Moaposetoloi Paulo o ile a kwalela Bakeresete ba kwa Thesalonika a re: “Fa mongwe a sa ikobele se re se buileng mo lekwalong leno, mo tshwayeng.” (2 Bathes. 3:14, ntlh.) Mo nakong e e fetileng, re ile ra re taelo eno e neilwe bagolwane. Bagolwane ba ne ba neela puo mo phuthegong fa go na le mongwe yo o neng a sa ikobele kgakololo e e tswang mo Lefokong la Modimo le fa a gakolotswe ka makgetlo a le mantsi. Go tswa foo, baboledi ba ne ba sa tshwanela go ikopanya le motho yoo.

Le fa go ntse jalo, re tlhoka go fetola tsela e re tlhaloganyang temana eno ka yone. Gone jaanong re a tlhaloganya gore kgakololo ya ga Paulo ke tshwetso e mmoledi mongwe le mongwe a tshwanetseng go itirela yone. Ka jalo, ga go tlhokege gore bagolwane ba neele puo go tlhagisa phuthego fa go na le mongwe yo o sa ikobeleng kgakololo e e tswang mo Lefokong la Modimo. Goreng? Go sekaseka se Paulo a ileng a se bua fa a ne a gakolola Bathesalonika, go ka re thusa go bona karabo.

Paulo o ile a lemoga gore go ne go na le ba ba neng ‘ba sa dire dilo ka thulaganyo’ mo phuthegong. O ne a ba neile kgakololo e e tswang mo Lefokong la Modimo, le fa go ntse jalo ba ne ba gana go e ikobela. Fa a ne a ba etetse, o ile a ba raya a re: “Fa motho a sa batle go bereka, a a se ka a ja.” Mme gone, bangwe ba bone ba ne ba sa ntse ba gana go bereka gore ba itlamele, le fa gone ba ne ba ka kgona go dira jalo. Mo godimo ga moo, ba ne ba itshunya nko mo dikgannyeng tsa batho. Bakeresete ba ne ba tshwanetse go dirisana jang le batho ba ba ntseng jalo?​—2 Bathes. 3:6, 10-12.

Paulo o ne a re: “Mo tshwayeng.” Ka Segerika lefoko leno le kaya go baya motho leitlho le go ikela tlhoko gore a se ka a go tshwaetsa ka mekgwa ya gagwe e e sa siamang. Paulo o ne a naya mongwe le mongwe mo phuthegong kgakololo eno, e seng bagolwane fela. (2 Bathes. 1:1; 3:6) Ka jalo, fa mokaulengwe kgotsa kgaitsadi a ne a ka lemoga gore Mokeresetemmogo le ene ga a ikobele kgakololo e e tswang mo Lefokong la Modimo, o ne a ka dira tshwetso ya gore a “tlogele go ikopanya” le ene.

A seno se raya gore motho yoo o ne a tshwanetse go tsewa jaaka motho yo o tlositsweng mo phuthegong? Nnyaa, Paulo o ne a re: “Tswelelang lo mo tlhagisa e le mokaulengwe wa lona.” Ka jalo, bakaulengwe le bokgaitsadi ba ne ba sa ntse ba ka bua le ene fa ba le kwa dipokanong le fa ba le kwa bodireding, mme ba ne ba ka dira tshwetso ya gore ba se ka ba itlosa bodutu le ene. Goreng? Paulo o ne a re: “Gore a tle a tlhabiwe ke ditlhong.” Fa re sa ikopanye le ene, a ka nna a tlhabiwa ke ditlhong a bo a tlogela mekgwa ya gagwe e e sa siamang.​—2 Bathes. 3:14, 15.

Bakeresete ba ka dirisa jang kgakololo eno ya ga Paulo gompieno? Sa ntlha, ba tshwanetse go netefatsa gore a tota motho yoo ga a ‘dire dilo ka thulaganyo’ jaaka Paulo a ne a tlhalosa. Paulo o ne a sa bue ka batho ba ba dirang dilo tse digakolodi tsa rona di sa re letleng go di dira, mme di se kgatlhanong le melaometheo ya Baebele. Gape o ne a sa bue ka batho ba ba ka tswang ba rata dilo tse rona re sa di rateng. Mo godimo ga moo, o ne a sa bue ka batho ba ba re utlwisitseng botlhoko. Go na le moo, Paulo o ne a bua ka batho ba ba ileng ba newa kgakololo e e tswang mo Baebeleng, mme ba bo ba tlhopha go sa e ikobele.

Fa re lemoga gore mokaulengwe kgotsa kgaitsadi o itlhokomolosa kgakololo e e tswang mo Lefokong la Modimo, a re tla itirela tshwetso ya gore ga re kitla re fetsa nako le ene kgotsa re itlosa bodutu le ene. E re ka eno e le tshwetso e mongwe le mongwe a tshwanetseng go itirela yone, re tshwanetse go bua le ba malapa a rona fela ka yone, e seng ope gape. Mme gone, re sa ntse re ka bua le motho yoo kwa dipokanong le kwa tshimong. Fa a tlogela mekgwa ya gagwe e e sa siamang, re ka ikopanya le ene gape.