Jehofa o ne a laela Baiseraele gore ba nne boitshepo. O ne a ba bolelela mafoko a a latelang go ba thusa go bona gore ba ka dira seo jang: “Ga o a tshwanela go tsamaya o senya motho leina mo bathong ba gaeno. Ga o a tshwanela go tsenya botshelo jwa motho yo mongwe mo kotsing. Ke nna Jehofa.”—Lefi. 19:2, 16.

Ka Sehebera, mafoko a a reng “ga o a tshwanela go tsenya botshelo jwa motho yo mongwe mo kotsing,” a ranolwa e le “o se ka wa ema kgatlhanong le madi a mongwe ka wena.” Mme gone, go “ema kgatlhanong” go kaya eng? Buka nngwe ya Sejuda e e tlhalosang Lefitiko e a re: “Go thata go tlhaloganya temana eno ka gonne ga re itse bokao jwa seane sa Sehebera [se se dirisitsweng mono], se fa se ranolwa lefoko ka lefoko se kayang ‘o se ka wa ema mo godimo ga, go bapa le kgotsa gaufi le.’”

Baithuti bangwe ba amanya mafoko ano le temana e e tlang pele ga yone e e reng: “Ga o a tshwanela go dira tshiamololo fa o atlhola. Ga o a tshwanela go tlhaola mohumanegi kgotsa wa tseela motho yo o humileng kwa godimo. O atlhole motho yo mongwe ka tshiamiso.” (Lefi. 19:15) Fa e le gore go ntse jalo, taelo e e mo go temana 16 e e reng motho a se ka a “ema kgatlhanong” le yo mongwe e ne e ka raya gore Baiseraele ba ne ba sa tshwanela go dira sepe se se neng se tla utlwisa motho yo mongwe botlhoko mo dilong tse di amanang le dikgetsi tsa kwa kgotlatshekelo, mo kgwebong kgotsa mo lelapeng. Gone ke boammaaruri gore ga re a tshwanela go dira dilo tseno, le fa go ntse jalo, go na le tsela e nngwe e e utlwalang sentle e re tshwanetseng go tlhaloganya mafoko ano a a mo go temana 16 ka yone.

Akanya ka mafoko a a simololang a temana eo. Modimo o laela batho ba gagwe gore ba se ka ba senya batho ba bangwe maina. Le fa go seba go baka mathata, go senya motho leina gone, go maswe le go feta. (Diane 10:19; Mor. 10:12-14; 1 Tim. 5:11-15; Jak. 3:6) Gantsi motho yo o senyang yo mongwe leina o bua maaka ka ene gore a senye tsela e ntle e motho yoo a itsegeng ka yone. Motho yo o senyang yo mongwe leina a ka ntsha bosupi jwa maaka ka motho yo mongwe, tota le fa seo se ka dira gore motho yoo a bolawe. Gakologelwa gore banna bangwe ba ba neng ba senya batho maina, ba ne ba bua maaka ka Nabothe, mme seo se ne sa dira gore a bolawe ka go kgobotlediwa ka maje go sa tshwanela. (1 Dikg. 21:8-13) Ka jalo, fela jaaka re bona mo karolong ya bobedi ya Lefitiko 19:16, motho yo o senyang motho yo mongwe leina, a ka ema kgatlhanong le ene ka go tsenya botshelo jwa gagwe mo kotsing.

Mo godimo ga moo, motho a ka senya yo mongwe leina ka gonne a mo tlhoile. Re bala jaana mo go 1 Johane 3:15: “Mongwe le mongwe yo o tlhoileng mokaulengwe wa gagwe ke mmolai, mme lo a itse gore ga go na mmolai ope yo o tla nnang le botshelo jo bo sa khutleng.” Mme e bile, fa Modimo a sena go bua mafoko a a mo go Lefitiko 19:16 o ne a re: “Ga o a tshwanela go tlhoa morwarrago mo pelong ya gago.”—Lefi. 19:17.

Ka jalo, taelo e e sa tlwaelegang e e mo go Lefitiko 19:16 e kgalemela Bakeresete botlhe. Ga re a tshwanela go nna le dikakanyo tse di sa siamang ka batho ba bangwe kgotsa go ba senya maina. Fa re “ema kgatlhanong” le motho yo mongwe, ka go mo senya leina ka gonne re sa mo rate e bile re mo tswela pelo seo se ka tswa se bontsha gore re mo tlhoile. Boammaaruri ke gore Bakeresete ga ba a tshwanela go tlhoa ope.—Math. 12:36, 37.