathateng, go ka nna ga lebega e kete lefatshe le lesha ga le kitla le tla. Fa re ikutlwa jalo, a seno se raya gore tumelo ya rona e bokoa? Nnyaa. A re dire sekai. Fa go le mariga mme go le tsididi thata, go ka nna ga lebega e kete ga a kitla a fela, mme gone a tlile go fela. Ka tsela e e tshwanang, fa re kgobegile marapo thata, re ka nna ra akanya gore lefatshe le lesha le ka se tle. Mme fa tumelo ya rona e nonofile, ga re kitla re belaela gore Modimo o tla dira se a se solofeditseng. (Pes. 94:3, 14, 15; Baheb. 6:17-19) Seno se tla re thusa gore re tswelele re direla Jehofa.

7. Re tshwanetse go ikela tlhoko gore re se ka ra dira eng?

⁷ Tiro ya go rera le yone e tlhoka gore re nne le tumelo e e nonofileng. Batho ba le bantsi ba re ba rerelang ba re “dikgang tse di molemo” tsa gore Modimo o tla dira gore lefatshe e nne paradaise ke ditlhamane fela. (Math. 24:14; Esek. 33:32) Re tshwanetse go ikela tlhoko gore re se ka ra simolola go nna le dipelaelo jaaka bone. Gore seno se se ka sa direga, re tshwanetse go nna re nonotsha tumelo ya rona. A re tlotleng ka dilo di le tharo tse re ka di dirang go nonotsha tumelo ya rona.

AKANYETSA KWA TENG KA THEKOLOLO

8-9. Go akanyetsa kwa teng ka thekololo go ka nonotsha tumelo ya rona jang?

⁸ Go akanyetsa kwa teng ka thekololo go tla re nonotsha tumelo. E re ka Modimo a ile a ntsha thekololo, seno ke bosupi jwa gore o tlile go dira se a se solofeditseng. Fa re nna re akantse ka se Jehofa a ileng a se dira gore a ntshe thekololo, re ka se belaele gore o tla dira gore re tshelele ruri mo lefatsheng le lesha. Goreng re rialo?

⁹ Jehofa o ile a dira eng gore a ntshe thekololo? O ne a romela Morwawe yo a mo ratang thata, yo a feditseng nako e telele a na le ene kwa legodimong, gore a tle mo lefatsheng. Fa Jesu a le mo lefatsheng, o ile a itshokela mathata a le mantsi, mme kwa bofelong o ne a bogisiwa a bo a bolawa setlhogo. Seo se ile sa utlwisa Jehofa botlhoko. Jehofa o ne a ka  se letle gore Morwawe a bogisiwe a bo a bolawe gore re tshele nako e khutshwane fela. (Joh. 3:16; 1 Pet. 1:18, 19) E re ka a ile a ntsha thekololo ka Morwawe yo a mo ratang thata, o tlile go netefatsa gore re tshelela ruri mo lefatsheng le lesha.

AKANYA KA MAATLA A GA JEHOFA

10. Baefeso 3:20 e a re Jehofa o kgona go dira eng?

¹⁰ Sengwe gape se se ka nonotshang tumelo ya rona ke go akanya ka maatla a ga Jehofa. Jehofa o na le maatla a go dira sengwe le sengwe se a reng o tla se dira. Batho ba le bantsi ba akanya gore go ka se kgonege gore Modimo a dire lefatshe paradaise. Le fa go ntse jalo, go le gantsi Jehofa o solofetsa go dira dilo tse batho ba ka se kgoneng go di dira. Ga a palelwe ke sepe ka gonne ke Mothatayotlhe. (Jobe 42:2; Mar. 10:27) Ka jalo, ga re gakgamale fa a re solofetsa gore o tla dira dilo tse go lebegang di ka se kgonege.—Bala Baefeso 3:20.

11. Modimo o ile a dira dilo dife tse go neng go lebega di ka se kgonege? (Bona lebokoso le le reng, “ Dilo Tse Modimo a Ileng a di Dira Tse go Neng go Lebega Di ka Se Kgonege.”)

¹¹ Go na le dilo dingwe tse Jehofa a ileng a di solofetsa batho ba gagwe mo nakong e e fetileng tse go neng go lebega di ka se kgonege. Ka sekai, o ile a bolelela Aborahame le Sara gore ba tla nna le ngwana le fa ba ne ba setse ba tsofetse. (Gen. 17:15-17) Gape o ne a bolelela Aborahame gore o tla naya ditlogolwana tsa gagwe lefatshe la Kanana. Go ne go lebega seno se ka se kgonege ka gonne go ne ga feta dingwaga di le dintsi Baiseraele e le makgoba kwa Egepeto. Mme go ne ga kgonega. Dingwaga moragonyana, Jehofa o ne a re Elisabetha o tla nna le ngwana le fa a ne a setse a tsofetse. Gape o ne a bolelela Marea gore o tla tshola Morwawe le fa gone Marea a ne a ise a tlhakanele dikobo le ope. Seno se ne se tla diragatsa boporofeti jo Jehofa a ileng a bo bua dingwaga di le dintsi pele ga foo kwa tshimong ya Edene.—Gen. 3:15.

12. Joshua 23:14 le Isaia 55:10 le 11 di re bontsha jang gore Jehofa o tla dira se a se solofetsang?

¹² Jehofa o ile a solofetsa dilo di le dintsi mo nakong e e fetileng a bo a di dira. Go akanyetsa kwa teng ka dilo tseno, go re thusa go lemoga gore o na le maatla e bile seno se re tlhatswa pelo le go feta gore o tla dira lefatshe paradaise. (Bala Joshua 23:14; Isaia 55:10, 11.) Fa re sa belaele, re tla thusa batho ba bangwe go dumela gore Modimo o tla dira se a se solofeditseng. Jehofa o ne a re go tla nna le magodimo a masha le lefatshe le lesha. Go tswa foo a bo a re: “Mafoko ano a a ikanyega e bile a boammaaruri.”—Tshen. 21:1, 5.

DIRA DILO TSE DI TLA GO THUSANG GO ATAMALANA LE JEHOFA

13. Go ya dipokanong go nonotsha tumelo ya rona jang? Tlhalosa.

¹³ Go dira dilo tse di re thusang go atamalana le Jehofa le gone go nonotsha tumelo ya rona. Ka sekai, go ya dipokanong go re tswela mosola. Kgaitsadi mongwe yo o feditseng dingwaga di le dintsi mo tirelong ya nako e e tletseng yo o bidiwang Anna a re: “Go ya dipokanong go nonotsha tumelo ya me. Ka dinako tse dingwe, mokaulengwe yo o neelang puo ga a rute monate go le kalo kgotsa ga a bue sepe se sesha. Le fa go ntse jalo, ke ithuta sengwe se se nthusang go tlhaloganya Baebele botoka, mme seno se nonotsha tumelo ya me.” b Dikarabo tse di kgothatsang tsa bakaulengwe le bokgaitsadi le tsone di nonotsha tumelo ya rona.—Bar. 1:11, 12; 10:17.

14. Go ya tshimong go nonotsha tumelo ya rona jang?

¹⁴ Go ya tshimong le gone go nonotsha tumelo ya rona. (Baheb. 10:23) Kgaitsadi mongwe yo o feditseng dingwaga di feta 70 a direla Jehofa yo o bidiwang Barbara a re: “Go ya tshimong go nonotsha tumelo ya me fela thata. Fa ke bolelela batho dilo tse dintle tse Jehofa a tlileng go re direla tsone, tumelo ya me e nonofa le go feta.”

15. Go ithuta re le nosi go nonotsha tumelo ya rona jang? (Bona le ditshwantsho.)

¹⁵ Go na le sengwe gape se se ka nonotshang tumelo ya rona. Ke eng seo? Ke go ithuta re le nosi. Kgaitsadi mongwe yo o bidiwang Susan o thusiwa ke go itirela thulaganyo ya go ithuta. A re: “Ka Sontaga, ke baakanyetsa Thuto ya Tora ya Tebelo ya beke e e latelang. Ka Mantaga le Labobedi, ke baakanyetsa dipokano tsa mo gare ga beke. Mo malatsing a mangwe, ke nna le diporojeke tse dingwe tsa go ithuta.” E re ka Susan a ithuta jalo beke le beke, tumelo ya gagwe e nna e nonofa. Kgaitsadi mongwe yo o bidiwang Irene, yo o feditseng dingwaga di le dintsi a direla kwa ntlokgolo ya Basupi ba ga Jehofa, ene o thusiwa ke go ithuta boporofeti. A re: “Go bona kafa boporofeti bo diragadiwang ka gone go nonotsha tumelo ya me tota.” c

“RURI E TLA DIRAGALA”

16. Ke eng fa se Jehofa a ileng a se bolelela Habakuke se re kgothatsa? (Bahebera 10:36, 37)

¹⁶ Batlhanka bangwe ba ga Jehofa ba na le nako e telele ba letetse gore lefatshe leno le le bosula le senngwe. Batho bangwe ba tsaya gore bokhutlo bo a diega. Mme e re ka Jehofa a itse gore batlhanka ba gagwe ba letetse lefatshe le lesha, o ile a raya Habakuke a re: “Ponatshegelo eno e sa ntse e letetse nako e e tlhomilweng, mme e itlhaganelela kwa bokhutlong jwa yone, e bile ga e kitla e bua maaka.  Le fa e ka diega, nna o e lebeletse! Gonne ruri e tla diragala. Ga e kitla e tla morago ga nako!” (Hab. 2:3) A Modimo o ne a batla gore mafoko ao a kgothatse Habakuke fela, kgotsa o ne a batla gore le rona a re kgothatse? Jehofa o ne a laela moaposetoloi Paulo gore a bolelele Bakeresete ba ba letetseng lefatshe le lesha mafoko ao. (Bala Bahebera 10:36, 37.) Le fa go ka lebega e kete tsholofetso ya ga Jehofa e tsaya nako, re ka tlhatswega pelo gore ruri “e tla diragala. Ga e kitla e tla morago ga nako!”

17. Kgaitsadi mongwe o ile a dirisa jang se Jehofa a ileng a se bolelela Habakuke?

¹⁷ Batlhanka ba le bantsi ba ga Jehofa ba ile ‘ba nna ba lebeletse’ fela jaaka Jehofa a ne a laetse Habakuke. Go fetile dingwaga di le dintsi bangwe ba bone ba ntse ba letile. Ka sekai, kgaitsadi mongwe yo o bidiwang Louise o ne a simolola go direla Jehofa ka 1939. A re: “Ka nako eo, ke ne ke ithaya ke re Aramagedona e tla tla pele ga ke fetsa sekolo. Mme ga e a ka ya tla. Fa dingwaga di ntse di ya, go bala dipego tsa Baebele tse di buang ka batho bangwe ba ba ileng ba leta gore Jehofa a dire se a se solofeditseng, go ile ga nthusa gore ke se ka ka fela pelo. Ke ne ke tlhola ke bala ka Noa, Aborahame, Josefa le ba bangwe. Go dumela gore Jehofa o tla dira se a se solofeditseng go ile ga nthusa gore ke nne ke letile.” Batho ba le bantsi ba ba sa bolong go direla Jehofa le bone ba ikutlwa fela jalo.

18. Dilo tse Jehofa a di bopileng di re netefaletsa jang gore o tla dira lefatshe paradaise?

¹⁸ Ke nnete gore lefatshe le lesha ga le ise le nne teng. Mme gone, akanya ka dilo dingwe tse Jehofa a ileng a di bopa tse di jaaka dinaledi, ditlhare, diphologolo le batho. Le fa gone dilo tseno di ne di seyo kwa tshimologong, gone jaanong di teng e bile ga go na ope yo o ka ganetsang seo. (Gen. 1:1, 26, 27) Ka tsela e e tshwanang, Jehofa o re solofetsa gore o tla dira gore lefatshe leno e nne paradaise, mme o tla dira fela jalo. Ka nako eo, batho ba tla bo ba tshelela ruri ba sa lwale. Re tlhatswegile pelo gore Jehofa o tla tlisa lefatshe le lesha ka nako e a e beileng.—Isa. 65:17; Tshen. 21:3, 4.

19. O ka nonotsha tumelo ya gago jang?

¹⁹ Fa re sa ntse re letetse lefatshe le lesha, dira sotlhe se o ka se kgonang go nonotsha tumelo ya gago. Lebogela go bo Jehofa a re ntsheditse thekololo. Akanya ka maatla a ga Jehofa o bo o dire dilo tse di tla go thusang gore o atamalane le ene. Fa o dira jalo, o tla nna mongwe wa ‘ba ba amogelang se se solofeditsweng ka gonne ba na le tumelo e bile ba le pelotelele.’—Baheb. 6:11, 12; Bar. 5:5.