Nnyaa. Mafoko ao a Dafide a neng a a kwala a ne a sa reye jalo.

Ela tlhoko se a ileng a se kwala mo temaneng eo le mo ditemaneng tse di tshwanang le yone: “Ke tla opelela leina la gago dipako ka bosakhutleng fa ke ntse ke diragatsa maikano a me letsatsi le letsatsi.” “Ke tla go baka ka pelo ya me yotlhe Jehofa, Modimo wa me, e bile ke tla galaletsa leina la gago ka bosakhutleng.” “Ke tla baka leina la gago ka bosakhutleng le go ya go ile.”—Pes. 61:8; 86:12; 145:1, 2.

Fa Dafide a ne a kwala mafoko ao o ne a sa reye gore o ne a se kitla a swa. O ne a itse gore Jehofa o ne a rile batho ba ne ba tla swa ka ntlha ya boleo le gore le ene ke moleofi. (Gen. 3:3, 17-19; Pes. 51:4, 5) O ne a itse gore tota le banna ba Modimo a neng a ba amogela ba ba jaaka Aborahame, Isake le Jakobe ba ne ba sule. E bile Dafide o ne a lemoga gore le ene o tlile go swa. (Pes. 37:25; 39:4) Le fa go ntse jalo, mafoko a a neng a a bua a a mo go Pesalema 61:8 a ne a bontsha gore o ne a eletsa e bile a ikemiseditse go baka Jehofa ka bosakhutleng, mo go rayang botshelo jwa gagwe jotlhe.—2 Sam. 7:12.

Ka dinako tse dingwe, Dafide o ne a kwala ka se se neng se direga mo botshelong jwa gagwe ka nako eo, jaaka re bona mo mafokong a a mo godimo ga Dipesalema 18, 51 le 52. Mo go Pesalema 23, Dafide o tlhalosa Jehofa e le modisa yo o mo kaelang, yo o mo lapolosang le yo o mo sireletsang. Dafide e ne e le modisa yo o ntseng jalo. E bile o ne a batla go direla Modimo ‘malatsi otlhe a botshelo jwa gagwe.’—Pes. 23:6.

Gakologelwa gore Jehofa ke ene a neng a kaela Dafide go kwala dilo tsotlhe tse a neng a di kwala. Se a neng a se kwala se ne se akaretsa boporofeti jo bo neng bo tla direga moragonyana. Ka sekai, mo go Pesalema 110, Dafide o ne a kwala ka nako ya fa Morena wa gagwe a neng a tla bo a “[ntse] ka fa seatleng sa [Modimo] sa moja” a le kwa legodimong e bile a newa maatla. E ne e le maatla a go dira eng? A gore a fenye baba ba Modimo le go “atlhola ditšhaba” mo lefatsheng. Dafide e ne e le rremogolo wa ga Mesia, yo o neng a tla busa a le kwa legodimong le yo o neng a tla nna “moperesiti ka bosakhutleng.” (Pes. 110:1-6) Jesu o ne a re boporofeti jo bo mo go Pesalema 110 bo ne bo bua ka ene le gore bo ne bo tla diragadiwa mo nakong e e tlang.—Math. 22:41-45.

Jehofa o ne a kaela Dafide go kwala ka dilo tse di neng di direga ka motlha wa gagwe le tse di neng di tla direga mo nakong e e tlang fa a tla bo a tsositswe e bile a itumelela go baka Jehofa ka bosakhutleng. Ka jalo, Pesalema 37:10, 11 le 29 di bua ka se se neng se direga ka nako ya fa e ne e kwalwa le se se tla diregang mo nakong e e tlang. Ditemana tseo di ne tsa diragadiwa bogologolo kwa nageng ya Iseraele e bile di tla diragadiwa mo nakong e e tlang fa Jehofa a diragatsa ditsholofetso tsa gagwe.—Bona serapa 8 mo setlhogong se se reng, “O Tla Nna le Nna mo Paradaiseng” se se mo makasineng ono.

Ka jalo, Pesalema 61:8 le ditemana tse dingwe tse di tshwanang le yone di re bontsha gore Dafide o ne a batla go galaletsa Jehofa kwa Iseraele wa bogologolo go fitlha a swa. E bile di re bontsha se Dafide a tla se dirang mo nakong e e tlang fa Jehofa a sena go mo tsosa.