1. “Kagiso” e Modimo a re nayang yone ke eng, mme e tla re solegela molemo jang? (Bafilipi 4:6, 7)

 GO NA le mofuta mongwe wa kagiso o batho ba lefatshe leno ba sa itseng sepe ka one. Ke “kagiso” e Modimo a re nayang yone, e e dirang gore re ritibale ka gonne re atamalane le Rraarona yo o kwa legodimong. Fa re na le kagiso e Modimo a re nayang yone, re ikutlwa re sireletsegile. (Bala Bafilipi 4:6, 7.) Re itumelela go nna ditsala le batho ba ba mo ratang. E bile re itumelela go atamalana thata le “Modimo wa kagiso.” (1 Bathes. 5:23) Fa re itse Rraarona, re mo tshepa e bile re mo ikobela, kagiso e a re nayang yone e tla re thusa gore re ritibale, segolobogolo fa re na le mathata.

2. Goreng re ka tshepa gore re ka nna le kagiso e Modimo a re nayang yone?

² A mme tota go a kgonega gore re nne le kagiso e Modimo a re nayang yone fa re tlhagelwa ke mathata a a jaaka malwetse, masetlapelo a tlholego, dikhuduego kgotsa re bogisiwa? Mathata ano a ka dira gore re tshoge. Le fa go ntse jalo, Jesu o ne a raya balatedi ba gagwe a re: “Lo se ka lwa tshwenyega kgotsa lwa boifa.” (Joh. 14:27) Se se itumedisang ke gore bakaulengwe le bokgaitsadi ba dirisa kgakololo eo ya ga Jesu. Jehofa o ba thusitse gore ba nne le kagiso fa ba ntse ba itshoketse mathata.

3. Bolwetse jwa leroborobo bo ka dira jang gore re se ka ra nna le kagiso?

³ Malwetse a leroborobo a ka fetola matshelo a rona ka ponyo ya leitlho. Akanya kafa COVID-19 e ileng ya ama batho ba le bantsi ka gone. Mo patlisisong nngwe e e ileng ya dirwa, go ile ga lemogiwa gore batho ba le bantsi ba ne ba sa kgone go robala ka nako ya bolwetse joo. Bolwetse jono bo ile jwa dira gore batho ba simolole go tlhobaela thata, ba tshwenyege mo maikutlong, ba nwe bojalwa le go dirisa diritibatsi thata, ba sotle ba malapa a bone ba bo ba batle go ipolaya. Fa go na le bolwetse bongwe  kwa o nnang gone, ke eng se o ka se dirang gore o se ka wa tlhobaela thata mme o itumelele kagiso e Modimo a re nayang yone?

4. Go itse boporofeti jwa ga Jesu jo bo buang ka malatsi a bofelo go dira jang gore re nne le kagiso?

⁴ Jesu o ne a bolelela pele gore mo malatsing a bofelo, go ne go tla nna le malwetse a leroborobo kgotsa a a anamang thata “mo mafelong ka go latelana.” (Luke 21:11) Go itse seo go re tlisetsa kagiso jang? Ga re gakgamadiwe ke malwetse ano a a tlhagang. Re lemoga gore dilo tseno di direga fela jaaka Jesu a rile di tla direga. Ka jalo, re tla dirisa kgakololo eno e Jesu a e neileng batho ba ba tshelang mo motlheng wa bofelo: “Lo se ka lwa tshoga.”—Math. 24:6.

5. (a) Bafilipi 4:8 le 9 e a re re tshwanetse go rapelela eng fa go na le bolwetse jo bo tlhagileng? (b) Go reetsa Baebele e e rekotilweng go ka go thusa jang?

⁵ Fa bolwetse bongwe bo tlhaga, go ka direga gore re tshwenyege thata e bile re tshoge. Seo se ile sa diragalela kgaitsadi mongwe yo o bidiwang Desi. b Morago ga gore malomaagwe, ntsalaagwe, le ngaka ya gagwe ba bolawe ke bolwetse jwa COVID-19, o ne a tshogile tota a akanya gore le ene bo tlile go mo tshwara a bo a bo fetisetsa mo go mmaagwe yo o tsofetseng. O ne a tshwenyegile ka gore bolwetse jono bo ne bo tla dira gore a latlhegelwe ke tiro a bo a palelwa ke go reka dijo le go duela rente. O ne a tshwenyegile tota ka dilo tseno mo a neng a sa kgone go robala bosigo. Le fa go ntse jalo, Desi o ne a kgona go nna le kagiso gape. O kgonne jang? O ne a rapela Jehofa a mo kopa gore a mo thuse go ritibala le go akanya ka dilo tse di siameng. (Bala Bafilipi 4:8, 9.) O ne a reetsa Jehofa fa a ne a bua le ene a dirisa Baebele e e rekotilweng. A re: “Tsela e mantswe a babadi bao a sidilang maikutlo ka yone e ne ya dira gore ke se ka ka tlhola ke tlhobaela thata e bile a ne a nkgopotsa gore Jehofa o kutlwelobotlhoko.”—Pes. 94:19.

6. Go ithuta o le nosi le go ya dipokanong go tla go thusa jang?

⁶ Fa bolwetse bongwe bo tlhaga, go ka nna thata gore re dire dilo tse re tshwanetseng go di dira, le fa go ntse jalo o se ka wa letla seo gore se go kgoreletse go ithuta o le nosi kgotsa go ya dipokanong. Maitemogelo a a mo dikgatisong le mo dibidiong, a tla go gopotsa gore bakaulengwe le bokgaitsadi ba gago, ba ntse ba direla Jehofa ka boikanyegi le fa ba na le mathata a a tshwanang le a gago. (1 Pet. 5:9) Dipokano di tla go thusa gore o nne o akantse ka dilo tse di kgothatsang tse di mo Baebeleng. Gape di tla go thusa gore o kgone go kgothatsa ba bangwe le gore le bone ba go kgothatse. (Bar. 1:11, 12) Fa o akanya ka tsela e Jehofa a thusitseng batho ba ba mo obamelang ka yone fa ba ne ba lwala kgotsa ba ikutlwa ba le nosi, tumelo ya gago e tla nonofa e bile o tla tlhatswega pelo gore le wena o tla go thusa.

7. O ithuta eng mo go moaposetoloi Johane?

 ⁷ Tsaya matsapa a go bua le bakaulengwe le bokgaitsadi ba gago. Bolwetse jwa leroborobo bo ka dira gore le fa re na le badumedimmogo le rona re se ka ra atamalana thata le bone. Ka nako eo, o ka ikutlwa ka tsela e moaposetoloi Johane a neng a ikutlwa ka yone. O ne a batla go bona tsala ya gagwe e bong Gaio ba lebane difatlhego. (3 Joh. 13, 14) Le fa go ntse jalo, Johane o ne a lemoga gore go ne go tlile go tsaya nako a sa bone Gaio. Ka jalo, o ne a dira se a neng a kgona go se dira. O ne a kwalela Gaio lekwalo. Fa go sa kgonege gore o etele bakaulengwe le bokgaitsadi ba gago, leka go ba founela, go tlotla le bone ka videoconferencing kgotsa go ba romelela molaetsa. Fa o ntse o bua le Bakeresetemmogo le wena, o tla ikutlwa o se nosi e bile o tla ritibala. Bua le bagolwane fa o tshwenyegile thata mme o amogele dikgothatso tsa bone tse di lorato.—Isa. 32:1, 2.

8. Masetlapelo a tlholego a ka dira jang gore o se ka wa nna le kagiso?

⁸ Fa e le gore kwa o nnang gone go kile ga nna le morwalela, thoromo ya lefatshe kgotsa melelo, seo se ka tswa se ile sa dira gore o tlhobaele thata ka lobaka lo loleele. Fa e le gore o tlhokafaletswe ke batho ba o ba ratang kgotsa o senyegetswe ke ntlo le dilo dingwe tse o neng o na le tsone, o ka tswa o ile wa hutsafala, wa felelwa ke tsholofelo kgotsa wa galefa. Seno ga se reye gore o rata dikhumo kgotsa gore ga o na tumelo. O diragaletswe ke dilo tse di utlwisang botlhoko e bile batho ba ka nna ba lebelela gore o kotlomane pelo. (Jobe 1:11) Le fa go ntse jalo, o sa ntse o ka nna le kagiso. Re raya jang?

9. Jesu o ne a reng go re baakanyetsa masetlapelo a tlholego?

⁹ Gopola se Jesu a ileng a se bolelela pele. Batho bangwe ba akanya gore ga ba kitla ba tlhagelwa ke masetlapelo a tlholego, mme rona re a itse gore masetlapelo ao a tlile go nna mantsi thata mo motlheng wa rona e bile mangwe a one a ka re ama. Jesu o ne a bolelela balatedi ba gagwe gore “dithoromo tse dikgolo tsa lefatshe” le masetlapelo a mangwe a tlholego a ne a tla direga pele bokhutlo bo tla. (Luke 21:11) Gape o ne a bolelela pele gore “bosula bo [ne] bo tla bo bo oketsegile,” e leng se re se bonang gompieno. Ka sekai, go na le bokebekwa, thubakanyo le borukhutlhi. (Math. 24:12) Jesu ga a ka a re dilo tseno di ne di tla diragalela fela batho ba ba sa direleng Jehofa. Tota e bile, batlhanka ba ga Jehofa ba ba ikanyegang ba ne ba amiwa ke masetlapelo a tlholego. (Isa. 57:1; 2 Bakor. 11:25) Jehofa ga a ka ke a re sireletsa ka kgakgamatso mo masetlapelong, le fa go ntse jalo o tla re naya dilo tse re di tlhokang gore re nne re ritibetse e bile re na le kagiso.

10. Goreng go ipaakanyetsa masetlapelo gone jaanong go bontsha gore re tshepa Jehofa? (Diane 22:3)

¹⁰ Fa re ipaakantse nako e sa ntse e le teng, go tla nna motlhofo gore re ritibale fa maemo a tshoganyetso a tlhaga. A go ipaakanya go raya gore ga re tshepe Jehofa? Nnyaa, le e seng. Tota e bile, go ipaakanyetsa masetlapelo go bontsha gore re tshepa gore Jehofa o tla re tlhokomela. Goreng re rialo? Lefoko la Modimo le re gakolola gore re ipaakanyetse masetlapelo a a ka diregang. (Bala Diane 22:3.) Gangwe le gape phuthego ya Modimo e re rotloetsa gore re ipaakanyetse maemo a tshoganyetso e dirisa dimakasine le dipokano, e bile e re naya dikitsiso tse di mo nakong. c A re tshepa Jehofa? Fa e le gore go ntse jalo, re tla dirisa kgakololo eo gone jaanong pele masetlapelo a direga.

11. O ithuta eng mo sekaong sa ga Margaret?

¹¹ Akanya ka se se ileng sa diragalela kgaitsadi  mongwe yo o bidiwang Margaret. O ne a kopiwa gore a tswe mo ntlong ya gagwe ka gonne go ne go na le melelo mo lefelong le a neng a nna mo go lone. E re ka batho ba ne ba sia ba le bantsi ka nako e le nngwe, go ne go na le dikoloi di le dintsi mo tseleng mo di neng di sa kgone go tsamaya. Loapi lo ne lo fifetse ka ntlha ya mosi o montsho e bile Margaret o ne a sa kgone go tswa mo koloing ya gagwe. Le fa go ntse jalo, o ne a falola ka gonne a ne a ipaakantse. Mo bêkêng ya gagwe go ne go na le mmapa o o neng wa mo thusa gore a kgone go bona tsela e nngwe e a neng a ka e dirisa gore a tswe mo lefelong leo. O ne a kile a dirisa tsela eo pele ga foo e le gore go nne motlhofo go e dirisa fa go tlhaga maemo a tshoganyetso. Go a itumedisa gore Margaret o ne a falola ka gonne a ne a ipaakantse go sa le gale.

12. Goreng re ikobela ditaelo tse re di newang gore di re sireletse?

¹² Balaodi ba ka re beela dithibelo dingwe, ba re kopa gore re tswe mo malapeng a rona kgotsa re latele dikaelo dingwe ka boikaelelo jwa go sireletsa rona le batho ba bangwe. Batho bangwe ba okaoka go latela ditaelo tseno ka gonne ba sa batle go tlogela dilo tse ba nang le tsone. Bakeresete bone ba dira jang? Baebele e a re: “Ikobeleng se Morena a se batlang ka go ikobela taolo nngwe le nngwe e e tlhomilweng ke batho, e ka tswa e le kgosi ka gonne e na le maemo a a kwa godimo kgotsa balaodi ka gonne ba tlhomilwe ke kgosi eo.” (1 Pet. 2:13, 14) Phuthego ya Modimo le yone e re naya dikaelo gore re nne re sireletsegile. Re nna re gopodiwa gangwe le gape gore re neye bagolwane dinomoro tsa rona tsa mogala tse di berekang gore ba kgone go re founela fa go tlhaga maemo a tshoganyetso. A o dirile jalo? Gape re ka nna ra laelwa gore re se ka ra tswa mo magaeng a rona kgotsa re ye kwa mafelong a a sireletsegileng, ra newa dilo dingwe tsa namolo kgotsa ra newa ditaelo tsa gore re thuse ba bangwe leng le gone jang. Fa re sa ikobele ditaelo tseo, re ka tsenya matshelo a rona le a bagolwane mo kotsing. Gopola gore banna bano ba ba ikanyegang ba re tlhokometse. (Baheb. 13:17) Margaret a re: “Ke dumela gore go ikobela kaelo ya bagolwane le ya phuthego, go ntshireleditse.”

13. Ke eng se se thusitseng Bakeresete ba le bantsi ba ba ileng ba tshwanelwa ke go tswa mo magaeng a bone gore ba nne ba itumetse e bile ba na le kagiso?

¹³ Bakaulengwe le bokgaitsadi ba le bantsi ba ba ileng ba tshwanelwa ke go tswa mo magaeng a bone ka ntlha ya masetlapelo a tlholego,  dintwa kgotsa dikhuduego, ba dirile sotlhe se ba ka se kgonang go tlwaela boemo joo jo bosha e bile ba simolotse go direla Jehofa mo go oketsegileng. Fela jaaka Bakeresete ba bogologolo ba ba neng ba gasame ka ntlha ya go bogisiwa, ba tswelela ba “rera dikgang tse di molemo tsa lefoko la Modimo.” (Dit. 8:4) Go rera go ba thusa go tlhoma mogopolo mo Bogosing, e seng mo maemong a a thata a ba lebanang le one. Seo se ba thusa gore ba nne ba itumetse e bile ba na le kagiso.

14. Go bogisiwa go ka dira jang gore re se ka ra nna le kagiso?

¹⁴ Fa re bogisiwa, re ka latlhegelwa ke dilo di le dintsi tse di re thusang gore re ritibale gone jaanong. Re a itumela fa re kgona go kopana mmogo, go rera ka kgololesego le go dira ditiro tsa letsatsi le letsatsi re sa boife gore re tla tshwarwa. Fa re tseelwa kgololesego ya go dira dilo tseno, re ka nna ra simolola go tlhobaela re ipotsa gore ke eng se sengwe gape se se tla diregang. Ga go phoso go ikutlwa jalo. Le fa go ntse jalo, re tshwanetse go nna kelotlhoko. Jesu o ne a re go bogisiwa go ka dira gore balatedi ba gagwe ba felelwe ke tumelo. (Joh. 16:1, 2) Re ka dira eng gore re nne re na le kagiso fa re bogisiwa?

15. Goreng re sa tshwanela go boifa go bogisiwa? (Johane 15:20; 16:33)

¹⁵ Lefoko la Modimo le re bolelela jaana: “Botlhe ba ba eletsang go obamela Modimo e le balatedi ba ga Keresete Jesu le bone ba tla bogisiwa.” (2 Tim. 3:12) Mokaulengwe mongwe yo o bidiwang Andrei o ne a thatafalelwa ke go dumela gore batlhanka botlhe ba ga Jehofa ba ne ba tla bogisiwa, fa tiro ya rona e sena go thibelwa kwa nageng ya bone. O ne a ipolelela jaana: ‘Basupi ba bantsi thata mo nageng eno. Ka jalo, balaodi ba ka se kgone go re tshwara rotlhe.’ Go na le gore tsela eo e a neng a akanya ka yone e dire gore a nne le kagiso. O ne a nna a tlhobaela ka metlha. Bakaulengwe ba bangwe bone ba ne ba ikanya Jehofa e bile ga ba a ka ba akanya gore ba ne ba ka se ka ba tshwarwa. Ba ne ba itse gore ba ka nna ba tshwarwa, mme ba ne ba sa tlhobaele thata jaaka Andrei. Ka jalo, o ne a fetola tsela e a neng a leba dilo ka yone mme a tshepa Jehofa ka botlalo. Go ise go ye kae o ne a ritibala, e bile gone jaanong o itumetse le fa go sa ntse go na le mathata a mantsi. Le rona re ka diragalelwa ke se se tshwanang. Jesu o ne a re bolelela gore re tla bogisiwa,  mme gape o re netefaletsa gore re ka kgona go tswelela re ikanyega.—Bala Johane 15:20; 16:33.

16. Re tshwanetse go ikobela kaelo efe fa re bogisiwa?

¹⁶ Fa tiro ya rona e thibetswe, ofisi ya lekala le bagolwane ba ka re naya ditaelo tse di rileng. Ditaelo tseo di diretswe go re sireletsa, go tlhomamisa gore re nna le dilo tse re di tlhokang gore re nne re atamalane le Jehofa e bile di re thusa gore re tswelele re rera kafa re ka kgonang ka gone. Dira sotlhe se o ka se kgonang gore o ikobele ditaelo le fa gone o sa di tlhaloganye ka botlalo. (Jak. 3:17) Gape o se ka wa bolelela batho ba bangwe tshedimosetso e ba sa tshwanelang go e itse ka bakaulengwe le bokgaitsadi ba rona kgotsa ka ditiro tsa phuthego.—Mor. 3:7.

17. Fela jaaka baaposetoloi, ke eng se re ikemiseditseng go se dira?

¹⁷ Lengwe la mabaka a go bo Satane a tlhasela batho ba Modimo ke gore ba “neilwe kabelo ya go naya bosupi ka ga Jesu.” (Tshen. 12:17) O se ka wa letla Satane le lefatshe la gagwe go go tshosetsa. Fa re rera e bile re ruta le fa re ganediwa, re tla itumela e bile re tla nna le kagiso. Mo lekgolong la ntlha la dingwaga fa balaodi ba Bajuda ba ne ba laela baaposetoloi gore ba kgaotse go rera, banna bao ba ba ikanyegang ba ne ba tlhopha go ikobela Modimo. Ba ne ba tswelela ba rera e bile seo se ile sa dira gore ba itumele. (Dit. 5:27-29, 41, 42) Gone ke boammaaruri gore fa tiro ya rona e thibetswe, re tshwanetse go nna kelotlhoko fa re rera. (Math. 10:16) Mme fa re dira sotlhe se re ka se kgonang go itumedisa Jehofa le go rera molaetsa o o bolokang matshelo, re tla nna le kagiso.

18. Ke mang yo o ka re nayang kagiso ya mmatota?

¹⁸ Nna o tlhatswegile pelo gore le fa o na le mathata o tla nna le kagiso. Ka dinako tseo, re tshwanetse go nna re gopotse gore re tlhoka kagiso e re ka e newang ke Jehofa fela. Ikaege ka ene fa go tlhaga malwetse, go nna le masetlapelo a tlholego kgotsa o bogisiwa. Nna o atamalane le phuthego ya gagwe. Leba kwa pele kwa bokamosong jo bo itumedisang. Fa o dira jalo, “Modimo wa kagiso o tla nna le [wena].” (Bafil. 4:9) Mo setlhogong se se latelang, re tla bona gore re ka thusa jang Bakeresetemmogo le rona gore ba nne le kagiso e Modimo a re nayang yone fa ba tlhagelwa ke mathata.