Fa re ithuta Baebele, re ka dira dipatlisiso gore re kgone go tlhaloganya se re se ithutang botoka. Mme ga re a tshwanela go ithutela fela gore re itse Baebele. Re batla go ithuta mo go oketsegileng ka botho jwa ga Jehofa gore re mo rate le go feta. Fa o bala Baebele o ka ipotsa jaana, ‘Pego eno e nthuta eng ka Jehofa?’

Ka sekai, o ka leka go bona gore Jehofa o bontsha jang gore o lorato, o botlhale, o tshiamiso le gore o na le maatla. Le fa go ntse jalo, Jehofa o na le dinonofo tse dingwe tse dintsi tse di kgatlhang tse o ka ithutang ka tsone. O ka ithuta kae ka tsone?

Ithute ka tsone mo Kaedi ya go Dira Dipatlisiso ya Basupi ba ga Jehofa mo setlhogong se se reng, “Jehofa Modimo” o bo o ya kwa setlhogwaneng se se reng, “Dinonofo Tsa ga Jehofa.” Go tswa foo, batla dinonofo tse di tlhagelelang mo pegong e o e balang.