Pego ya ga Mathaio e e buang ka go tsholwa ga ga Jesu le botshelo jwa gagwe e farologane le pego ya ga Luke ka gonne fa ba ne ba kwala dipego tseo ba ne ba tlhomile mogopolo mo dilong tse di sa tshwaneng.

Pego ya ga Mathaio e tlhomile mogopolo thata mo ditiragalong tse di buang ka ga Josefa. E bua ka tsela e Josefa a ileng a tsiboga ka yone fa a ne a utlwa ka go ima ga ga Marea, nako ya fa a ne a lora ka moengele a mo tlhalosetsa se se neng se tla direga le gore o ne a dumalana le tlhaloso eo. (Math. 1:19-25) Gape Mathaio o bua ka toro ya ga Josefa e mo go yone moengele a neng a mmolelela gore a tshabele kwa Egepeto, nako ya fa ba ne ba tshaba, toro e mo go yone moengele a neng a mmolelela gore a boele kwa nageng ya Iseraele le nako ya fa ba boa, mo godimo ga moo, o ne a bua le ka tshwetso e Josefa a neng a e tsaya ya gore lelapa la gagwe le nne kwa Nasaretha. (Math. 2:13, 14, 19-23) Mo dikgaolong tsa ntlha tsa Efangele ya ga Mathaio, leina la ga Josefa le umakwa makgetlo a le robedi mme leina la ga Marea le umakwa makgetlo a le manê fela.

Ka fa letlhakoreng le lengwe, pego ya ga Luke e bua thata ka Marea. E akaretsa nako ya fa Marea a ne a etetswe ke moengele Gabariele, nako ya fa a ne a etetse Elisabetha le kafa Marea a neng a galaletsa Jehofa ka gone. (Luke 1:26-56) Gape Luke o umaka se Simeone a neng a se bolelela Marea ka pogo e e larileng kwa pele ya ga Jesu. Tota le ka nako ya fa lelapa la ga Marea le ne le ile kwa tempeleng fa Jesu a na le dingwaga di le 12, Luke o nopotse mafoko a ga Marea e seng a ga Josefa. Luke o tlhalosa gore Marea o ne a amegile thata ka ntlha ya ditiragalo tseo tsotlhe. (Luke 2:19, 34, 35, 48, 51) Mo dikgaolong tsa ntlha tse pedi tsa Efangele ya ga Luke, leina la ga Marea le umakilwe makgetlo a le 12 mme la ga Josefa le umakilwe makgetlo a le mararo fela. Ka jalo, Mathaio o bua thata ka dilo tse Josefa a neng a di dira le tse a neng a tshwenyegile ka tsone fa Luke ene a bua thata ka seabe sa ga Marea le dilo tse di mo diragaletseng.

Ka tsela e e tshwanang, tatelano ya losika e e kwadilweng ke banna bano ba babedi ga e tshwane. Mathaio o bua thata ka losika lwa ga Josefa e bile o bontsha gore morwa yo Josefa a mo godisitseng e bong Jesu, ke moruaboswa wa semolao wa puso ya ga Dafide. Ka ntlha yang? Ka gonne Josefa e ne e le setlogolwana sa ga Kgosi Dafide ka morwa wa ga Dafide e bong Solomone. (Math. 1:6, 16) Le fa go ntse jalo, Luke ene o bua thata ka losika lwa ga Marea e bile o tlhalosa gore Jesu ke moruaboswa “kafa nameng” wa puso ya ga Dafide. (Bar. 1:3) Ka ntlha yang? Ka gonne Marea e ne e le setlogolwana sa ga Kgosi Dafide ka losika lwa morwa Dafide e bong Nathane. (Luke 3:31) Mme gone, ke eng fa Luke a sa umake Marea e le morwadia Heli mo tatelanong ya gagwe ya losika? Ka gonne gantsi tatelano ya losika e ne e dirwa mo letlhakoreng la banna fela. Ka jalo, fa Luke a ne a bua ka Josefa a re ke morwa Heli, go ne go tlhaloganngwa gore seo se raya gore Josefa ke mogwe wa ga Heli.—Luke 3:23.

Tatelano ya losika ya ga Mathaio le ya ga Luke e bontsha sentle gore Jesu e ne e le Mesia yo o boleletsweng pele. Tota e bile, boammaaruri jo bo kaga tatelano ya losika lwa ga Jesu bo ne bo itsege thata jaana mo e leng gore Bafarasai le Basadukae ba ne ba ka se bo ganetse. Gompieno tatelano ya losika e e kwadilweng ke Mathaio le Luke ke karolo ya motheo wa rona wa tumelo e bile ke bosupi jwa gore ka metlha ditsholofetso tsa Modimo di a direga.