A GO na le kabelo nngwe e o  eletsang go e dira mme gone go sa kgonege? Gongwe go na le mongwe yo o e dirang. Kgotsa gongwe ke kabelo nngwe e o kileng wa e dira mme ga o tlhole o kgona go e dira ka gonne o godile, o a lwala, o na le mathata a tsa madi kgotsa o na le maikarabelo a lelapa. Gongwe o ne wa tshwanelwa ke go tlogela kabelo nngwe e o neng o na le nako e e telele o e dira ka ntlha ya diphetogo tse di nnileng teng mo phuthegong. Le fa lebaka e ka tswa e le lefe, o ka tswa o ikutlwa e kete ga o kgone go direla Jehofa jaaka o batla. Fa o le mo seemong seo, go motlhofo gore o kgobege marapo. Ke eng se se ka go thusang gore o se ka wa kgobega marapo mme o tswelele o itumetse?

Go bala pego ya ga Johane go tla re thusa go lemoga gore ke eng se re ka se dirang gore re itumelele go direla Jehofa. Jehofa o ne a naya Johane dikabelo tse di kgethegileng mme dilo ga di a ka tsa tsamaya jaaka Johane a ne a lebeletse. A ka tswa a ne a sa akanye gore o tla nna nako e e telele mo kgolegelong. Le fa a ne a le mo maemong ao, o ne a itumelela go direla Jehofa. Ke eng se se mo thusitseng? Rona re ka thusiwa ke eng gore re nne re itumetse le fa dilo di sa tsamaye jaaka re ne re lebeletse?

Mo e ka nnang ka April 29 C.E., Johane o ne a simolola kabelo ya gagwe ya go bolelela batho ka go tla ga ga Mesia. O ne a re: “Ikwatlhayeng, gonne bogosi jwa magodimo bo atametse.” (Math. 3:2; Luke 1:12-17) Batho ba le bantsi ba ile ba mo reetsa. Bontsi jwa bone ba ne ba ikwatlhaya ba bo ba kolobediwa. Gape Johane o ne a bolelela baeteledipele ba bodumedi ba ba boikgogomoso gore fa ba sa fetoge, Jehofa o tla ba otlhaya. (Math. 3:5-12) Johane o ile a dira selo sa botlhokwa thata ka October 29 C.E. fa a ne a kolobetsa Jesu. Go tswa foo o ne a laela batho gore ba nne balatedi ba ga Jesu ka gonne e ne e le ene Mesia yo o solofeditsweng.—Joh. 1:32-37.

Fa Jesu a bua ka Johane o ne a re: “Mo go ba ba tsetsweng ke basadi ga go ise go tsosiwe yo mogolo go feta Johane Mokolobetsi.”  (Math. 11:11) Ga go pelaelo gore Johane o ne a itumelela go segofadiwa ke Jehofa. Le gompieno Jehofa o segofatsa bakaulengwe le bokgaitsadi ba le bantsi. Ka sekai, mokaulengwe mongwe yo o bidiwang Terry le mosadi wa gagwe Sandra ba feditse dingwaga di feta 50 mo tirelong ya nako e e tletseng. Terry a re: “Ke nnile le dikabelo di le dintsi tse di itumedisang. Nkile ka nna mmulatsela, ka direla kwa Bethele, ka nna mmulatsela yo o kgethegileng, molebedi wa potologo, molebedi wa kgaolo mme gone jaanong ke mmulatsela yo o kgethegileng gape.” Re a itumela fa re newa dikabelo mo phuthegong mme jaaka re tla bona mo go se se diragaletseng Johane, fa re batla go itumelela go direla Jehofa fa maemo a rona a fetoga, re tshwanetse go tsaya matsapa.

Johane o ne a itumelela go direla Jehofa ka gonne o ne a anaanela kabelo ya gagwe. Ka sekai, fa Johane a sena go kolobetsa Jesu, barutwa ba ga Jesu ba ne ba oketsega mme ba gagwe ba ne ba fokotsega. E re ka barutwa ba ga Johane ba ne ba tshwenyegile, ba ne ba mo raya ba re: “Bona, yono o a kolobetsa e bile botlhe ba ya kwa go ene.” (Joh. 3:26) Johane o ne a ba raya a re: “Yo o nang le monyadiwa ke monyadi. Le fa go ntse jalo, tsala ya monyadi, fa e ema mme e mo utlwa, e nna le boipelo jo bo seng kana ka sepe ka ntlha ya lentswe la monyadi. Jalo boipelo jono jwa me bo tladitswe.” (Joh. 3:29) Johane o ne a sa ipapise le Jesu e bile o ne a sa inyatse ka gonne tiro ya ga Jesu e le botlhokwa go feta ya gagwe. O ne a itumelela go direla Jehofa ka gonne o ne a anaanela kabelo ya gagwe ya go nna “tsala ya monyadi.”

Tsela e Johane a neng a leba dilo ka yone e ne ya mo thusa go nna a itumetse le fa kabelo ya gagwe e ne e se motlhofo. Ka sekai, Johane e ne e le Monasirite ka jalo, o ne a sa letlelelwa go nwa beine. (Luke 1:15) Jesu o ne a re: “Johane o ne a tla a sa je le fa e le go nwa.” Jesu le barutwa ba gagwe e ne e se Banasirite, ka jalo, ba ne ba tshela jaaka mongwe le mongwe. (Math. 11:18, 19) Le fa Johane a ne a sa kgone go dira dikgakgamatso, o ne a itse gore balatedi ba ga Jesu ba kgona go di dira, go akaretsa le bangwe ba e kileng ya bo e le balatedi ba gagwe. (Math. 10:1; Joh. 10:41) Johane ga a ka a letla dilo tseo di mo kgoba marapo, go na le moo, o ne a nna a tlhomile mogopolo mo kabelong ya gagwe.

Le rona re tla itumela fa re anaanela dikabelo tse Jehofa a re neileng tsone. Terry yo re buileng ka ene pelenyana a re: “Ke ne ke tlhoma mogopolo mo kabelong nngwe le nngwe e ke e neilweng.” Fa a akanya ka botshelo jwa gagwe mo tirelong ya nako e e tletseng a re: “Ga ke ikwatlhaele sepe, e ne e le botshelo jo bo monate.”

Re na le tshiamelo ya go nna “badirimmogo le Modimo.” (1 Bakor. 3:9) Go nna re gopotse seo go tla re thusa gore re itumelele go mo direla. Fela jaaka go tlhokomela sengwe se se tlhwatlhwakgolo go ka dira gore se nne se le se ntle, go nna re gopotse gore re badirimmogo le Modimo go tla dira gore re itumelele go mo direla. Fa re dira jalo, ga re kitla re ipapisa le batho ba bangwe e bile ga re kitla re akanya gore kabelo ya rona ga e botlhokwa fa e bapisiwa le tsa ba bangwe.—Bagal. 6:4.

Johane o ne a itse gore nako nngwe o tla bo a sa tlhole a rera mme gone o ne a sa lebelela gore seo se direge ka bonako. (Joh. 3:30) Dikgwedi di le thataro fa a sena go kolobetsa Jesu, Kgosi Herode o ne a mo tsenya mo kgolegelong. Le fa go ntse jalo, o ne a dira sotlhe se a ka se kgonang go rerela ba bangwe. (Mar. 6:17-20) Ke eng se se mo thusitseng go lebana le dikgwetlho tseo? O ne a tlhomile mogopolo mo go direleng Jehofa.

Fa Johane a le kwa kgolegelong, barutwa ba gagwe ba ne ba mmolelela dilo tse Jesu a neng a di dira. (Math. 11:2; Luke 7:18) Johane o ne a dumela gore Jesu ke Mesia, mme o ne a ipotsa gore Jesu o tla diragatsa jang boporofeti jotlhe jo bo buang ka Mesia. E re ka Johane a ne a itse gore Mesia e tla nna kgosi,  a ka tswa a ne a ipotsa gore seo se tla direga leng. Gape a ka tswa a ne a ipotsa gore a Jesu o tla mo golola mo kgolegelong. Johane o ne a batla go itse gore Jesu o tlile go dira eng. Ka jalo, o ne a romela barutwa ba gagwe gore ba ye go mmotsa ba re: “A o Yo O Tlang kgotsa a re tshwanetse go lebelela o sele?” (Luke 7:19) Jesu o ne a ba laela gore ba ye go raya Johane ba re: “difofu di kgona go bona, ditlhotsa di a tsamaya, balepero ba a ntlafadiwa le bosusu ba a utlwa, baswi ba a tsosiwa, bahumanegi ba bolelelwa dikgang tse di molemo.” (Luke 7:20-22) Fa ba boa, Johane o tshwanetse a bo a ne a ba reeditse ka tlhoafalo fa ba mmolelela ka dikgakgamatso tse Jesu a di dirileng.

Se ba neng ba se bua se ne sa kgothatsa Johane. Dilo tse Jesu a neng a di dira di ne bontsha gore ke ene Mesia. Jesu ga a ka a golola Johane kwa kgolegelong mme Johane o ne a itse sentle gore tiro ya gagwe e ne e se ya lefela. Le fa gone Johane a ne a tshwerwe, o ne a itumetse.

Fela jaaka Johane, fa re tlhomile mogopolo mo tirong ya ga Jehofa, re tla kgona go itshoka ka boipelo re le pelotelele. (Bakol. 1:9-11) Gore re kgone go itshoka, re tshwanetse go bala Baebele le go tlhatlhanya ka se re se balang. Go dira jalo go tla re thusa go lemoga gore tiro e re e direlang Jehofa ga se ya lefela. (1 Bakor. 15:58) Sandra a re: “Go bala kgaolo e le nngwe ya Baebele letsatsi le letsatsi go nthusitse go atamalana le Jehofa. Go nthusa gore ke tlhome mogopolo mo go ene e seng mo go nna.” Go akanya ka se bakaulengwe le bokgaitsadi ba se dirang mo tirelong ya ga Jehofa go dira gore re se ka ra tlhoma mogopolo mo mathateng a rona mme re tlhome mogopolo mo go se Jehofa a se fitlheletseng. Sandra a re: “Thulaganyo ya kgwedi le kgwedi ya JW Broadcasting^® e re thusa go atamalana le bakaulengwe le bokgaitsadi ba rona e bile gape e dira gore re itumelele go direla Jehofa.”

Johane Mokolobetsi o ne a dira kabelo ya gagwe “ka moya wa ga Elija le maatla” e bile fela jaaka Elija, “e ne e le motho yo o nang le maikutlo a a tshwanang le a rona.” (Luke 1:17; Jak. 5:17) Fa re ka mo etsa ka go anaanela dikabelo tsa rona le go tlhoma mogopolo mo tirelong ya ga Jehofa, re tla itumela le fa re lebana le mathata.